M̀ɛni-lɛɛi 8 - Yálá laawoo hɛɓɛ (dc)

Gɔlɔn ɉɛn mɛ̨ihveelɛ nąą holoon mɛ̨nį

¹ Ɓɛlɔwai di gɔlɔn ɉɛn mɛ̨ihveelɛ nąą holoon na, kɛɛ mąą ə haa kpɔ tin yələkɔlɔn ɉu, lɛɛlɛ kpulɔ yee mu.

² Ɛlɛɛ, ŋą́ ɲɛ̨́i hee, malaka mɛ̨ihveelɛi kɛ tɔɔni Yálá lííla, ŋą́ di kaa. Di tulu mɛ̨ihveelɛ tɛɛ di pɔ.

³ Malaka takpɛli ə pa, ə tɔɔ ɉaláá kulɔi kwɛlɛ. Lansan kələn ɉɛn yɛ ɓo ɲəi a hɛni, ɛlɛɛ, di wulɔ kun-nɛ̨ɛ̨ tɛɛ bɔ kpɔ kɛnɛ̨, əgɛ, ə gulɔ a haláá ə bɛlɛ nu mąąhəɠɛɛɠaa di wɔɔ hvɛli wooɠaa diɛ, ɉaláá kulɔi tii ɓa, yai a hɛni, ə ɓo dɔɔkpəlin níílai.

⁴ Ɛlɛɛ, nwulɔ kun-nɛ̨ɛ̨i tii nulu yɛ həɠə malakai yee ɲą, yɛ tɛ Yálá liila, ə pɛlɛ la nu mąąhəɠɛɛɠaa di wɔɔ hvɛli wooɠaa diɛ.

⁵ Malaka ə lansan kələn ɉɛn tii həɠə, ə nwɔ̨n ɉəɠə ɉaláá kulɔi ə naahvɛɛ la, ɛlɛɛ, ə bili lɔi mɛ̨i, ə kɛ a yələgbąnąą, a wooɠaa, a mąnąmąnąɠaa, da lɔi kpɛlinŋąą.

Tulu mɛ̨ida

⁶ Malaka mɛ̨ihveelɛi tii dulu mɛ̨ihveelɛ ə kɛ di yəi, di di hɛ̨ą yili, diɛ kɛ kɛa di vɛɛ.

⁷ Malaka dɔlɔɔ ə nwɔ tului hvɛɛ, hanwon da nwɔ̨n ɉumoɔ a ɲąmą, di pu lɔi mɛ̨i, lɔi ɓɛlaɓoɔ ɉu haaɓa, bələ tɔ̨nɔ̨ ə kələn, nwuluɠaa ɓɛlaɓoɔ ɉu haaɓa bələ tɔ̨nɔ̨ ə kələn, ɛlɛɛ, wɛlaɠaa di kələn.

⁸ Malaka veelɛnąą ə nwɔ tului hvɛɛ, ə kɛ lɔ yɛ, yee kɛnɛ̨ ta, aa kɛi li pui gboloyá hu.

⁹ Nɔ̨ɔ̨-nɔ̨ɔ̨ hɛnŋaai gboloyá hu, mɛlaɓoɔ ɉu haaɓa bələ tɔ̨nɔ̨, ə haa, ɛlɛɛ, ɲá-ɲą kələn gbɛakpɛaai, mɛlaɓoɔ ɉu haaɓa, bələ tɔ̨nɔ̨ ə kala.

¹⁰ Malaka ɉaaɓanąn ə nwɔ tului hvɛɛ, ɛlɛɛ, pɛmɛ̨lɛ̨n-gɔw kɛnɛ̨ ta ə kɛ yələi pələ, ə too, yɛ kələn yɛ kpalan. Ə too, ɲá kpɛa-kpɛaɠaa mɛlaɓoɔ ɉu haaɓa, bələ tɔ̨nɔ̨ mɛ̨i, ɛlɛɛ da ɲá nwun gulɔiɠaa.

¹¹ Bɛmɛ̨lɛ̨n-gɔwi tii laa ɓaa: Pilimąą. Yáɠaa ɓɛlaɓoɔ ɉu haaɓa bələ tɔ̨nɔ̨, ə kɛ a pilimąą, nu tamąą di haa, ɲáɠaa kɛi ə mo a pilimąą, mąą mɛ̨nį ɓa.

¹² Malaka nąąn nąą ə nwɔ tului hvɛɛ, hvóló ɓɛlaɓoɔ ɉu haaɓa, bələ tɔ̨nɔ̨; ɲąnįn ɓɛlaɓoɔ ɉu haaɓa, bələ tɔ̨nɔ̨, da pɛmɛ̨lɛ̨n-gɔwɠaa ɓɛlaɓoɔ ɉu haaɓa, bələ tɔ̨nɔ̨, di di kɛlɛ, di hu ə tɛɠi; yələɓoɔ ə hvɛɠɛ a ŋą kɛɛpono ɓɛlaɓoɔ ɉu hvaaɓa, bələ tɔ̨nɔ̨, ə mą kɛ, kpinį yaa kpɛlimąn.

¹³ Ya ɓə, ŋą́ ɲɛ̨́i hee, ŋį́ kúwɔ ta koon ɉu tin mɛ̨n kpɔ ɲələi kwɛa la, yɛ mo kpɔ a nwoo kɛnɛ̨, yɛ kɛ: «Kpalo-o, kpalo-o! Kpalo-o, aa ɓɛla lɔi da ɉu heeɓo nuą diɛ, malaka haaɓai daa lɛɛ pulu, diɛ pai di wɔɔ tuluɠaa hvɛɛi mąą mɛ̨nį ɓa!»