M̀ɛni-lɛɛi 6 - Yálá laawoo hɛɓɛ (dc)

Gɔ́lɔn ɉɛn mɛ̨idai holoon mɛ̨nį

¹ Yá ɓə ŋį́ ɲɛ̨́i hee, ɓɛlɔwai Mɛlaa Lon ə kɛli pai gɔ́lɔn ɉɛn mɛ̨ihveelɛi tii dɔlɔɔ holoon ɉii lai, ŋą́ ɉuwɔ nąąn tii dɔlɔɔ tomą woo mɛ̨n kpɔ kɛnɛ̨, yɛ kɛ mą: «'Pá!»

² Ŋą́ ɲɛ̨́i hee, ŋą́ hoo kwɛlɛɛ ta kaa. Nui kɛ heeni mɛ̨i, kilɛn yɛ ɓo ɲəi. Di ɓɔlɔ ta tɛɛ bɔ, ɛlɛɛ, yɛ li yɛ, kuláá, ɛlɛɛ, yɛ li kuláálaa kɛi.

³ Ɓɛlɔwai di gɔlɔn ɉɛn veelɛnąą holoon na, ŋą́ ɉuwɔ veelɛnąą woo mɛ̨n kpɔ kɛnɛ̨, yɛ mą: «'Pá!»

⁴ Ya ɓə hoo takpɛli ə kulɔ, gbɔluɔ yɛ nwɔ̨n. Nui kɛ heeni mɛ̨i, di mąąlaa tɛɛ bɔ, əgɛ, ə liilaa kpɛɛ lɔi mɛ̨i, nuą di di kee paa, ɛlɛɛ, di ɓɔwa kwɛaa kɛnɛ̨ ta tɛɛ bɔ.

⁵ Ɓɛlɔwai ə gɔlɔn ɉɛn ɉaaɓanąą holoon na, ŋį́ ɉuwɔ ɉaaɓanąą tomą woo mɛ̨n, yɛ kɛ mą: «'Pá!» Ɛlɛɛ, ŋą́ ɲɛ̨́i hee, ŋą́ hoo tɛɠiɛɛ hɛ̨-hɛ̨ ta kaa. Nui kɛ heeni mɛ̨i, hɛnŋaa kɔ́ɔn ɉɛn yɛ ɓo ɲee ɲą.

⁶ Ɛlɛɛ, ŋą́ woo ta mɛ̨n yɛ kulɔ ɉuwɔ nąąn tii lɔwai, yɛ kɛ mą: «Mɔ̨nun gɔw kəgən ɉu tɔ̨nɔ̨ hɔ̨nwɔ̨ ɓaa: tuwɔ yɛa tɔ̨nɔ̨ wali, ɛlɛɛ, kpai-kɔw gəgən ɉu haaɓa hɔ̨nwɔ̨ ɓaa: Tuwɔ yɛa tɔ̨nɔ̨ wali, yii ɓaa a wulɔ da lɔɔ, 'ká hvo tunwɔ̨n mą.»

⁷ Ɓɛlɔwai ə gɔlɔn ɉɛn nąąn nąą holoon na, ŋį́ ɉuwɔ nąąn nąą tomą woo mɛ̨n, yɛ mą: «'Pá!»

⁸ Ɛlɛɛ, ŋą́ ɲɛ̨́i hee, ŋą́ hoo ta kaa dɛɠiɛ mu kwɛlɛɛ. Nui kɛ heeni mɛ̨i, naa ɓaa a: Haa, ɛlɛɛ, ŋąmuątaa ɲɛ̨i kɔw hvilɛn ŋąą bulu. Di mąąlaa tɛɛ di pɔ, yɛnɛ̨ɛ̨ ɓɛlaɓoɔ ɉu nąąn, bələ tɔ̨nɔ̨ mɛ̨i, ə gɛ, di ɉu nuą paa a ɓɔwa kwɛa, a pulu, da lɔi kala ɲɔ̨n, ɛlɛɛ, da lɔwɔ huwɔ huwui lɔpee lɔi mɛ̨i.

⁹ Ɓɛlɔwai ə gɔlɔn ɉɛn nɔɔlinąą holoon na. Ŋą́ nįiɠaa kaa ɉaláá kulɔi kɔwɔ mu, di kɛ a nuąi daa di kulɔ a haláá, Yálá laa woo mąą mɛ̨nį ɓa, ɛlɛɛ, da gɛla hvaai di mo mąą mɛ̨nį.

¹⁰ Di kɛli tomą a di woo kɛnɛ̨, diɛ kɛ mą: «Ku Nąmu mąąhəɠɛɛ, yɛ́i a Tɛ̨ą, mįnɛ̨ lɔwai ɓə, ə́ kaa pai giti teei la, ɛlɛɛ, ə́ ku ɲąmą kwələ kulɔ lɔi mɛ̨i heeɓo nuą diɛ?»

¹¹ Ya ɓə, di həɠə kwɛlɛɛ tɛɛ di tɛitɛi pɔ, ɛlɛɛ, diɛ diɛ: 'Ká ká liikpələ, ɉu hvo kɛa kwɛa li, ə lɛɛ ɉu, ká ɓɛlaanii a ká nąn nonnii díɓo tanɔ̨n ɉu, di too ká pɔ, a diɛi mąąnɛ̨ɛ̨i di di paa yɛ káái.

¹² Ɛlɛɛ, ŋą́ ɲɛ̨́i hee, ɓɛlɔwai di gɔlɔn ɉɛn mɛ̨ida nąą holoon na, lɔi ə kpɛlin gbɔ kɛnɛ̨, hvóló hu ə tɛɠi kpɔ hɛ̨-hɛ̨, ɛlɛɛ, ɲąnįn nąą kəlee ə kpɔlu yɛ ɲąmą.

¹³ Pɛmɛ̨lɛ̨n-gɔwɠaa diɛ kulɔ yələi diɛ too lɔi ɓa, yɛ hvaŋą a kɛli wulu ɓá kpəlee kulɔ ɉu yɛ bu.

¹⁴ Yələkɔlɔn ə həɠə laa, yɛ da gɛi haɠa kpinįn gɛ, ɲeeɠaa da tín nɔiɠaa, di həɠə di tɔɔi,

¹⁵ hééɓolaaɠaai lɔi mɛ̨i, nu kpɛa-kpɛaa, kɔlaɠa nwun nąmįną, hɛn gɔw nąmįną, ɛlɛɛ, da hvaŋą nąmįną, luwɔɠaa, ɛlɛɛ, nuąi di kpɔwɔ yee kɔnmą, di kɛli di loo kwɛni woloɠaa hu, ɛlɛɛ, kwɛniɠaa lɔwai ɲeeɠaa ɓa.

¹⁶ Diɛ kɛ ɲeeɠaa da gwɛniɠaa diɛ: «'Ká pu ku mɛ̨i, 'ká ku loon, ku mąą ə kwɛa nui tii heeni dɔɔkpəlin ɉu, mą, ɛlɛɛ, ku mąą ə kwɛa Mɛlaa Lon nwɔ liiŋąnwąnąi ɓa!

¹⁷ Hvo gaai, ɲələ aa ɉəli, yai a ŋą liiŋąnwąną hvóló kɛnɛ̨i, ɛlɛɛ, gbɛɛ ɓə pai kulɔi ɉu?»