Mise 1 - Yálá laawoo hɛɓɛ (dc)

Yai-Laa ə haŋą Israɛlə da Ɉuda diɛ

¹ Nwooi Yai-Laa ə mo Morɛsɛtə mun Mise ɓa, a Yotamə da Akazə, ɛlɛɛ Ezekiasə, Ɉuda tɔɔɓɛlaa di wɔ tɔɔlaa yələi; gɛɛi ə gaa yɛ hvilɛn na Samari da Ɉerusalɛmə diɛ, ya ka:

² Yɛ diɛ: Hį́i kəlee, 'ka ka wəli tɔɔ! Lɔi, ə pɛlɛ ɉu hɛnŋąą diɛ, aa həli kaa! Nąmu Yálá kaa bɔ ə ka hɔn mo! Yai-Laa, yaa tii nwɔ pɛlɛ́ mąąhəɠɛɛ mui.

³ Yai-Laa kaa kulɔi ɲəi bɛlɛ́n yɛ yɛɛ, gaa hiɛi yɛnɛ̨ɛ̨ hɛnŋąą nwun mɛ̨i.

⁴ Yeeɠaa diɛ həɠeen gɔwɔ mu. Yee lɔwai lɔiɠaa diɛ həɠeen, yɛ da nwɔ̨n ɉee kwɛ̨in gban ma. Yɛ da yá pu kɛɛnąą hviən ŋąą ɓa.

⁵ Yili ə kɛ tii a Ɉakɔbə nwɔ kulɔ nwoo mu laa laa pɔɔ, a Israɛlə nwɔ pɛ́lɛ́i nwɔ nɛ̨ŋɛ̨nŋaa laa pɔɔ. Ɉakɔbə nwɔ kulɔ nwoo mu ɓaa a lə? Samari hvəi? Ɉuda nwɔ haliɠaai kɔ́i ɓaa a mį? Ɉerusalɛmə hvəi?

⁶ Gáá pai Samari kɛi a kpomói daa nɛɛ gbɔwɔ ɓa, a tíi kɛ lɔi. Ŋą́ nwɔ kwɛniɠaai kiliɠilin, ŋį́ bili ɓoloon ɉu. Gwɛniɠaai daa hvilɛn ŋąą mɛ̨i, ŋį́ di kulɔ nɔi mu, ŋį́ di pu pɔ̨nɔ̨ ŋą.

⁷ Ɉali mąą nįnįnŋaai kpɔ daai, gəlee hu a yali yali. Ɉɔlɔɓo hɛn gəlee a lɛɛ a nwɔ̨n gɔ̨nɔ̨n, ŋą́ nwɔ haliɠaai kəlee wolo-wolo. Mąąhɔlɔɓo, di di tiɛ̨ gee mɛ̨i, a wɛlikɛ nɛ̨ąą yəi wali. Di kaa pai pənəi di kɛ a wɛlikɛ nɛ̨ąą hvɛla.

Yálá kwəi mɛ̨nį hukulɔ mun nwɔ woolaa

⁸ Yili mąą mɛ̨nį ɓa, gáá wɔlɔi, gɛ́ gbóó təli! Gɛ́ hiɛ a gbúwúlú, kɔ́lɔ hvó gɔ́wɔ́ ŋą. Gɛ́ haa mɛ̨i wələ too, yɛ húluúɠaa da kɛi wɔlɔ, gɛ́ nwóólaa, yɛ wɔ́lɔ́ nwɛ̨ni.

⁹ A tɛ̨ą, gɛ́lɛ́i daa mo, ɉali hvo mą. Ɉimą aa Ɉuda kulɔ, yɛ həli kpɔ nwɔ́ nu huwui kəlee ɓa, yɛ həli kpɔ la Ɉerusalɛmə ɓa.

¹⁰ 'Ka hvo noloɓo Gatə, 'ka wɔlɔ Bɛtə-Leafra, 'ka kiliɠilin muluun ɉu.

¹¹ Safirə nɛ̨ɛ̨nu, tɛɛ a ə́ kpuwulu, a nwumɛ̨ kɛnɛ̨. Saanan nɛ̨ɛ̨nu hva kɛa kulɔ yɛnɛ̨ɛ̨. Di kaa di woolaai Bɛtə-Esɛlə, daa kpɔnmąą kəlee kulɔ ka yəi.

¹² Ɲɔ̨n Marotə nɛ̨ɛ̨nu kaa gɛi, nwalawalaai mą, a neelee, mɛ̨nį ɲąąnwąnąą aa həɠə Yai-Laa pɔɔli, aa yɛɛ Ɉerusalɛmə gbon ma.

¹³ Lakisə nɛ̨ɛ̨nu, ɉooɠaa kpulɔn nwotolo ɓa; nąą ɓə Siɔn nɛ̨ɛ̨gbɛla nwɔ nɛ̨ŋɛ̨n kpala ə tɔɔlaa. Mąąhɔlɔɓo, ə́ pɔɔli ɓə Israɛlə ə nwɔ kulɔ nwoo mu laa kɛ laa.

¹⁴ Yili mąą mɛ̨nį ɓa, ɉilɛtaai taɠa hɛɓɛ́ pɛ̨ɛ̨, ə́ dɛɛ Morɛsɛtə-Gatə pɔ, Akzivə pɛlɛ́ɠaa kaa pai kɛi a Israɛlə tɔɔɓɛlaa ɓowo hɛn.

¹⁵ Gáá nwɔ̨nɔ̨ pai pənəi ŋą kɔ́ kúláa ɲąątɔɔ yɛ́, Maresa nɛ̨ɛ̨nu. Ɉɛn kɛi mąąwiɛ kɛ Israɛlə ɓa, gaa pai lii kpɔ Adulamə.

¹⁶ 'Ə́ nwun bu, 'ə́ nwun galaan, ə́ wɛlikɛmąą lonnii mąą mɛ̨nį ɓa. 'Ə nwun gbəlaan mo, mąąhɔlɔɓo, daa di kulɔ yɛ́, diɛ li a diɛ kwɛaala luwɔlaa hu.