Nehemi 12 - Yálá laawoo hɛɓɛ (dc)

Ɉaláá laa həli nuą da Levi huwuhu nuą di laa ka

¹ Ɉaláá laa həli nuąi pa, da Levi huwuhu nuą diɛ həɠə nuwɔ laa hu, da Saltiɛlə lon Ɉerubabɛlə, da Ɉosue ni, diɛ ka: Seraya, Yirmeya, Ɛzra,

² Amaria, Malukə, Hatusə,

³ Sekania, Rehumə, Meremotə,

⁴ Ido, Ginetoi, Aviya,

⁵ Miyaminə, Maadia, Bilga,

⁶ Semaya, Yoyarivə, Yedaya,

⁷ Salu, Amɔkə, Hilkiya, Yedaya. Yiliɠaa ɓə kɛ a ɉaláá laa həli nuą nwun nąmįną, da di kaayɔwɔɠaa, Ɉosue nwɔ lɔwai hu.

⁸ Levi huwuhu nuą ɓaa: Yesua, Binui, Kadmiɛlə, Serevia, Yehuda, Matania, yaa, da gaayɔwɔɠaa diɛi nwələ toɔ mąą laa tɛɛ kɛ di pɔ.

⁹ Bakbukia da Uni di liɛni di kɛi koló kɛ koló kɛ bɛlɛ mąąkpɛɛ mɛ̨nį hu.

¹⁰ Ɉosue lon maa kɛ a Yoyakimə, Yoyakimə lon maa Ɛliasivə, Ɛliasivə lon maa Yoyada,

¹¹ Yoyada lon maa Yonatan, Yonatan lon maa Yadua.

¹² Yoyakimə nwɔ lɔwai hu, ɉaláá la həli nuą, bɛlɛ nąmįną ɓaa kɛ a: Seraya nwɛi ɓaa kɛ a Meraya; Mirmeya nwɛi ɓa kɛ a Hanania;

¹³ Ɛzra nwɛi ɓaa Mesulamə; Amaria nwɛi ɓaa Yehohanan;

¹⁴ Meliku nwɛi ɓaa Yonatan; Sevania nwɛi ɓaa Yosɛfə;

¹⁵ Harimə nwɛi ɓaa Adna; Merayotə nwɛi ɓaa Hɛlkai;

¹⁶ Ido nwɛi ɓaa Zakaria; Ginetɔn nwɛi ɓaa Mesulamə;

¹⁷ Aviya nwɛi ɓaa Ɉikri; Miniaminə nwɛi ɓaa; Moadia nwɛi ɓaa Piltai.

¹⁸ Bilga nwɛi ɓaa Samua; Semaya nwɛi ɓaa Yehonatan,

¹⁹ Yoyarivə nwɛi ɓaa Matenai; Yedaya nwɛi ɓaa Uzi;

²⁰ Salai nwɛi ɓaa Kalai; Amɔkə nwɛi ɓaa Ebɛrə;

²¹ Hilkiya nwɛi ɓaa Hasavia, Yedaya nwɛi ɓaa Netanɛlə.

²² Ɛliasivə, Yoyada, da Yadua di wɔ yələi, di Levi huwuhu nuą kɛ a pɛlɛ́ nąmįną, di ɉaláá la həli nuą laa pɛ̨ɛ̨, ə lɛɛ ɉu ə həli la Pɛrsə tɔɔmun Dariusə nwɔ tɔɔlaai ɓa.

²³ Levi lonnii ŋɛ̨i kɛ a pɛlɛ́ nąmįną, di di laa pɛ̨ɛ̨ nɔi hɛɓɛ́ hu, ə lɛɛ ɉu ə həli la Ɛliasivə lon Yohanan nwɔ lɔwai ɓa.

²⁴ Levi huwuhu nuą ɲɛ̨itɔwɔ nuą ka: Hasavia, Serevia da Kadmiɛlə lon Yesua, ə lɛɛ, di nąn nonnii ŋɛ̨i kɛi nwələ muhon di ɲɛ̨itɔwɔ, yɛ pələi Yálá nwɔ nu Davidə ə mo la, nu kəlee da nwɔ hvóló, Yálá mąątɛ̨nɛ̨ mɛ̨nį da ɉɛɠɛɛ ɓo mɛ̨nį ɓa.

²⁵ Matania, Bakbukia, Ovadia, Mesulamə, Talmɔn da Akuvə, diɛi kɛ a bɛlɛ́ laaləi makpɛ nuą.

²⁶ Nuą tii ɓə kɛ goló ɓa a Ɉosue lon Yoyakimə nwɔ lɔwai hu, Yosadakə lon, ə lɛɛ, da Nehemi ŋɛ̨i kɛ a gbahanama da ɉaláá laa həli mun Ɛsdrasə di wɔ lɔwai hu.

Daa mąąkpɛ hįį nwɔ hɛli

²⁷ Ɉįį ŋɛ̨i kɛ dinɛn ŋąą Ɉerusalɛmə daa ɓa, ɲələi di pa lúwɔ́ tooi la mą, də li di Levi huwuhu nuą təli di həɠə ɓɛɠaai di kɛ laa, ə gɛ, di pa Ɉerusalɛmə, di ɉɛli pu kwəinɛ̨ɛ̨ hu, a Yálá mąątɛ̨nɛ̨ woo, da wələɠaa, diɛ nwələ too diɛ muhee a gwɛnįn da bɛlɛgwəi da ɓala.

²⁸ Nwələ too nuą lonnii di di ɲąąkpɔn, di həɠə Ɉerusalɛmə kwɛlɛ lɔiɠaa hu, di həɠə Netofa kwɛlɛ taaɠaa hu,

²⁹ ə həɠə Bɛtə-Gilgalə da Gɛva da Azmawɛtə ɲeakɔɔɠaa hu, mąąhɔlɔɓo, nwələ too nuą daa kɛ di wɔ taaɠaai tɔɔ Ɉerusalɛmə taa kwɛlɛ.

³⁰ Ɉaláá la həli nuą da Levi huwuhu nuą di di mąąhəɠə, di nɔi lonnii mąąhəɠə, da gbonŋąą, da ɉį́i.

³¹ Ŋą́ Ɉuda lɔi ɲąąwooɓo nuą tɛ ɉį́i mɛ̨i, ə lɛɛ, ŋį́ nwələ too nuą kpulu kɛ hveelɛ. Dɔ̨nɔ̨ ə li ɓa-mįi-yee hu pələ, dɔ̨nɔ̨ yɛ li dulun ŋą, gbon gɛɛnąą pələ.

³² Hosaya da Ɉuda lɔi ɲąąwooɓo nuą bələ tɔ̨nɔ̨, di hvilɛn ŋąą nwələ too nuą pulu.

³³ Azaria, Ɛzra, Mesulamə,

³⁴ Yehuda, Bɛnɉamɛn, Semaya da Yirmeya,

³⁵ daɠaa di kɛ a ɉaláá laa həli nuą lonnii taɠaa, túlúɠaa di ɓo di yəi; Yonatan lon Ɉekaria, Semaya lon, Matania lon, Mikaya lon, Ɉakurə lon, Asafə lon,

³⁶ da gaayɔwɔɠaa Semaya, Azarɛlə, Milalai, Gilalai, Maai, Netanɛlə, Yehuda, Hanani, Yálá nwɔ nu Davidə nwɔ hvɛli kɛ hɛnŋąąi di ɓo di yəi, ɉaláá la həli mun Ɛsdrasə ɓə kɛ di ɲɛ̨itɔwɔ.

³⁷ Ɲa nwun gulɔi gbon gɛɛnąą, yii kɛ di ɲɛ̨itɔwɔ, də li naa diɛ li laa pələ, di tɛɛ a Davidə yəi bɛlɛ́ laaləi pələ diɛ tɛ ɉįi nwuɔ̨, Davidə nwɔ pɛ́lɛ́i nwun mɛ̨i pələ, ə lɛɛ di həli la nwɔ kpon ɓa, hvóló kulɔi pələ.

³⁸ Nwələ too nuą gbulu hveelɛ na ə ɉon a kɔ́ɓɛyee hu pələ, ɲą́ą́ gbinįi, ŋį́ kɛ di pulu kwa nɔi ɲąąwooɓo nuą bələ tɔ̨nɔ̨, ɉįi mɛ̨i, nɛɠɛ pɛli pələ nwun mɛ̨i pələ, ə lɛɛ ɉu, ku həli ɉįi nwąnąą ɲąą kɛnɛ̨ kɛɛnąą.

³⁹ Ə lɛɛ, Ɛfraimə nwɔ kpon nwun mɛ̨i da Yesana nwɔ kpon, da ɉɔwɔlee pɛlɛ kpon. Hananeɛlə taa mąąkpɛ pɛlɛ da nu nwun nwundɔ̨nɔ̨ taa mąąkpɛ pɛlɛ, ə lɛɛ ɉu ku həli la daa mąąkpɛ pɛlɛ ɓa.

⁴⁰ Nwələ too nuą kpulu hveelɛi tii di tɔɔ Yálá hee pɛlɛ́ mu, ə mą kɛ ɲą́ą́ kwa daa ɲąąwooɓo nuą bələ tɔ̨nɔ̨i tii kɛ bɔi.

⁴¹ Ə lɛɛ ɉaláá laa həli nuą Ɛliakimə, Maaseya, Miniaminə, Mikaya, Ɛlioenai, Ɉekaria, Hanania, túlúɠaa di ɓo di yəi

⁴² Ə lɛɛ, Maaseya, Semaya, Eleazarə, Uzi, Yehohanan, Malkiya, Elamə da Ezɛrə. Nwələ too nuą diɛ wələ too da di ɲɛ̨itɔwɔ mun Yizraya.

⁴³ Di haláá kpɛa kpɛa kulɔ a mąą yələi tii, nu kəlee kwəinɛ̨ɛ̨ mąąhɔlɔɓo, Yálá aa kɛ kwəinɛ̨ɛ̨ kɛnɛ̨ tɛɛ di pɔ. Nɛ̨ąą da lɛapɛlɛɛɠaa diɛ kpɛli, di kwəinɛ̨ɛ̨i kɛ, gwəinɛ̨ɛ̨i tii di kɛi gulɔ Ɉerusalɛmə, bələ ə li kwɛa la.

Ɉaláá laa həli nuą da Levi huwuhu nuą di wɔ naa

⁴⁴ Volói tii ɓə di nuą taɠaa yɛɠɛ la ɉu, ə gɛ, ɉihɛn nįnɛ̨ɠaa da ɉɛn bow nąąɠaai di pai kɛi gulɔi da bu mu, diɛ mɛ̨i kaa. Ɉɛnŋąąi tii da paa la diɛ həɠə la daaɠaa hu, nuąi tii ɓə da haláá laa həli nuą da Levi huwuhu nuą di wɛi kulɔ ɉu, pələi tɔ́n ə mo la. Ɉuda nɔi nuą kəlee kwəinɛ̨ɛ̨i kɛ ɉaláá laahəli nuą da Levi huwuhu nuą di kɛ koló hu.

⁴⁵ Ɉaláá laahəli nuą da Levi huwuhu nuą, di yee ə kɛ di wɔ Yálái nwɔ kolói ɓa, da nuą mąąhəɠə mɛ̨nį, yɛ pələi tɔ́n ə mo la. Yii ɓaa nwələ too nuą da bɛlɛ́ laaləi nuą, di kɛi koló kɛ, yɛ pələi Davidə da non Salomɔn di mo la.

⁴⁶ Mąąhɔlɔɓo, tɔlɔɔi tii kɛ, Davidə da Asafə di wɔ lɔwai hu, wələ too nuą nwun nąmįną di kɛ mą, Yálá mąątɛ̨nɛ̨ wələ yɛ ɓo laa, da ɉɛɠɛɛ ɓo wələɠaa.

⁴⁷ Zorobabɛlə da Nehemi di wɔ lɔwai hu, Israɛlə nuą di kɛi hɛnŋąą tɛɛ nwələ too nuą da bɛlɛ́ laaləi nuą di pɔ a hvóló tɛitɛi kəlee. Yii kɛ naakwɛlanmoɔ Yálá ɓa, ə kɛi lɛɛ Levi huwuhu nuą yəi, yai kɛ a Aarɔn lonnii di wɛi, diɛ dɛɛ di pɔ.