Mise 5 - Yálá laawoo hɛɓɛ (dc)

Bɛtleɛmə tɔɔmun gaa taa

¹ Ɛlɛɛ yɛ́, Bɛtleɛmə Ɛfrata, yɛ́i hvó a taa lon Ɉuda taaɠaa lɔwai, ə́ kwəi ɓə Israɛlə ɲąąwooɓomun, gaa pai kulɔi laa, a nwɔ́ nui; yai kpala tɔɔi hvo mą.

² Yili ɓə pai gɛi, Yai-Laa yɛ pa ɲee kulɔi di mu, ə lɛɛ ɉu, nɛ̨ɛ̨nui mąąnɛ̨ɛ̨ ə non tii kaa, ŋą lon tii kaa yələ yɛ ɉəli. Nąąlɔwai, nąn nonnii yiiɠaai pai lɛɛi, di kaa pai pənəi di laŋąn Israɛlə lonnii diɛ.

³ Gaa pai kɛi tɔɔni yɛ nwɔ taatɛlɛɛ kpului ɲąąkɔn, a Yai-Laa nwɔ huwalawalalaa, a nwɔ Yálái Yai-Laa nwɔ mąąwiɛ, di kaa pai heei diɛ həli lɔi kpon ɉeei, di kpulu hu kɛnɛ̨ pələ ɓa.

⁴ Yaa kpinįi tii, gaa pai kɛi a liilaa, Ɲələi lɔpee Asiri a həɠə yɛ kɛ gaa pilii la ku wɔ lɔi hu, yɛ gɔwɔ hvilɛn ku wɔ tɔɔ pɛlɛ́ɠaai mu, kwa taatɛlɛɛ pulu nuą mɛ̨ihveelɛ ɲąątɔɔi mą, da ɲąąwooɓo kɛ nuą mɛ̨ihaaɓa.

⁵ Di kaa pai Asiri ɲąąkɔn ɉii a kɔ́ kɔ́ ɓɔwa, diɛ Nɛmrɔdə nwɔ lɔi ɲąąkɔn a ɓɔwa kwɛa, kɛlaa nwɛi, gaa pai ku kulɔi Asiri yəi; yili a tɔɔ yɛ pili ku wɔ lɔi hu, yɛ gɔwɔ ɓɔlɔn ku ɲɛ̨n ɉu.

Nuąi kulɔ gɔ́ hu daa di taɠa taɠa lɔiɠaa hu

⁶ Mąą yələi tii, Ɉakɔbə nu kpəli woloi pai lɛɛi, gaa pai kɛi lɔi tamąą hu, yɛ nɛ̨nɲai a həɠə Yai-Laa pɔ, yɛ luwu-luwui a hee kala tiliin ɲą, gili hvo tɔɔ li nu ɓa, ɲɛ̨i hvo nu kan ɲəi hɛn da tɔwɔ.

⁷ Nąąlɔwai, Ɉakɔbə nu kpəli woloi pai lɛɛi, gaa pai kɛi lɔiɠaa hu, nu huwu tamąą lɔwai, yɛ yala, lɔwɔ huwɔɠaa lɔwai, yɛ yala lon, ɓɛlaa kpulu lɔwai, dɛɛ pələ tɛitɛi, a ɓɔlɔ́n di mɛ̨i, yɛ di hon ɛlɛɛ nu hva hɔlɔɓo, yɛ di kulɔ ɲəi.

Ɓɛi Israɛlə ə kɛi gilitɔɔ laa a ɲɔ̨nwɔ̨ɔ̨

⁸ Ə́ yee pili ə́ yowoɠaa diɛ, nuąi da tɔɔ ə́ la, gəlee paa.

⁹ Yai-Laa yɛ, mɛ̨nįi pai kɛi a mąą yələi tii, ya ka: «Gáá pai ə́ wɔ hooɠaai kulɔi nɔi hu, gɛ́ ə́ nwɔ kɔ́-wotoloɠaai hukala.

¹⁰ Gáá pai nɔi hu taa kpɛa kpɛa woloi, gɛ́ ə́ mąą kɔ́nwɔ̨ taaɠaa kəlee pu,

¹¹ gɛ́ ə́ wɔ tɔlikpɛ mɛ̨nįɠaa kulɔ ə́ yee pɔ, ɲɛ̨ąkpɛmun va kɛa kɛ ə́ yəi,

¹² ɉali mąą nįnįnŋaa da ɉali kɔ́iɠaa, ŋą́ di kpɛɛ nɔi hu, ɉɛn ə́ bɛli a ə́ yee, hvá kɛa pənə yɛ́ pɛlɛ nií la.

¹³ Gáá pai ɉaláá wuluɠaa kəlee kulɔi ə́ pɔɔli, gɛ́ ə́ wɔ taaɠaai pu.

¹⁴ Nɔiɠaai kpɔ tii di hvo tí mą́ą́, gáá pai nwą́ną kulɔi diɛ, a liihvoli, da lii kələn gwəi.»