Nahumə 1 - Yálá laawoo hɛɓɛ (dc)1 Mɛ̨nįi di mo Ninivə taa laa mɛ̨i, mɛ̨nįi Yálá ə nɛ Ɛlkɔsə mun Nahumə ɓa, yili pɛ̨ɛ̨ ka. Yai-Laa kaa a Yálái nwɔ liihvoli ɲɔ̨nwɔ̨ɔ̨ kɛlaa nwɔ mɛ̨nį lɛlɛɛ 2 Yai-Laa kaa a Yálá tolɔɔ, yɛ nwąną kulɔ, nuąi da tɔɔ na, a nwąną kulɔ diɛ, Yai-Laa a nwąną kulɔ, nwɔ liiholii mąą ɲɔwuɔi, Yai-Laa a nwąną kulɔ gɔ́ yɔwɔɠaa diɛ, a nii hvoli ɲowoɠaa pɔ. 3 Tɛ̨ą li Yai-Laa liihvoli laa walaai, ɛlɛɛ, vaŋą kɛnɛ̨ɛ̨i, Kɛlaa, Yai-Laa hva mɛ̨nį ta lɛɛ laa hvo tɛɛ lɔ tii, a kɛ hiɛi tulɔ hvaŋą hu, yələi ə ɓo ɉuwu ɉuwu, gɔwɔ mu muluun gbala ka tii a tulɔ kpinįn. 4 A tómą gboloyá mɛ̨i, yili ə kpala, ə tɛɛ yaɠaa kpala. Basan da Karmɛlə da yohva, Liban lɔwɔ a yohva. 5 Yeeɠaa da kɛ kpɛlin ɉii ɲɛ̨i tɔwɔ, yee kpu kpuɠaa diɛ tɔɔ takpa takpa, lɔi a gaa, ɉu yɛ pu mą, yɛnɛ̨ɛ̨ pilɛɛ gee mɛ̨i da ɉu hee ɓo nuą kəlee. 6 Gbɛɛ ɓə a pɛli tɔɔi nwɔ liiholii ɲɛ̨i tɔwɔ? Nwɔ liiholii a mu həɠə, gbɛɛ ɓə a pɛli tɔɔi? Nwɔ liiholii hu a kɛnɛ̨ yɛ nwɔ̨n a too lɔwɔi, ə mą kɛ kwɛni kpɛa kpɛa ɓə, da kɛ ɓɛlai ɲɛ̨i tɔwɔ. 7 Yai-Laa nwɔ mɛ̨nį lɛlɛɛi, gaa a nu mąąkilɛi, laanɔ̨nwɔ̨ lɔwai, nuąi da di mąąkilɛ vaɠan mu, a gili lɛɛ di hu. 8 Ə mą kɛ ya hvɛɛ kaa tɛɛi, a daa kɔ́wɔ hvilɛn ɉɛnŋąą kulɔ, yɛ ɲowoɠaa pili kpinį hu. Ɉuda da Ninivə di wɔ wɛlɛɛ 9 Lə kiliŋąhiɛ ɓə kaa yɛ hvilɛn na Yai-Laa ɓa? Nwɛi a hɛn gəlee kulɔ a nwun, mɔ̨nɔ̨ hva kɛa pənə hvo həli kaa. 10 Mąąhɔlɔɓo, di kaa yɛ ɲąąlən gbɔlɔ pilɛɛ geehu, diɛ di kpələ, nɔɔ yɛ di hon, di kaa pai kələn ɉii kpɔ tɛ̨ɛ̨ tɛ̨ɛ̨ yɛ mɔ̨nun gbowo. 11 Nui kiliŋąhiɛ ɲɔ̨nwɔ̨ɔ̨ kaa mą yɛ hvilɛn Yai-Laa ɓa, aa kulɔ ə pɔɔli, Ninivə, yai tii mɛ̨nį ɲɔ̨nwɔ̨ɔ̨ kɛ kiliŋąhiɛ lɔ ɓə gaa mąi. 12 Mɛ̨nįi Yai-Laa kaa moi ya ka, yɛ diɛ: «Ə mą kɛ di kpulu ɲąąpɛliɛi, di hu kaa pai kalai, hvaa yɛ kpɛɛ. 13 Yiihu kɛa, diɛ̨i kɛ ə́ nwuɔ̨, ŋą́ą́ ɉəɠə laa, ŋą́ą́ ə́ wɔ yɔwɔnŋaai tee.» 14 Mɛ̨nįi Yai-Laa ka moi yɛ hvilɛn yɛ́ ya ka, yɛ: Ə́ laa hvo pai lɛɛi huwui lɔpee da ɓa, ə́ wɔ yáláɠaai hvɛli pɛlɛ́ mu, ɉaliɠaai di kaa laa a wulu mąą haɠaa, da yiiɠaai di di yɔw, gáá pai gəlee kpɛɛi laa; gáá ə́ kámą pɛlii, mąąhɔlɔɓo ə́ mu hvo wiɛ li. |