Nahumə 3 - Yálá laawoo hɛɓɛ (dc)

Daa nu ɲąmą pu taai too

¹ ɲąmą pu taai nɛ̨ŋɛ̨n naai, yai naahvɛɛ a hvulu mɛ̨nį da nwuɔ̨ mɛ̨nį; hva kpəla toomɛ̨i kɛɛ ɓa.

² Hvaɠa tinŋaa kaa tɔɔi, da wotolo kɔ́wɔ mu tinŋaa hvooɠaa diɛ gilɛ həɠə, wotoloɠaa diɛ li a gilɛ.

³ Ɉoo nąmįną diɛ ɉooɠaa wean, gɔ́ kɔ́ ɓɔwaɠaa diɛ lən mąlą mąlą; gbalaɠaa diɛ di kpaalən daɠa, lono hvo nu powa ɓa, nu powa laai lɔ gee mɛ̨i, nu powa yɛ li lɔ daną daną, nuą kaa kalin ɉii a nu powa.

⁴ Dúwɔ pələ ɲɔ̨n gulɔ nɛ̨ɛ̨nui nwɔ nɛ̨ŋɛ̨nŋaai laa pɔɔ li, nwəlɛɛ kɛ nuą ɲɛ̨i kwɛlii, nɛlɛɛi kɛ kɛnɛ̨, ə kɛi hee lɔiɠaa mɛ̨i a nwɔ túwɔ́ pələ ɲɔ̨n, yɛ hee nuą mɛ̨i a nwɔ tɔlukpɛ mɛ̨nį.

⁵ Yili ɓə gɛi gɛ́ kɔ́ pɛlɛ yɛ́, Yai-Laa Mɛ̨nį Kəlee ŋą Hééɓomun, nwoo ka, yɛi, Gáá ə́ wɔ həɠəi tɛi a ə́ nwun, gɛ́ bɛlɛ ə́ ɲɛ̨ilai, gɛ́ ə́ lɛ lɔiɠaa diɛ, gɛ́ ə́ ɓɛlɛ kpɛɛ yɛ́, tɔɔɓɛlaa kəlee diɛ nąą kaa.

⁶ Gáá pai kala kpɛŋɛ̨n ɉi ə́ mɛ̨i, gɛ́ ə́ ɲɛ̨i paa la tii, diɛ nu takpɛliɠaa kɛ pələ kɔ́ɔn ə́ kɛ pələ ɓa.

⁷ Yili mąą mɛ̨nį ɓa, nui lɔpee pai ə́ kaa, gaa pai pui, yɛ tómą yɛ kɛ diɛ: «Daa Ninivə pu! Gbɛɛ wolo ɓə pai ɲɛ̨imąąwɛli kaai?» Mįnɛ̨ ɓə ŋą pɛli ə́ kpəla ɓo nuą kaai laa?

⁸ Ə́ tɔɔ pələ hviɛlaɓoɔ mɔ̨ɔ̨ Tɛbɛsə ɓa? Ə kɛ heeni Nilə ɲa ɓɛlaɠaa hąąi, gboloyá ə kɛ a mąąkɔ̨nwɔ̨ hįį.

⁹ Gili tɔɔi kɛ Eziptə da Nubi diɛ, kpɛɛ hvo kɛ ɲəi hɛnŋąą diɛ, kɔ́ mįnɛ̨ ə ɓo da Libi nuą, ɛlɛɛ Putə nuą di lɔwai.

¹⁰ Yaa kpɛli mɛ̨n, də li la lɔi takpɛli hu, di ɉon, diɛ li la luwɔlaa hu, di nwɔ lon dalaɠaai diɛ kpɛli di nwun nwolo kwəli hɛ̨ąi kəlee ɓa. Di nwɔ kalanɉonŋąą kɔ́ a kpɛɛn; di ɉu nuą kpɛa kpɛa kəlee yili a yɔwɔn.

¹¹ Ə́ wɔ yələ aa həli, yɛ́ kpɛli mɛ̨n, lɔɔ yɛ ə́ hon, yɛ ə́ kɛlɛ, yɛ́ kpɛli mɛ̨n, ə́ pui kwɛli ə́ yowo tɔwɔ.

Hvaŋą hvo Ninivə hu yɛ pɛli tɔɔi ɲowoɠaa la

¹² Ə́ wɔ kɔ́ taaɠaai kəlee kaa yɛ ɓolaa wulu, yii aa ɓa ɉa, ma heɛ ɉu kɛnɛ̨, ya lɔ ɓaa da ɉiɠi-ɉiɠiɓo wolo ɓo, da aa ma too kwəi kɛnɛ̨mun na.

¹³ Ə́ wɔ kɔ́kulááɠaai kaa lɔ a nɛ̨ąą, kpɛli kpɛli ə́ wɔ lɔi hu pələɠaa laaɓoɔi lɔ kpanągalan, ə́ yowoɠaa tɔwɔ, gbon gəlee aa lɛɛ a nwɔ̨n gɔ̨nɔ̨n, aa nwulukpiɛɠaa kəlee kələn.

¹⁴ 'Ya hee ə́ kwɛlɛ, daa mąątinɛ̨n ɉiɛ li a kɔ́; ə́ mąąkɔ̨nwɔ̨iɠaa nąą ta pɛlɛ mą, 'hvilɛn balayá hu, 'bɔlɔ tan, bɔlɔ kɔ́w kɛlɛ hɛn ɉəɠə.

¹⁵ Nąą ɓə nwɔ̨n gaa pai ə́ hu kalai laa, gɔ́ kɔ́ ɓɔwa yɛ ə́ paa laa, di kaa pai ə́ mįi, yɛ bələi peelə a hɛn mįi la. 'Ka ka ɲąąkpɔn yɛ ɉailonŋąą, 'ka ka ɲąąkpɔn yɛ peeləɠaa.

Nɔi hu nuą kəlee taɠa hiɛ ka

¹⁶ Ə́ wɔ lɔwɔ́tɔɔ nuąi tamąąi kɛ, di tɛɛ yələi pɛmɛ̨lɛ̨n gɔwɠaa diɛ; di kɛ yɛ peelə a kɛi koon.

¹⁷ Ə́ wɔ hɛɓɛ́ kɛ nuąi puɔ kɛ di kee mɛ̨i, yɛ peeləɠaa, ə́ wɔ ɲɛ̨itɔwɔ nuąi di ɓo yɛ kwɛ̨in gbulu, diɛ pɛlɛ gumunŋąą diɛ, a kwɛlɛ yələ; hvóló a kulɔ, gəlee diɛ di muhəɠə, ɓɛi di kaa lii laa, nu hvo nąą kɔ́lɔn.

¹⁸ Asiri tɔɔmun, ə́ wɔ ɲɛ̨i tɔwɔ nuąi kaa yii, ə́ wɔ kɔ́kulááɠaai di kaa lɔ kɛɛnąą tɔ̨nɔ̨, ə́ wɔ nuąi taɠa taɠaai ɲeeɠaa nwuɔ̨, nu hvo mą yii ə di lɛɠɛ di kee ɓa.

¹⁹ Gɔi a kala yɛ́, ɉali hvo mą, balaɠaai di kaa yɛ́, di hva pɛli kpɛɛi, nui lɔpee a ə́ mɛ̨i woo mɛ̨n, a ɲee lɔwa mɔ̨nɔ̨i tii naa ə́ mɛ̨i mąą mɛ̨nį ɓa, gwa gaa kpɔ tii, gbɛɛ kpɔ ɓə hvó mɛ̨nį ɲąąnwąnąą laa mą?