M̀ɛni-lɛɛi 22 - Yálá laawoo hɛɓɛ (dc)1 Yili pulu, malaka ə ɓaloyá-lee ta lɛ mą́ą́, yɛ lən gbɔ yɛ pɛ̨nɛ̨n galan, ə kɛli kulɔ Yálá da mɛlaa Lon di wɔ tɔɔkpəlin gɔwɔ mu. 2 Daa-lee tii hu, ɛlɛɛ, da ɲálee nwonwo hveelɛi hu, nąą ɓə yɛnɛ̨ɛ̨ kɛ wulu ə kɛ laa, yɛ ɓá gee mɛ̨i pow-kɔw-hveelɛ. Ɲąnįn dɛitɛi yee mu, a ɓá, ɛlɛɛ, naa ə ɓo a hįi lɔiɠaa kɔlɔi pono hɛn. 3 Nɛ̨ŋɛ̨nnaa hva kɛa kɛ laa, Yálá da mɛlaa Lon di wɔ tɔɔkpəlin, gaa pai kɛi daa-lee hąąi, ɛlɛɛ, ŋą tínuąi di kaa pai kɛi gwɛli hvilɛn ɉii mą, 4 Di ka pai kɛi ɲɛ̨ilai kaai, ɛlɛɛ, naa ə ɓo di tɔwɔla. 5 Kpinį hva kɛa pɛlɛ laa, di mąą kpaan və pai kɛi laa kpalan nən ma, ə mą kɛ, hvóló lən, mąąhɔlɔɓo, gu Nąmu Yálá kaa pai di mɛ̨i ponoi a ŋą kɛɛponoi, ɛlɛɛ, di kaa pai tɔɔlaa kɛi, ɲɛ̨n deei hvo mą. Nwoo laa kulɔ 6 Yili pulu, yɛ mą́ą́: Nwooɠaai ŋɛ̨i kaa a neelee, ɛlɛɛ, a tɛ̨ą; gu Nąmu Yálá, yai a gwəi mɛ̨nį hukulɔ nuą kili, ya ɓə ŋą malakai tɔɔ, əgɛ, mɛ̨nįi pai kɛi ɉu hvo kwɛa li, ə nɛ ŋą tínuą diɛ. 7 «'Ɓɛ kaa, Gáá pai ɉu hvo kwɛa li. Nwun na nɛ̨ɛ̨mun maa a nui, a ɲee kąnąn ɉɛɓɛ́i ŋɛ̨i hu wooɠaa diɛ.» 8 Ɲą́ą́ Ɉaan, ŋį́ mɛ̨nįɠaa tii mɛ̨n, ɛlɛɛ, ɲɛ̨́i ə tɔɔ ɉu. Yii kɛa ŋį́ gaa, ŋį́ mɛ̨n na, ŋį́ pɛlɛ níiɓa, əgɛ, ŋį́ gwɛli hvilɛn, malakai tii mɛ̨nįɠaa lɛ mą́ą́ gɔwɔ mu. 9 Kɛlaa, yɛ mą́ą́: «'Hvó kɛ ə́ kaa gɛi tii! Gáá lɔ a tímun, ə́ mąą mɛ̨nį ɓa, ɛlɛɛ, da ə́ nąn nonnii a Yálá kwəi mɛ̨nį hukulɔ nuą di mąą mɛ̨nį ɓa, ɛlɛɛ, da nuąi da di yee kąnąn ɉɛɓɛ́i ŋɛ̨i hu wooɠaa diɛ. Yálá ɓə mąąnɛ̨ɛ̨i di gwɛli hvilɛn mą.» 10 Yili pulu, yɛ mą́ą́: «Yálá kwəi mɛ̨nį hu wooɠaai ɉɛɓɛ́i ŋɛ̨i hu, 'hvó noo, mąąhɔlɔɓo, ɲələ aa lɛɠɛ. 11 Túwɔ́ pələ ɲɔ̨n gulɔmun, ə kɛ lɔ tuwɔ pələ ɲɔ̨n gulɔi, hvulumun, ə kɛ lɔ hvulu kɛi, mąąliɓimun ə kɛ lɔ mąąliɓi mɛ̨nį hu, kɛlɛɛ, tələnmomun ə kɛ lɔ nwɔ̨nɔ̨ tələnmo tuwɔ kɛi, ɛlɛɛ mąąhəɠəmun ə kɛ lɔ nwɔ̨nɔ̨ mąąhəɠə mɛ̨nį kɛi.» 12 «'Ɓɛ kaa, gáá pai ɉu hvo kwɛa li, ɛlɛɛ, ŋą́ nu hvɛla kulɔ hɛn ə ɓo ɲéé ɲą, gɛ́ pa nu tɛitɛi hvɛla kulɔi yɛ bələi ə tuwɔ la. 13 Ɲą́ą́ ɓə a Alfa, ɛlɛɛ, Omega, dɔlɔɔ da gbɛla mąą, gɔwɔ tɔɔi, da naa kulɔi.» 14 Di nwun na nɛ̨ɛ̨i, diɛi da di wɔɔ həɠə kwɛaaɠaai waa, əgɛ, diɛ pɛli di wɔɔ nąą hɔlɔɓoi ɲɛnɛ̨ɛ̨ kɛ wului hu, ɛlɛɛ, diɛ pɛli lɔi bɛlɛ́ laaləiɠaa ɓa daa-lee hu. 15 'Ká kulɔ ɲɛnɛ̨ɛ̨ pələ, yilɛɠaa, ɛlɛɛ, kaahɛn ɉəɠə nuą, tuwɔ pələ ɲɔ̨n gulɔ nuą, ɛlɛɛ, da nu paa nuą, hali kɔ nuą, ɛlɛɛ, da nuąi lɛɛ wɛli kaa diɛ, ɛlɛɛ, diɛ lɛɛ kɛ! 16 «Ɲą́ą́ Jesus, ŋą́ nwɔ́ malakai tɔɔ, ə gɛ, ə pa a gɛla hvaa tii ɓo, yɛ hvilɛn na gbɔnŋaa kəlee diɛ. Ɲą́ą́ ɓə a Davidə huwu mąąpoo, a yələɓoi pɛmɛ̨lɛ̨n-gɔw.» 17 Kili, ɛlɛɛ, da ɉilɛtai nɛ̨ą, diɛ mą: «'Pá!» Nui a mɛ̨n, ə mu hon yɛ mą: «'Pá!» Nui kpələ wɛli kaa mą, ə pá, ɲái a yɛnɛ̨ɛ̨ tɛɛ nu pɔ, nui nwɛli kaa mą, ə ɉon a mɛ̨inɛ̨ɛ̨. 18 Ɲą́ą́ ɓə moi kpɔ a tɛ̨ą, mɛ̨nįɠaai ɉɛɓɛ́i ŋɛ̨i hu, nui a da pɛlɛ mą, mɛ̨nį ɲąąnwąnąąɠaai ɉɛɓɛ́ hu, Yálá a nwɛi ta pɛlɛ mą. 19 Nui lɔpee a da kulɔ mą, nwului a yɛnɛ̨ɛ̨ tɛɛ nu pɔ, Yálá a mąą nu nwɛi ta kulɔ mą, ə mą kɛ, daa mąąhəɠɛɛ; diɛi di mąą mɛ̨nį ɓoɔi ɉɛɓɛ́ ŋɛ̨i hu. 20 Nui mɛ̨nįi tii ɓoi, yɛ diɛ: «A tɛ̨ą, gáá pai ɉu hvo kwɛa li.» Amįįną! 'Pá, ku Nąmu Jesus! 21 Gu Ną́mu Jesus nwɔ nɛ̨ɛ̨laai ə kɛ nu kəlee pɔ! |