Mise 3 - Yálá laawoo hɛɓɛ (dc)

Ɲąąwooɓo ɲɔ̨nwɔ̨ɔ̨ kɛ nuą

¹ Ya ɓə ŋą́ kɛ kaa: 'Ka ka wəli tɔɔ! Ɉakɔbə nwɔ pɛ́lɛ́i ɲąąwooɓo nuą; Israɛlə nwɔ pɛ́lɛ́i mɛ̨i kaa nuą. Kaamun və kɛ mąąnɛ̨ɛ̨ ka tɛ̨ą kɔ́lɔn?

² A kaa ŋɛ̨i, mɛ̨nį lɛlɛɛ wɛli kpɛɛ kaa, kaa mɛ̨nį ɲɔ̨nwɔ̨ɔ̨ wɛlilakɛ, kaa nuą kɔ́lɔɓo, kaa di luwu kalaan di kɔ́w ɓa.

³ Nuąi da kɛ nwɔ́ nu huwui kɔ́lɔɓoi, diɛ di huwɔ mįi, diɛ di kɔ́wɠaa hu yali yali, diɛ di huwɔ tee yɛ da kɛi pa ɲilii, yɛ huwɔi di pai bui ləɠii.

⁴ Ɓɛlɔwai di kaa pai tómąi la Yai-Laa pɔ pələ, gaa pai ɲɛ̨ilaai looi diɛ, hvo pai di woo mu hon ɉii, nɛ̨ŋɛ̨nŋąąi di ɉəɠə mąą mɛ̨nį ɓa.

Yálá kwəi mɛ̨nį hukulɔ nuąi da Israɛlə ɓowo

⁵ Nwooi Yai-Laa ə mo yɛ hvilɛn na, nuąi da nwɔ nuąi ɓowo diɛ, ya ka, yɛ diɛ: Gbɛɛ ɓə nwɔ́ nuąi ɓowoi? Nuąi da kɔ̨nɔ̨n dɛɛ di pɔ, da liilaa wɛlɛɛ laa həli diɛ. Kɛlaa nuąi di hva di kɔ́, da kɔ́ muhəɠə yiliɠaai ɓa.

⁶ Yili mąą mɛ̨nį ɓa, kpinį aa pɛlɛ ka mɛ̨i, ka hva kɛa kɛɛ kaa, tɛɛ́-hilɛ kpinį a pɛlɛ ka mɛ̨i, ka hva kɛa Yálá kwəi mɛ̨nį mɛ̨n, tulɔ kpinį kaa pai pɛlɛi Yálá kwə́i mɛ̨nį hukulɔ nuą mɛ̨i, da lɛɛ kpinį yəi.

⁷ Nwumɛ̨ aa tɛ a gwɛlɛɛn gɛɛ kaa nuą, dɔlukpɛ nuą hu aa pu diɛ, di kəlee di kaa pai di yee pɛlɛi di ɲɛ̨i, mąąhɔlɔɓo, Yálá hvo di woo mu hon ni.

⁸ Kɛlaa nwɛ́i Yai-Laa nwɔ Kilii haalai gáá pin, ɉúwalawalaa, a tələnmolaa da lii kpələ, gɛ́ pɛli Ɉakɔbə nwɔ kulɔ nwoo mu laai lɛi mą, gɛ́ Israɛlə nwɔ nɛ̨ŋɛ̨n hukulɔ mą.

Di kaa pai Ɉerusalɛmə woloi

⁹ Ka ka wə́li tɔɔ mɛ̨nįi ŋɛ̨i ɓa, Ɉakɔbə nwɔ pɛ́lɛ́i ɲąąwooɓo nuą, Israɛlə nwɔ pɛ́lɛ́i ɲɛ̨itɔwɔ nuą, a kaai ŋɛ̨i tɛ̨ą wɛli kpɛɛ kaai, kaa mɛ̨nį haŋąą kəlee kpɛlaan.

¹⁰ A Siɔn tɔɔi ka káá moi ɲąmą hu, kaa Ɉerusalɛmə tɔɔ nɛ̨ŋɛ̨n mɛ̨i.

¹¹ Ɲɛ̨itɔwɔ nuą, da kiti tee a hvulu, mąąhɔlɔɓo, da nɔ gwəi hɛn ɉon, ɉaláá laa həli nuą, da nu mąąkwɛli, a tɔ̨nɔ̨ hɔlɔɓo pələ, Yálá kwəi mɛ̨nį hukulɔ nuą, diɛ mɛ̨nį hukulɔ nuą diɛ, wali ɓa, ɛlɛɛ, Yai-Laa ɓə di kilitɔɔ mą, diɛ kɛ diɛ: «Yai-Laa hvo mɔ̨ɔ̨ ku lɔwai? Lɛɛ li, mɛ̨nį ɲąąnwąnąą hva pɛli ku hɔlɔɓoi.»

¹² Yili mąą mɛ̨nį ɓa ɛlɛɛ nwɔ̨nɔ̨, ka mąą mɛ̨nį ɓa, di kaa pai Siɔn hin ɉii yɛ tíi, Ɉerusalɛmə yɛ lɛɛ a pɛlɛ́ kpoloon buɔ ɉimįnín ma, ɛlɛɛ, ɲeei tii Yálá hee pɛlɛ́ tɔɔ mɛ̨i, kala kpili yɛ tɛ mą.