M̀ɛni-lɛɛi 4 - Yálá laawoo hɛɓɛ (dc)

Yálá ŋą tɔɔkpəlin da kwɛli hvilɛn ŋąąi yələkɔlɔn ɉu

¹ Yili pulu, ŋį́ kɛɛ ta kaa: Pɛlɛ́ ta laa ə ɓoɔ yələkɔlɔn ɉu, ɛlɛɛ, nwoo tɔlɔɔi ŋą́ mɛ̨n, yɛ pələ ɓo mą́ą́, ə kɛ yɛ tulu woo, yɛ mą: «'Tɛ́ ɓɛ! Ɛlɛɛ, mɛ̨nįɠaai pai kɛi nąą pulu, ŋį́ nɛ yɛ́.»

² Ɲąąɓa, Kili-Mąąhəɠɛɛ ə́ ɉə́ɠə. Ɛlɛɛ, ku tɛ laa. Tɔɔkpəlin ə kɛ yələkɔlɔn ɉu, ɛlɛɛ, nu ta ə ɓo heeni ɉu.

³ Nui tii kɛ ɉu heeni gɛ pələ ə kɛ yɛ ɉaspə da sardoanə kúwɔ-kwɛnį. Dɔɔkpəlin tii mąątinɛ̨nŋąąi kɛ a gbəimiliin, yɛ lən yɛ emerodə kwɛni.

⁴ Dɔɔkpəlin tii kwɛlɛ, tɔɔkpəlin pɔw-hveelɛ-kɔw nąąn ə kɛ laa, ɛlɛɛ, kalanɉon pɔw-hveelɛ-kɔw nąąn ɉəɛ dɔɔkpəlinŋaa tii hu, həɠə kwɛlɛɛ ə ɓo di kwąną, ɛlɛɛ, hɛni ɓɔlɔ pɛlɛɛ di nwuɔ̨.

⁵ Mąną-mąną, wooɠaa, da yələgbąnąą di kɛli kulɔ dɔɔkpəlin tii hu; kpalan nən mɛ̨ihveelɛ ə ɓo dɔɔkpəlin dɔwɔ, diɛ ɓə a Yálá ŋą nįį mɛ̨ihveelɛi.

⁶ Dɔɔkpəlin tii lííla, gboloyá ta ə kɛ laa, yɛ lən, yɛ pɛ̨nɛ̨n galan. Dɔɔkpəlin tii hąąi, ɛlɛɛ da gwɛlɛ, huwɔ nąąn di kɛ laa, di ɲɛ̨i kɔ́w yɛ ɓo di nąą kəlee, di pulu pələ da di tɔwɔ pələ.

⁷ Dɔlɔɔ ə kɛ yɛ: yala; veelɛnąą ə ɓo yɛ: niŋɛ̨ hilɛ gbɔn; ɉaaɓanąą, ɲɛ̨ilaai ə ɓo yɛ: nu kan; ɛlɛɛ, nąąn nąą ə ɓo yɛ kúwɔ a kɛli koon.

⁸ Ɉuwɔ nąąn tii kəlee koon ə kɛ diɛ mɛ̨ida mɛ̨ida, di ɲɛ̨i kɔ́w ə ɓo di nąą kəlee, di pulu pələ, da di tɔwɔ pələ. Kpinį pɛlɛɛ hvóló ɓa, di hvo kɛli kpɛla kɛi diɛ: «Ə́ mąąhəɠɛɛi, ə́ mąąhəɠɛɛi, ə́ mąąhəɠɛɛi, gu Nąmu, yai a Hééɓo Kəlee Nąmu Yálá, Yai kɛ laa, yai laa, ɛlɛɛ, Yai pai!»

⁹ Ɓɛlɔwai lɔpee ɉuwɔɠaa tii di kɛli mąąwiɛlaa, ɓɛlɛlaa da mąmąɓo tɛɛ la nui kɛ heeni dɔɔkpəlin ɉu bɔ, yai a vúlu ɲɛ̨n deei hvo mą,

¹⁰ galanɉon pɔw-hveelɛ-kɔw nąąn tii, di kɛli pu di kpəlin na, nui heeni dɔɔkpəlin ɉu niila, diɛ gwɛli hvilɛn Vúlumąą ɓa, ɲɛ̨n deei hvo mą, ɛlɛɛ, diɛ di nwuɔ̨ ɓɔlɔɠaa pili dɔɔkpəlin niila, diɛ kɛ mą:

¹¹ «Oo! Ku Ną́mu, ku wɔɔ Yálá, yɛ́ ɓə ə́ mąąnɛ̨ɛ̨i ku, mąąwiɛlaa, kɛnɛ̨laa da hvaŋą laa kɛ yɛ́, mąąhɔlɔɓo, yɛ́ ɓə hɛn gəlee pɛli, Yɛ́ ɓə hvaa mą diɛ kɛ yɛnɛ̨ɛ̨, ɛlɛɛ diɛ yɛnɛ̨ɛ̨ kɛ.»