M̀ɛni-lɛɛi 7 - Yálá laawoo hɛɓɛ (dc)Gbɔn gaa a Yálá ŋą nu huwu 1 Yili pulu, ŋą́ malaka nąąn gaa tɔɔni lɔi wəlinna nąąn ma, di yee yɛ ɓo lɔi mɛ̨i hvaŋą nąąn ma, ə gɛ, hvaŋąi lɔpee ta hvo tɛɛ lɔi mɛ̨i, gboloyá ɲą, ə mą kɛ, wulu ta ɓa. 2 Ɛlɛɛ, ŋą́ malaka takpɛli kaa yɛ kulɔ hvóló həɠəi pələ. Yálá húlumąą ŋą kɔ́lɔn ɉɛn yɛ ɓo ɲəi. Ə tomą kpɔ a nwoo kɛnɛ̨; malaka nąąn tii di hvaŋą tɛɛ di pɔ, diɛ mɛ̨nį laa lɔi da gboloyá diɛ, yɛ mą: 3 «'Ká hvo mɛ̨nį ta laa lɔi ɓa, gboloyá, ə mą kɛ, wuluɠaa diɛ, hvo kɛli ni, kwa ku kɔlɔn ɉii kɛ Yálá ŋą tínuą tɔwɔla.» 4 Ɛlɛɛ, nuąi daa kɛ di kɔlɔn ɉii kɛ diɛ, ŋą́ mɛ̨n, di loonŋąą ə ɓo a: Nu nwun dɔ̨nɔ̨ ɲee nąąn kɔw nąąn (144.000), diɛ ɓə daa di kɔlɔn ɉii kɛ diɛ, a Israɛlə nu huwu kəlee. 5 Ɉuda nu huwu, nu waa-pow-kɔw-hveelɛ (12.000) ɓə di di kɔlɔn ɉii kɛ diɛ. Rubɛn nu huwu, nu waa-pow-kɔw-hveelɛ (12.000), Gadə nu huwu, nu waa-pow-kɔw-hveelɛ (12.000), 6 Asɛrə nu huwu, nu waa-pow-kɔw-hveelɛ (12.000), Nɛftali nu huwu, nu waa-pow-kɔw-hveelɛ (12.000), Manase nu huwu, nu waa-pow-kɔw-hveelɛ (12.000), 7 Simeɔn nu huwu, nu waa-pow-kɔw-hveelɛ (12.000), Levi nu huwu, nu waa-pow-kɔw-hveelɛ (12.000), Isakarə nu huwu, nu waa-pow-kɔw-hveelɛ (12000), 8 Zabulɔn nu huwu, nu waa-pow-kɔw-hveelɛ (12.000), Ɉosɛfə nu huwu, nu waa-pow-kɔw-hveelɛ (12.000), Bɛnɉamɛn nu huwu, nu waa-pow-kɔw-hveelɛ (12.000) ɓə di di kɔlɔn ɉii kɛ diɛ. Gbɔn gaa a nu kpulu kɛnɛ̨ 9 Yili pulu, ŋą́ ɲɛ̨́i hee, ŋį́ nu kpulu kɛnɛ̨ kaa, yii nu hva pɛli di lonoi, di kɛ a hįi lɔi kəlee, a nu huwu kəlee, ɛlɛɛ, a hįi woo lɔpee gəlee ɓo nuą. Di kɛ tɔɔni dɔɔkpəlin niila, ɛlɛɛ, da Mɛlaa Lon niila, di mąą yiliɛ a həɠə kwɛaa kwɛlɛɛ, ɛlɛɛ, gwalalaa yɛ ɓo di yəi. 10 Diɛ tomą a di woo kɛnɛ̨, diɛ kɛ mą: «Ku wɔ Yálái ɓə ɓalo mɛ̨nį kaa a nwɔɔ, yai heeni dɔɔkpəlin ɉu da Mɛlaa Lon.» 11 Malakaɠaa kəlee ɲąąkpɔnŋąą kɛ dɔɔkpəlin gwɛlɛ, galanɉonŋaa, ɛlɛɛ da, ɉuwɔ nąąn tii, gəlee pɛlɛ di liiɓa dɔɔkpəlin gɔwɔ mu, ɛlɛɛ, diɛ kwɛli hvilɛn Yálá ɓa. 12 Diɛ kɛ mą: «Amįįną! Mąątɛ̨nɛ̨, mąąwiɛlaa, kilikɛɲəilaa, mąmąɓo, ɓɛlɛ laa hvaŋą laa, ɛlɛɛ da huwalawalalaa, di kaa a ku wɔɔ Yálái nwɔɔ, ɲɛ̨n deei hvo mą! Amįįną!» 13 Galanɉonŋaa tii tɔ̨nɔ̨, ə bə́lə́ həɠə, yɛ mą́ą́: «Nuą tii di mąą yiliɛ a ɉəɠə kwɛaa kwɛlɛɛi, gbɛɛ nuą li, ɛlɛɛ, di həɠə mį?» 14 Ŋą́ nwoo ŋąąpənə, gɛ́ mą: «Ną́mu, yɛ́ lɔ ɓə gbaɠala kɔ́lɔn!» Yɛ mą́ą́: «Di kulɔ mɔ̨nɔ̨ kɛnɛ̨i tii hu. Daa di wɔ həɠəɠaai waa Mɛlaa lon ɲąmą hu, daa gwələ. 15 Yili ɓə gɛ, di kaa la tɔɔni Yálá ŋą tɔɔkpəlin liila, diɛ kwɛli hvilɛn mą a kpinį da hvóló, ŋą pɛlɛ́i mu. Ɛlɛɛ, nui tii heeni dɔɔkpəlin ɉu, gaa pai di lɔi ŋą həɠə-kə́lə́i mu. 16 Pulu hva kɛa di kɛ, kpələ wɛli hva kɛa di hon, hvóló da nwəleen di hva kɛa di kələn. 17 Gbala ə tɔɔ, Mɛlaa Lon tii dɔɔkpəlin ɉu, ya ɓə pai kɛi a di mɛ̨i kaamun, a tɔɔ di tɔwɔ, ə li a diɛ yá ton gulɔi. Ɛlɛɛ, Yálá a di ɲɛ̨iyá kələ di ɲɛ̨i.» |