M̀ɛni-lɛɛi 21 - Yálá laawoo hɛɓɛ (dc)Yələkɔlɔn nįnɛ̨, da lɔi nįnɛ̨ 1 Yili pulu, ŋį́ yələkɔlɔn nįnɛ̨ da lɔi nįnɛ̨ di kaa, mąąhɔlɔɓo, ɲələkɔlɔn dɔlɔɔ, da lɔi dɔlɔɔ tii kɛ laa, di kwɛlɛɛn, ɛlɛɛ, gboloyá hvo kɛa kɛ laa. 2 Ɛlɛɛ, ŋą́ daa mąąhəɠɛɛ kaa, yai a Ɉerusalɛmə nįnɛ̨, yɛ həɠə Yálá kwɛlɛ, yələkɔlɔn ɉu, yɛ nɛ̨ɛ̨gbɛlai aa gbɔwɔ pɛli a nɛlɛɛ ɉilɛ mąą mɛ̨nį ɓa. 3 Ɛlɛɛ, ŋą́ woo kɛnɛ̨ ta mɛ̨n yɛ həɠə dɔɔkpəlin ɉu, yɛ kɛ mą: «Yálá heei ka, da nu kanŋaa! Da diɛni di kaa pai heei kɛɛnąą tanɔ̨n. Di kaa pai kɛi a nwɔ nu huwu, ɛlɛɛ, yaa kpinįi ə ɓo a di wɔɔ Yálá, yɛ ɓo di pɔ. 4 Yaa ɓə pai di ɲɛ̨iyá kələi di ɲɛ̨i, haa hva kɛa kɛ laa, haa wɔlɔ mɛ̨nį hva kɛ ɉu, woolaa hva kɛ laa, ə mą kɛ, mɔ̨nɔ̨, mąąhɔlɔɓo, ɲɛnɛ̨ɛ̨ pɔlɔ-pɔlɔi tii aa tɛɛ.» 5 Ɛlɛɛ, nui tii kɛ heeni dɔɔkpəlin ɉu, yɛ mą: «'Ɓɛ kaa, gáá mɛ̨nį kəlee pui nįnɛ̨ kɔlɔi.» Yili pulu, yɛ mą́ą́: «'Bɛ̨ɛ̨, yɛ mą: Nwooɠaa ŋɛ̨i kaa a mɛ̨nį leelee, ɛlɛɛ, a tɛ̨ą.» 6 Ɛlɛɛ, yɛ mą́ą́: «Mɛ̨nį kəlee laa aa hon. Ɲą́ą́ ɓə a Alfa, ɛlɛɛ, a Omega, gɔwɔ tɔɔi, da naa kulɔi. Nui kpələ wɛli kaa mą, ŋą́ gɔ a yá nwun gulɔi yá, a mɛ̨nį nɛ̨ɛ̨. 7 Nui lɔpee a yeetɛɛmąą laa kɛ, a gwɛlin tii hɔlɔɓo, ɛlɛɛ, ŋą́ kɛ a nwɔ Yálá, ɛlɛɛ, yɛ ɓo a nón. 8 Yii ɓaa ɲɔw nuą, diɛi di hvo kulɔ di woo ɓa, diɛi a tuwɔ pələ ɲɔ̨n gulɔ nuą, a nu paa nuą, a hiɛnɔwai kɛ nuą, a kaahɛn ɉəɠə nuą, a hali kɔ nuą, ɛlɛɛ, da lɛɛ nuą; di wɛi nąą ɓaa nwɔ̨n máɠa hu; yili ɓə a haa veelɛnąą.» Ɉerusalɛmə nįnɛ̨ 9 Ya ɓə malaka mɛ̨ihveelɛi tii mɛ̨nį ɲąąnwąnąą kpələ-kɔ́wɔ mɛ̨ihveelɛ kpɛli ə kɛ di yəi, dɔ̨nɔ̨ ə pa, yɛ mą́ą́: «'Pá, ŋą́ mɛlaa Lon ŋą wɛlii, yai a nɛ̨ą, ŋą́ nɛ yɛ́!» 10 Kili ə gbə́ŋə́, ə li a ɲą́ą́ yee kwɛa kɛnɛ̨ ta tonna, ə daa mąąhəɠɛɛi, yai a Ɉerusalɛmə, yai həɠə yələi, Yálá kwɛlɛ, ə nɛ mą́ą́. 11 Ə kɛli lən a Yálá nwɔ mąąwiɛ laa. Nən bələ ə kɛ yɛ kúwɔ-kwɛnį ta, yɛ Jaspe kúwɔ-kwɛnį. 12 Daa tii mąąkpɛ hįi, huwiaai kɛ, ɛlɛɛ, mɛ̨i kwɛaa. Naaləi ə kɛ pow-kɔw-hveelɛ, naaləi tɛitɛi ɓa, malaka tɛitɛi ə ɓo laa, ɛlɛɛ, laaɠaa pɛ̨ɛ̨ laa; di kɛ a Israɛlə nu huwu heei pow-kɔw-hveelɛi laa. 13 Vóló həɠəi pələ, pɛlɛ́ laaləi haaɓa, ɲánwuɔ̨ pələ, pɛlɛ́ laaləi haaɓa, ɉɛɠɛɛ pələ, pɛlɛ́ laaləi haaɓa, ɛlɛɛ, vóló tooi pələ, pɛlɛ́ laaləi haaɓa. 14 Ɉįi nwąną tɔɔi kɛ kwɛni pow kɔ́w hveelɛ mɛ̨i, ɛlɛɛ, gwɛnį tɛitɛi ɓa, Ɓɛlaa Lon nwɔ kɛla pow-kɔw-hveelɛi, laa pow-kɔw-hveelɛi di ɓo mą. 15 Nui tii kɛli bələ ɓo mą́ą́, hɛnŋaa kɔɔn ɉɛn ə kɛ ɲee ɲą, yɛ ɓo a hɛni hveen gbaɠa, yii ə kɛli pa daa-lee tii kɔɔn ɉii la, bɛlɛ́ laaləiɠaa, da ɉįi nwąnąɠaa. 16 Daa-lee tii nąą kəlee pɛliɛ kɛ a gee; gwɛa yee da ɲąą kɛnɛ̨ yee pɛliɛ kɛ gee. Ə daa kɔ́ɔn a veen gbaɠai tii, ə ɓo a kilə waa-hveelɛ pulu nwun-veelɛ, gwɛa pələ, ɲee la kwɛa pələ, dɔɔmɛ̨i kwɛa pələ, ə kɛ lɔ tanɔ̨n. 17 Ə ɉįi nwąnąɠaa kɔɔn, ə ɓo a yeelaamą nwun dɔ̨nɔ̨-ɲeenąąn-kɔw-nąąn, nu kanŋaa di wɔɔ hɛn gɔɔn bələ ɓə malaka ə gɔɔn na. 18 Ɉįi nwąnąi tii tɔɔ hɛnŋaa di kɛ a ɉaspə kwɛnį, daa-lee tii ə kɛ yɛ hɛni huwaa hva-hva, ɉu həɠəən ɛlɛɛ, ə ɓo yɛ pɛnɛ̨n. 19 Daa-lee tii mąąkpɛ hįi, kɔ́wɔ hvilɛn gwɛnįɠaa, di mąąpuɔi kɛ a kúwɔ-kwɛnįhuwu lɔpee gəlee. Gɔwɔ hvilɛn gwɛnį dɔlɔɔ ə kɛ a: ɉaspə kwɛnį, veelɛnąą ə ɓo a safirə kwɛnį, ɉaaɓanąą ə ɓo a: kalseduanə kwɛnį, nąąnnąą ə ɓo a: emerode kwɛnį, 20 nɔɔlinąą ə ɓo a: sardoanə kwɛnį, mɛ̨idanąą ə ɓo a: kornalinə kwɛnį, mɛ̨ihveelɛnąą ə ɓo a: krisolitə kwɛnį, mɛ̨ihaaɓanąą ə ɓo a: berilə kwɛnį, mɛ̨inąąnnąą ə ɓo a: topazə kwɛnį, bow nąą ə ɓo a: krisoprasə kwɛnį, bow kɔ́w tanɔ̨nnąą ə ɓo a: hiasɛntə kwɛnį, bow-kɔw-hveelɛnąą ə ɓo a: ametistə kwɛnį. 21 Bɛlɛ́ laaləi pow kɔ́w hveelɛ tii, di mąąpuɔi kɛ a hɛni pow kɔ́w hveelɛ. Bɛlɛ́ laaləi tɛitɛi mąąpuɔ a hɛni. Daa kwəi pələ ə ɓo a hɛni huwaa hva-hva, yɛ yá həɠəən. 22 Kɛlaa, və́ Yálá hee pɛlɛ́ kaa daai tii hu, mąąhɔlɔɓo, Hééɓolaa Kəlee Nąmu Yálá, ɛlɛɛ, da Mɛlaa Lon, diɛ ɓə kɛ a bɛlɛ́. 23 Daa-lee tii mąą kpaan və kɛ hvóló ɓa, ə mą kɛ, ɲąnįn, ɉu pono mɛ̨nį ɓa, gbala ə tɔɔ, Yálá ŋą mąąwiɛlaa ə kɛli ɉu pono, ɛlɛɛ, ŋą kpalan nən maa a Mɛlaa Lon. 24 Hįi lɔiɠaa di kɛli hiɛ ŋą kɛɛpono hu, ɛlɛɛ, lɔi mɛ̨i tɔɔɓɛlaa di pa bɔ a di wɔɔ mąąwiɛlaa. 25 Ɉįi nwąną ŋą kponŋaa laa hvo kɛli kpulu a yələ kəlee, mąąhɔlɔɓo, nąą nwɛi, kpinį hva pɛlɛ laa. 26 Di kaa pai kɛi pai laa a: hįi lɔi kəlee di wɔɔ mąąwiɛlaa, da di wɔɔ ɓɛlɛlaa kəlee. 27 Mɛ̨nį kɔhɔɓoɔ da lɛɛ, di ha lɛɛ nu ta yee pɔ hvo lɔ la laa, kɛlaa, hvo kɛli lɔ nuąi di laa pɛ̨ɛ̨ kaa mɛlaa lon ŋą yɛnɛ̨ɛ̨ kɛ hɛɓɛ́ hu, diɛ ɓə da lɔ laa. |