Mise 4 - Yálá laawoo hɛɓɛ (dc)

Ɉerusalɛmə liiláá taa

¹ Yələ ta kaa pai ɉəlii, tinąą, hvəlaan, Ɲeei tii Yai-Laa nwɔ pɛ́lɛ́i tɔɔ mɛ̨i, gaa pai kɛi tɔɔni yeeɠaa kəlee nwun mɛ̨i, nwun yɛ lan yee kpu kpuɠaa kəlee mɛ̨i, nu kpulu kaa pai kɛi pai laa.

² Lɔi tamąą kaa pai nąą hiɛ həɠəi, diɛ kɛ diɛ: 'Ka pa gu tɛ Yai-Laa nwɔ Yeei nwuɔ̨, Ɉakɔbə nwɔ Yálái yəi bɛlɛ́n, gaa pai nwɔ pələɠaai lɛi guɔ, guɔ hiɛ nwɔ pələɠaai mɛ̨i, mąąhɔlɔɓo, Siɔn ɓə kili mɛ̨nį a kulɔ laa, Ɉerusalɛmə ɓə Yai-Laa woo a kulɔ laa.

³ Ya ɓə pai kɛi a lɔi tamąą lɔwai kiti teemun, lɔi kpɛa kpɛa lɔwai mɛ̨nį ɓomun, ə mą kɛ yiiɠaai kwɛa la. Di kaa pai kɛi di wɔ kɔ́ kɔ́ ɓɔwaɠaa yɔwii a kaliɠaa, diɛ di wɔ kpalaɠaai yɔwu a mɔ̨nun dee ɓɔwaɠaa. Lɔi ta hva kɛa pɛlɛ mɛlan nɔi ɓa a kɔ́, di hva kɛa di mąą kwɛli kɔ́ kɔ́wɔ ɓa.

⁴ Nu kəlee kaa pai lɛɛi nwɔ hihɛnŋąą kwɛlɛ, ɛlɛɛ, nu ta hva di hviikpɛɛ, mąąhɔlɔɓo, Yai-Laa Mɛ̨nį Kəlee ŋą Hééɓomun ɓə ə kulɔ na.

⁵ Akɛ hį́i takpɛliɠaa da kɛ hiɛi di wɔ haliɠaai laa hu, ku wɛi kwa hiɛ Yai-Laa ku wɔ Yálái laa hu, a yələ kəlee da nwɔɔ.

Yai-Laa kaa a Tɔɔmun Ɉerusalɛmə

⁶ Mąą yələi tii, yiiɠaai kpɔ da too di kɔ́wɔ mɛ̨i, ŋą di ɲąąkpɔn; yiiɠaai di taɠa taɠaa, ŋą́ di mąą lɛɠɛ di kee ɓa, a diɛi tii ŋą́ di laanɔ̨nwɔ̨ ɓoi. Yai-Laa woo li!

⁷ Yiiɠaai da too di kɔ́wɔ mɛ̨i, diɛ ɓə ŋą́ di lɛɠɛ di kee ɓa, ŋą́ di kɛ a nu huwu kpəli, yiiɠaai kwɛa la, ŋą́ di kɛ a nu huwu huwalawala, Yai-Laa yɛ tɔɔlaa kɛ di mɛ̨i Siɔn yee nwuɔ̨, ə həɠə yiihu ɓa ə lɛɛ la ɉu wɔ.

⁸ Ɛlɛɛ, yɛ́i ɓaa daatɛlɛɛ mąąkpɛmun ɉee pɛlɛ́, Siɔn nɛ̨ɛ̨gbɛla nwɔ yeei, dɔɔi tii wɔlɔ kɛ ə́ yə́i, a pənə ə pa ə́ pɔ, a dɔɔlaai tii bɛ̨ɛ̨ Ɉerusalɛmə nɛ̨ɛ̨gbɛla nwuɔ̨i.

Ɉerusalɛmə nwɔ mɔ̨nɔ̨ da nwun mąąɓo mɛ̨nį

⁹ Lə ɓə kɛ yai ə́ kaa tómąi yiihu? Tɔɔmun və kɛa ə́ pɔɔli? Ə́ liɛwoo ɓomun aa pili? Yai ə́ kaa mɔ̨nɔ̨ mįi la? Yɛ nɛ̨ɛ̨nui kwəinwąną kɛi?

¹⁰ Siɔn nɛ̨ɛ̨gbɛla! 'Kpɛlaan a mɔ̨nɔ̨, ə́ gbóó təli, yɛ nɛ̨ɛ̨nui kwəinwąną kɛi. Mąąhɔlɔɓo, ə́ kulɔ hiɛ li taai, yɛ́ li lɛɛi lɔwɔ ɓa, ə́ kaa pai lii kpɔ Babilonə, di kaa pai ə́ nwun mąąɓoi laa; nąą ɓə Yai-Laa kaa pai ə́ kulɔi laa ə́ yowoɠaa yəi.

¹¹ Kɛlaa yiihu, lɔi tamąą daa di muhəɠə yɛ́ a kɔ́, di kaa kɛi diɛ: «Siɔn ɓɛlɛ ə too, ə too kpɔ, ku ɲɛ̨i kɔ́w ə nąą kaa!»

¹² Kɛlaa di hvo Yai-Laa kwəi kɔ́lɔn, mɛ̨nįɠaai gaa giliŋąhiɛi mą, di hvo gbaɠala kaai; gbaɠala hvo diɛ, diɛ kɛ: aa di ɲąąkpɔn yɛ mɔ̨nun gɔnŋąą, mɔ̨nun dan ɉii.

¹³ 'Ə́ muhəɠə, 'mɔ̨nun dan Siɔn nɛ̨ɛ̨gbɛla, gáá pai ə́ mįnɛ̨ɠaa kɛi a kwɛli, gɛ́ ə́ kɔ́wɔɠaa kɛ yɛ kwɛli kpɔlu, ə́ kaa pai lɔi tamąą kiin-giin ɉii, ɉɛn ə́ pai ɉon ɉii a kɔ́, yɛ́ gulɔ Yai-Laa ɓa a haláá, yɛ́ di yəi hɛngɔwɠaa kɛ a Yai-Laa kɔ́ hɛn.

¹⁴ Yiihu, ə́ mąą ɓɛla, kɔ́kuláá nɛ̨ɛ̨gbɛla, daa kɔlaɠa tinɛ̨n guɔ, daa Israɛlə hutɔɔmun gɛlɛ gumɔ̨ ɓa a gbɔ́n.