M̀ɛni-lɛɛi 19 - Yálá laawoo hɛɓɛ (dc)

Kɔ nɛ̨ɛ̨ wələ da mɛlaa lon ŋą hvúlú lɔ wələ

¹ Yili pulu, ŋį́ tín da mɛ̨n yɛ nu kpulu kɛnɛ̨ɛ̨ huluun nwoo yələkɔlɔn ɉu, diɛ kɛ mą: «Kánįkookwəi! Ɓalo mɛ̨nį, mąąwiɛlaa, ɛlɛɛ, da huwalawalalaa kaa a ku wɔɔ Yálái nwɔɔ.

² Mąąhɔlɔɓo, ŋą kitiɠaai laahvɛɛi a tɛ̨ą, ɛlɛɛ, da tələnmolaa. Aa nwɛlikɛ nɛ̨ɛ̨nu kɛnɛ̨i kiti tee, yai kɛli lɔi kəlee kɔhɔɓo a ŋą wɛlikɛɛ, ɛlɛɛ, aa ŋą tínuą ɲąmą kwələ kulɔ mą.»

³ Ɛlɛɛ, di pənə nwɔ̨nɔ̨, diɛ mą: «Kánįkookwəi! Ɛlɛɛ, mɛ̨i lulu kaa pai tɛi hva kɛ mą.»

⁴ Galanɉon pow-hveelɛ-kɔw-nąąn tii, ɛlɛɛ, da ɉuwɔ nąąn tii, di pu di kpəlin na, di gwɛli hvilɛn Yálá ɓa, yai heeni dɔɔkpəlin ɉu, ɛlɛɛ, diɛ kɛ mą: «Kánįkookwəi! Amįįną!»

⁵ Ya ɓə, woo ta ə tɔɔ, yɛ həɠə dɔɔkpəlin ɉu, yɛ kɛ mą: «'Ká gu wɔɔ Yálái mąątɛ̨nɛ̨, káái a ŋą tínuą, káá ka ɲɔw mą, lɛapɛlɛɛ da nu kpɛa-kpɛaa!»

⁶ Ɛlɛɛ, ŋį́ nuą huluun nwoo mɛ̨n, ə ɓo yɛ yálee kpɛa-kpɛaa huluun dín, ɛlɛɛ, ə ɓo yɛ tulɔ tuwɔ tín gɛnɛ̨ɛ̨, diɛ kɛ mą: «Kánįkookwəi! Mąąwiɛ, Hééɓó kəlee Nąmu, ku wɔɔ Yálá Huwalawala Kəlee Nąmu, aa nwɔ tɔɔlaai too pono ɲą.

⁷ 'Ká gu kwəinɛ̨ɛ̨ kulɔ, gu pili yələi a ɓələn, gu mąąwiɛ laa tɛɛ bɔ, gbala ə tɔɔ, mɛlaa Lon nwɔ hvúlúlɔ yələ aa ɉəli; ŋą nɛ̨ɛ̨nui aa ɉuyili,

⁸ daa mąą laa tɛɛ bɔ, ə gɛ, ə mąąyili a həɠə kwɛlɛɛ lɛlɛɛ, yɛ lən, hɛn da pɔɔ hvo ɉu, mąąhɔlɔɓo, ɉəɠə kwɛlɛɛ tii, tələnmo nuą, da nu mąąhəɠɛɛɠaa di kɛ-mɛ̨nį lɛlɛɛɠaa tii li.»

⁹ Malaka ta yɛ mą́ą́: «'Bɛ̨ɛ̨! Nwun na nɛ̨ɛ̨mun maa, nuąi di təliɛi mɛlaa lon ŋą hululɔ hɛlii ɓa!» Yɛ nwɔ̨nɔ̨ mą́ą́: «Yálá kpinįi woo li.»

¹⁰ Ya ɓə, ŋą́ pɛlɛ gɔ́wɔ mu, gɛ́ kɛ ŋį́ gwɛli hvilɛn mą, kɛlaa, yɛ mą́ą́: «'Hvo kɛ ə́ kaa gɛi tii! Gáá lɔ a tímun, ə́ mąą mɛ̨nį ɓa, ɛlɛɛ, da ə́ nąn nonnii, diɛi di yee kąnąnŋąą Jesus ŋą kɛla wooi ɓa.» Yálá ɓə mąąnɛ̨ɛ̨i ə́ gwɛli hvilɛn mą, gbala ə tɔɔ, Jesus ŋą kɛla wooi, ya ɓaa a mɛ̨nįi pai kɛi ŋą kili.

Nui dɔɔwulɔ kaa mą ŋą yeetɛɛmąą laa

¹¹ Yili pulu, ŋį́ yələkɔlɔn gaa naa ɓoɔ, hoo kwɛlɛɛ ta ə kulɔ laa, nui kɛ heeni mɛ̨i, naa ɓaa a: Tələnmo, da Tɛ̨ą. A kiti tee, ɛlɛɛ, yɛ kɔ́ kɔ́ a ɉaŋąą.

¹² Ɲɛ̨i kɔ́w kaa a nwɔ̨n nən nwələənŋąą, tɔɔɓɔlɔ tamąą pɛlɛɛ nwuɔ̨, ɛlɛɛ, laa ta pɛ̨ɛ̨ mą, yaa tanɔ̨n nɔ ɓə gɔlɔn.

¹³ Həɠə kwɛaa ta ə kɛ gwąną, daa nɔ ɲąmą hu, ɛlɛɛ, naa ɓaa kɛ a: «Yálá laawoo.»

¹⁴ Gɔlaɠaɠaai yələkɔlɔn ɉu, di hvilɛnŋąą bulu, di heɛ hoo kwɛlɛɛɠaa mɛ̨i, həɠə kwɛlɛɛ pə-pə ə ɓo diɛ.

¹⁵ Liikpakpa ɲąąliɛɛ yɛ kulɔ na, hįi lɔiɠaa kɛlɛ mɛ̨nį ɓa. Yɛ di tənən dɔɔ a kwɛli hvaɠa, gaa pai Huwalawala Kəlee Nąmu ŋą lííholi lɔɔi nɛn ɉii gɔwɔ hu, tan ɉii a gɔwɔ.

¹⁶ Laa ta pɛ̨ɛ̨i kɛ ŋą həɠəi ɓa, da nwɛlɛ mɛ̨i, diɛ kɛ mą: «Hééɓoɠaa di wɔɔ Hééɓomun, nąmuɠaa di Nąmu.»

¹⁷ Ya ɓə, ŋį́ malaka ta kaa tɔɔni hvóló hu; yɛ tomą kpɔ a nwoo kɛnɛ̨ɛ̨, nwɛ̨nįɠaa tii kɛi koon ɲələ kwəi, di pɔ pələ, yɛ mą: «'Ká pa, 'ká káá ɲąąkpɔn, Yálá ŋą hɛli kɔ̨nɔ̨n gɛnɛ̨i ɓa,

¹⁸ əgɛ, ká tɔɔɓɛlaa huwɔ, kɔlaɠa nwun nąmįną huwɔ, ɲąąwooɓo kɛ nuą huwɔ, hooɠaa huwɔ, ɉoo mɛ̨i nuą huwɔ, nu kanŋaa huwɔ, nuąi di kpɔwɔ yee kɔnma da luwɔɠaa, lɛapɛlɛɛ, ɛlɛɛ, da nu kpɛa-kpɛa, di huwɔ mįi.»

¹⁹ Ɛlɛɛ, ŋį́ ɉuwɔi tii kaa, lɔi mɛ̨i tɔɔɓɛlaa da di wɔɔ kɔlaɠaɠaa, di ɲąąkpɔnŋąą diɛ pa kɔ pɛlɛi, ɉoo mɛ̨imun da nwɔ kɔlaɠai ɓa.

²⁰ Di ɉuwɔi tii hon a kɔluwɔ, ɛlɛɛ, da nɛɛ loloɓomun tii, yai kɛli gbalo mɛ̨nįɠaa kɛ niila, ɛlɛɛ, da nuąi ə di ɲąąhɛn, ə gɔlɔn ɉii kɛ diɛ, diɛ kwɛli hvilɛn mąą nįnįn ma. Di gəlee pili nwɔ̨n maɠa hu a di hvúlú.

²¹ Gbəliɠaai lɛɛ, niikpakpai tii kɛli kulɔ ɉoo mɛ̨imun na, ə di nwun na pili, nwɛ̨nįɠaa di pilɛ di powa hu.