M̀ɛni-lɛɛi 18 - Yálá laawoo hɛɓɛ (dc)

Babilonə too mɛ̨nį

¹ Yili pulu, ŋį́ malaka takpɛli kaa, yɛ həɠə yələi. Hvaŋą kɛnɛ̨ ta ə ɓo ɲəi, ɛlɛɛ, lɔi mɛ̨i ə pono a mąąɲįnɛ̨n.

² Ə tomą kpɔ a nwoo kɛnɛ̨, yɛ kɛ mą: «Aa too, aa too, Babilonə kɛnɛ̨i aa too; aa lɛɛ kɛa a ɲįnɛ̨nŋaa heei, aa lɛɛ a ɲinɛ̨n ɉuwui lɔpee gəlee heei, a nwɛ̨nį kɔ́hɔɓoɔɠaa, diɛi di wɛlikpɛɛ nu kanŋaa diɛ, di heei.

³ Mąąhɔlɔɓo, ə ŋą wɛlikɛ lɔɔ kpəɠiɛi tɔɔ hįi lɔi kəlee la; lɔi mɛ̨i tɔɔɓɛlaa di too bɔ ŋą wɛlikɛɛ tii hu, ɛlɛɛ, yɔw kɛ nuąi lɔi mɛ̨i, di hɛn ɉɔlɔɓo nwɔ ŋąąnɛ̨ɛ̨ háálai.»

⁴ Ɛlɛɛ, ŋį́ woo ta mɛ̨n yɛ həɠə yələi pələ, yɛ kɛ mą: «'Ká kulɔ daai ŋɛ̨i hu, káái a ŋą nu huwu, ə gɛ ká hvo pa too di wɔ nɛ̨ŋɛ̨nŋaai hu; ɛlɛɛ, mɛ̨nį ɲąąnwąnąą tii pai laai diɛ, ká hvo pa hɔlɔɓo ɉu.

⁵ Gbala ə tɔɔ, nwɔ nɛ̨ŋɛ̨nŋaa daa tɛ, daa həli yələ kwəi, ɛlɛɛ, Yálá aa gili hvilɛn nwɔ tuwɔ pələ ɲɔ̨nŋaai diɛ.

⁶ 'Ká gwələ kulɔ mą a gbɔ-kpɔɔ wali, 'ká gɛ-mɛ̨nį kwələ kulɔ mą, gee mɛ̨i hveelɛ. Gbələ-kɔwɔi tii ə kɛli ŋą lɔɔi humo ɉu, 'ká nwɛi humo ɉu gee mɛ̨i hveelɛ, 'ká dɔɔ na.

⁷ Bələi lɔ ə ɲąąnɛ̨ɛ̨ kulɔ la nwɔ mąąwiɛ laa hu, bələ lɔ ɓə 'ká mɔ̨nɔ̨ɓo la, ɛlɛɛ, 'ká mąąwɛli. Hvo gaai, ə kɛli mo gwəi pələ, yɛ kɛ: Gáá heeni yɛ tɔɔnɛ̨ɛ̨nu, və́ a galanin, və́ kpɔ pai mąąwɛli mɛ̨nį kaai.

⁸ Yili mąą mɛ̨nį ɓa, mɛ̨nį ɲąąnwąnąąɠaai naa dɔwɔ, di kaa pai pu mɛ̨i lɔ a hvóló tanɔ̨n, diɛ ɓaa: Haa, haa wɔlɔ, da pulu, ɛlɛɛ, nwɔ̨n mə pai yaai tii gələn ɉii. Mąąhɔlɔɓo, Ną́mu Yálá, yai pai gití teei, vaŋą kɛnɛ̨i.»

⁹ Nąąlɔwai, lɔi mɛ̨i tɔɔɓɛlaai kpɔ di kpɔwɔ tɛɛ bɔ, da diɛni diɛ wɛlikɛ, ɛlɛɛ, diɛ ɲąąnɛ̨ɛ̨ kulɔ, da pa gələn nwɔ̨n nului tii kaai, da wɔlɔ diɛ di woolaa a mąą mɛ̨nį.

¹⁰ Di kaa pai tɔɔi kwɛaa la, diɛ ɲɔw ŋą mɔ̨nɔ̨i tii ɓa: «Ee kə kpalo! Ə kə gbalo kɛnɛ̨! Oo kə, daa-lee kɛnɛ̨ɛ̨ kɛ, Babilonə, taalee hvaŋą kɛnɛ̨ɛ̨i kɛ, lɛɛlɛ tanɔ̨n gbən yee mu lɔ ɓə di giti tee la!»

¹¹ Ɛlɛɛ, ɲɔw-kɛ-nuąi lɔi mɛ̨i diɛ wɔlɔ, ɛlɛɛ, diɛ nwɔ mąąwɛli heeɓo, mąąhɔlɔɓo, di wɔɔ kalayɔwɔɠaai daa lɛɛ, nu hvo mą, hvo da yá,

¹² hɛni kalayɔwɔ, wali-kwɛli, ɛlɛɛ, da kúwɔ-kwɛnį lɛlɛɛɠaa, həɠəɠaa, ɛlɛɛ, nįnį-kɔlɔ həɠəɠaa, həɠə lalaaɠaa a kpɔluɔ gbələtətə, wulu mąą mɛ̨nį nwąnąąɠaa, ɉɛnŋaai a hə́lə́ ɲįn, wulu mąą haɠaa lɛlɛɛɠaa, ɓála-kwɛli hɛnŋaa, kwɛli kpəleeɠaa, da kawulu hɛnŋaa,

¹³ a kanɛlə wulu kɔlɔ, hɛn gun-nɛ̨ɛ̨ɠaa, wulɔ kun-nɛ̨ɛ̨, mirə wulɔ, ɛlɛɛ lansan, lɔɔ da wulɔ, lɛɠɛ hunwɔ̨ ɛlɛɛ mɔ̨nun gɔw, nįŋɛ̨ɠaa da ɓɛlaaɠaa, hooɠaa da wotoloɠaa, luwɔɠaa, da gaho nąmįną.

¹⁴ Nwulu ɓái nwɛli ə kɛ yɛ́, mąą aa kwɛa yɛ́, aa li kwɛaa la. Hɛn kpɔ kɛ ɉukpɛɛ, ɛlɛɛ, a ɲɛ̨i pono hɛn, daa pili ə́ yəi. Kaa hvo kpɔ kɛa pai kɛi diɛ.

¹⁵ Ɲɔw-kɛ-nuąi ə kɛli di kɛ a hɛn gɔw nąmįną, ɲɔwi tii hu, di kɛ tɔɔni kwɛaa la, diɛ ɲɔw ŋą mɔ̨nɔ̨i ɓa. Di kɛi wɔlɔi diɛ di woolaa,

¹⁶ di kɛli kɛ mą: «Ee kə, kpalo! Ə kə gbalo kɛnɛ̨ɛ̨! Daa-leei kɛ mąąyiliɛ a həɠə hukpɛɛ, a nįnį-kɔlɔ həɠə kpɔluɔ gbələtətəi, ɲɛ̨itɔɔ a hɛni, a kúwɔ-kwɛnį lɛlɛɛɠaa,

¹⁷ ya ka, lɛɛlɛ tanɔ̨n ɲee mu lɔ ɓə di ɉɛn gɔwɠaa tii hukala la!» Ɛlɛɛ, gələn ɉiɛ-nuą, da nuąi kpɔ kɛli hiɛ kulɔ nąą kwɛlɛ, ɲá-kóló kɛ nuą, ɛlɛɛ, da nuąi kpɔ kɛli di kɔ̨nɔ̨n ɉɔlɔɓo gboloyá ɲą, di kɛ tɔɔni kwɛaa la,

¹⁸ diɛ gboo təli, da kɛli daai tii kələn nwɔ̨n nulu kaa, diɛ kɛ mą: «Taalee lə kɛɛ kpɔ ɓə, da pɛli kɛ gɔɔn ɉii daa-lee kɛnɛ̨i ŋɛ̨i ɓa?»

¹⁹ Diɛ pɔ́lɔ́ pu di nwuɔ̨, diɛ tomą, diɛ di woolaa, diɛ kɛ: «Ee kə kpalo! Ə kə gbalo kɛnɛ̨ɛ̨! Daa-leei kɛ ɉu ɲąąnɛ̨ɛ̨ pələ, ə nuąi kpɔ di wɔɔ gələnŋaa di kɛ gboloyá ɲą, di yeela holoon, ya ka, lɛɛlɛ tanɔ̨n ɲee mu, aa hvɛɠɛ a ɉɛn tii kəlee.»

²⁰ Yələkɔlɔn, 'kwəinɛ̨ɛ̨ kulɔ ɉukala mɛ̨nį hu! Ɛlɛɛ, káá kpɛlimąn a, nu mąąhəɠɛɛɠaa, a gɛlaɠaa, ɛlɛɛ, a Yálá kwəi mɛ̨nį hukulɔ nuą, mąąhɔlɔɓo, giti teei Yálá ə mo, aa ká mąą mɛ̨nį hu haŋąn.

²¹ Ya ɓə, malaka ta ə kwɛni kpuwulu kɛnɛ̨ ta həɠə, ə ɓo yɛ kwɛną, ə bili gboloyá hu, yɛ mą: «Bələ ɓə di kaa pai Babilonə taalee pilii la a hvaŋą; di hva kɛa gaa.

²² Ɛlɛɛ, gwɛnįn ɲɔw nuą di wɔɔ wələ woo, da vɛ́likɛ nuą, mɔ́ɔ́-tulu hvɛɛ nuą, dulu hvɛɛ nuą, di hva kɛa da woo mɛ̨n ə́ pɔɔli. Yɛlɛkɛmun da lɔpee, yɛlɛ kóló ta lɔpee, di hva kɛa gaa ə́ pɔɔli. Ɛlɛɛ, kwənąi hiɠɛ tín, hva tɔɔ ə́ pɔɔli.

²³ Labon hva kɛa lən ə́ pɔɔli, hilɛtai nɛ̨ą da mɛlaa; di hva kɛa kwəinɛ̨ɛ̨ kulɔ ə́ pɔɔli, gbala ə tɔɔ, ə́ wɔɔ yɔw-kɛ nuą ɓə kɛ di kpulu hu kɛnɛ̨ɛ̨ yɛnɛ̨ɛ̨ nąą kəlee, gbala ə tɔɔ, ə́ wɔɔ pənən gɛ nuąi di hįi tamąą ɲąąhɛn.»

²⁴ Ɛlɛɛ, ə́ pɔɔli ɓə di Yálá kwəi mɛ̨nį hukulɔ nuą ɲąmą kaa laa, da nu mąąhəɠɛɛɠaa, ɛlɛɛ, da nuąi di di kulɔ a haláá lɔi mɛ̨i, di ɲąmą.