Mise 6 - Yálá laawoo hɛɓɛ (dc)Yálá aa nwɔ nuąi təli kiti haɠa ɓa 1 Mɛ̨nįi Yai-Laa kaa moi, ka ka wəli tɔɔ mą, yɛ: 'Ə́ muhəɠə, 'li ə́ kiti pɛlɛ ɲeeɠaa diɛ, yee kpu-kpuɠaa di ə́ woo mɛ̨n. 2 Ka ka wəli tɔɔ Yai-Laa nwɔ kiti wooi ɓa, yeeɠaa! Ɛlɛɛ, kaai a lɔi kɔ́wɔ hvilɛn gwɛni walawala, 'ka ka wəli tɔɔ! Vaai Yai-Laa da nwɔ nu huwui di lɔwai, ya ka: Da Israɛlə di kaa di woo hu kulɔi. 3 Nwɔ́ nu kan, lə wolo kpɔ ɓə ŋą́ gɛ a kaa? Lə mɛ̨nį kpɔ ɓə ŋą́ ka hviikpɛɛ ɉu? Ka nwóó pulu pənə. 4 A kɛ tii, ka kulɔi ŋį́ mo Eziptə lɔi hu, ya ɓə? Ka nwun mąąɓoi ŋį́ mo nuwɔ pɛ́lɛ́i tii mu, yili ɓə mɔ̨ɔ̨? Gɛ́ Moisə, Aarɔn da Miriamə di tɛɛ a ka tənən dɔɔ nuą, yili ɓə? 5 Yɛ́i a nwɔ́ nu huwu, ə́ kiliŋąhiɛ, mɛ̨nįi kɛ Moabə tɔɔmun Balakə kwəi yɛ hvilɛn na yɛ́ mą, ɛlɛɛ, bələi Beɔrə lon Balaamə ə nwoo pulu pənə la. Ə həɠə Sitimə, ə həli la Gilgalə, bələi Yai-Laa yee ə tɛɛ la ɲowoɠaa diɛ, ka káá pai gbaɠala kaai. 6 Lə kpɔ ɓə ɲə́i gɛ́ li tɔɔi la Yai-Laa lííla? Gɛ́ li pɛlɛi la yələkɔlɔ́n ɉu Yálá kɔ́wɔ mu? A kɛ tii, ŋą́ li bɔ a haláá hɛn da gəlee kələn? Ŋą́ li kan a kwɛlan dɔ̨nɔ̨ nįŋɛ̨ɠaa? 7 Yai-Laa kaa pai hvaai mą yɛ ɲee hee ɓɛlaa hilɛ waa tamąą mu? Wulɔ munuun damąą ɓə mɔ̨ɔ̨ ŋą́ gboloon naa nií la? Kulɔi ŋą́ mo nwoo mu, nąą pɛli hɛn maa mɔ̨ɔ̨ a nón ɉulɔnu tɔlɔɔ? Gɛ́ nwɔ́ nɛ̨ŋɛ̨nŋaai mąą kwələ kulɔ a gwə́i lon? 8 Ə kə hulɔnu! Mɛ̨nįi nɛlɛɛi, yii Yai-Laa kaa gwɛlii ə́ yəi, daa nɛ yɛ́, hɛn da kpɛli hvəi, túwɔ́ a tɛ̨ą kpaalə, lɛɛ nwoo pulu laa wɛli la kɛ, kɛ gili-gili yɛ́ ka Yálá ka lɔwai mɛ̨nį hu, Yálá kaa hvulu nuą da wɛa nuą hutɔɔi 9 Yai-Laa kaa húú pilii daa ɓa; nuąi da ɲɔw naa ɓa, gaa pai di ɓaloi, «Nɔi lonnii, da kaai ɲąąkpɔn ɉu, 'ka ka wəli tɔɔ! 10 Wɛa nuą! Ŋą́ pɛli mɔ̨ɔ̨ níílaai hvulu hɛn gɔwɠaa mu? Da ɉɛn gɔwɔn gəgən tii daa da kulɔ mą ə ɓo a nɛ̨ŋɛ̨n naa? 11 Ŋą́ mɔ̨ɔ̨ pɛli kɛi diɛ; mɛ̨nį hvo hvulu hɛn gɔwɔn ɉɛnŋąą diɛ? A ɓíi naahvɛɛ a hulu hɛn? 12 Daai ŋɛ̨i hu hɛn gɔw nąmįną kaa lɔ wea mɛ̨nįɠaa hu, ɉu nuą diɛ mɛ̨nį ɓo a nu ɓowo pələ. 13 Yili mąą mɛ̨nį ɓa, ŋą́ ɲɔ́n bili ə́ hu, a ə́ kɛlɛ pələ, da ə́ huwolo pələ ɲə́i, ə́ wɔ nɛ̨ŋɛ̨nŋaai mąą mɛ̨nį ɓa. 14 Yɛ́, ə́ kaa pai kɔ̨nɔ̨n mįi, hva pilɛi, pulu kaa pai ɉeei kulɔi nɔi hu, ə́ kaa pai kɛi hɛn naai ə́ kwɛlɛ, Kɛlaa hva pɛli naa hɔ́n moi, yii ə́ kaa pai naa hɔ́n moi, ŋą́ gɛ a kɔ́ kɔ́ ɓɔwa kɔ̨nɔ̨n. 15 Ə́ kaa pai kɛɛ hin ɉii, hva mɔ̨nun dee; ə́ kaa pai kɛi tow kɛi, hva ə́ mąątí wulɔ hɔlɔɓo. Yɛ́ kələ hɔɔ, hva nɔɔ kpələ. 16 Omri nwɔ tɔ́nŋaai ɓə ə́ yee kaa mą, da Akabə yəi bɛlɛ́n ɲii pələɠaa kəlee, bələi da ka tí la, bələ ɓə ka hiɛ la, yili mąą mɛ̨nį ɓa, gáá pai ɲɔw pilii nɔi hu, yɛ nɔi hu nuą mąą kpɛlin, gɛ́ di kɛ a yɛlɛ kulɔ ɉu hɛn, nwɔ́ nu huwuɠaai wɛli aa kpɛɛ mą́ą́ kpɔ tɛ́-tɛ́.» |