M̀ɛni-lɛɛi 9 - Yálá laawoo hɛɓɛ (dc)

¹ Malaka nɔɔlinąą ə nwɔ tului hvɛɛ: Ŋą́ pɛmɛ̨lɛ̨n-gɔw ta kaa, ə kpuluun yɛ həɠə yələi yɛ pa tooi nɔi mɛ̨i. Ɛlɛɛ, di nowa kpon ɉu gwea gwɛli tɛɛ bɔ.

² Ə nowa kpon gweaa laa ɓo, ɛlɛɛ, lulu ta yɛ kulɔ laa, yɛ hulun gɛnɛ̨ ta hu lulu. Ə́ vóló hu tɛɠi, ɛlɛɛ da hvaŋą.

³ Peeləɠaa di kulɔ nului tii hu, di pɛlɛ lɔi mɛ̨i nąą kəlee. Di hvaŋą ta tɛɛ di pɔ, yɛ ɲɔ̨n-gaaləɠaai lɔi mɛ̨i.

⁴ Di tɔn dɔɔ diɛ, di hvo kɛ di kaa mɛ̨nį ɲɔ̨n gɛi a kala tɛlinŋaai lɔi mɛ̨i, da wulu, ə mą kɛ, hihɛn nɔpee ta, kɛlaa, ə kulɔ lɔ nuąi tii Yálá kɔ́lɔn ɉii hvo kɛ di tɔwɔla.

⁵ Di tɔn dɔɔ diɛ, diɛ mą, di hvo di paa, kɛlaa, di di mɔ̨nɔ̨ɓo ɲąnįn nɔɔli yee mu. Ɛlɛɛ, mɔ̨nɔ̨i da naa nuą diɛ, nwąną pələ a kɛ yɛ, ɲɔ̨n-gaalə a nu ɓon.

⁶ Mąą yələɠaa tii hu, nu kanŋaa da kɛ haa kwɛlii, di hva gaa. Haa wɛli a kɛ diɛ, ɛlɛɛ, haa yɛ pu di tɔwɔ.

⁷ Beeləɠaa tii di kɛ yɛ da kɔ́-kɔ-hoo mąąyili yɛ li kɔ ɓa, ə kɛ yɛ hɛni ɓɔlɔ a kɛ di nwuɔ̨, ɛlɛɛ, di ɲɛ̨ilaiɠaa di ɓo yɛ nu kan.

⁸ Di nwun nɛɠa ə ɓo yɛ nɛ̨ɛ̨nu nwun nɛɠa, ɛlɛɛ, di ɲin ə ɓo yɛ yala ɲin.

⁹ Ə ɓo yɛ di kəŋə a kɛ a kwɛli-kpəlee, ɛlɛɛ, di koon ɉu tin ə ɓo yɛ wotolo tamąąi hooɠaa kaa ɲalai, diɛ li la kɔ́ mɛ̨i.

¹⁰ Di won ə ɓo diɛ, yɛ ɲɔ̨ngaaləɠaa, dəli ə ɓo mą, di wonŋaa tii hu ɓə, di hvaŋą kaa laa, diɛ nu kanŋaa mɔ̨nɔ̨ɓo la ɲąnįn nɔɔli yee mu.

¹¹ Di nwun nąmui kɛ diɛ, ya ɓaa a nowa kpon ɉu gweaa malakai da kɛ mą Hebreu woo hu: Abadɔn, ɛlɛɛ, Grɛkə woo hu di kɛ mą: Apɔliɔn. (Naai tii mukulaa ɓaa: «Kɛɛ kalamun»).

¹² Mɛ̨nį ɲąąnwąnąą dɔlɔɔ aa tɛɛ, mɛ̨nį ɲąąnwąnąą hveelɛ ka ŋɛ̨i nwɔ̨nɔ̨ pai.

¹³ Malaka mɛ̨idanąą ə nwɔ tului hvɛɛ, ŋą́ woo ta mɛ̨n yɛ həɠə ɉaláá kulɔi tii kɛ a hɛni Yálá lííla, mįnɛ̨ɠaa hu.

¹⁴ Yɛ kɛ mąlaka mɛ̨idanąą tii dulu hvɛɛ mą: «Malaka nąąn tii di yiliɛ a ɲɔwɔn Eufratə ɲálee kɛnɛ̨ kwɛlɛ, di hvoloon.»

¹⁵ Di Malaka nąąn tii hvoloon, a diɛi kɛ, di hąą yiliɛ kpɔlɔɔ kɛ, a nɛɛlɛi tii, a ɲələi tii, a ɲąnįn tii, ɛlɛɛ a gwɛlan tii mąą mɛ̨nį ɓa; yai di kɛli pa, yɛnɛ̨ɛ̨ nu kanŋaa ɓɛlaɓoɔ ɉu hvaaɓa, bələ tɔ̨nɔ̨ nwun na pilii la.

¹⁶ Ɉoo mɛ̨i nuą lononŋąą ə kɛ a nu waa nwun gwala-kpala heei hveelɛ. Di lonoi di mo, yili ɓə ŋį́ mɛ̨n.

¹⁷ Bələi ɉooɠaa da ɉoo mɛ̨i nuąi, ɲɛ̨́i ə di kaa, gbɛlɛɛn gɛɛi hui, bələ ka: Di kəŋə mɛ̨i kpulɔɔ kɛ a nwɔ̨n, daɠaa kpɔluɔ, daɠaa mutɛɠiɛ, daɠaa ɓáhiɓoɔ. Ɉooɠaa nwun ganin ə kɛ yɛ yala nwun, ɛlɛɛ diɛ ɓáɠi a nwɔ̨n, a lulu, ɛlɛɛ a máhiɓoɔ.

¹⁸ Mɛ̨nį ɲąąnwąnąą haaɓai tii, nwɔ̨n, lulu da lulu ɓáhiɓoɔ, yai di kɛli ɓáɠi la, yili ɓə yɛnɛ̨ɛ̨ nu kan ɓɛlaɓoɔ ɉu haaɓa bələ tɔ̨nɔ̨ nwun na pili.

¹⁹ Mąąhɔlɔɓo, ɉooɠaa di hvaŋą ə kɛ di la, da di won ɉu. Yaan di won ə kɛ yɛ kaalə, di nwun ganįn ə ɓo di ɲą, ɛlɛɛ, yili ɓə di kɛli nu kanŋaa mɔ̨nɔ̨ɓo la.

²⁰ Yii ɓaa nu kan gbəli, a diɛi di hvo haa li mɛ̨nį ɲąąnwąnąąɠaa tii hu, di hvo gɛ di hvo di yee kulɔ di wɔɔ tuwɔ pələ ɲɔ̨nŋaa hu, di kɛli lɔ kwɛli hvilɛn ɲįnɛ̨nŋaa diɛ, haliɠaa diɛ, diɛi a hɛni, a wali-kwɛli, a ɓala-kwɛli, a kwɛnį, awala kɛ tii, a wulu; diɛi di hva kɛɛ kaa, di hva mɛ̨nį mɛ̨n, di hva hiɛ.

²¹ Nuą tii di hvo gɛ, di hvo kpɛla, nu paa ɓa, di wɔɔ wulu mɛ̨nįɠaa, di wɔɔ wɛlikɛɛ, ə mą kɛ, di wɔɔ nwuɔ̨ kɛ mɛ̨nįɠaa.