M̀ɛni-lɛɛi 17 - Yálá laawoo hɛɓɛ (dc)

Nwɛlikɛ nɛ̨ɛ̨nu kɛnɛ̨i kiti tee mɛ̨nį

¹ Yili pulu, malaka mɛ̨ihveelɛi tii gbələ kɔ́wɔ mɛ̨ihveelɛ ə kɛ di yee ɲąi, dɔ̨nɔ̨ ə pa, yɛ mą́ą́: «'Pá ɓɛ! Nwɛlikɛ nɛ̨ɛ̨nu kɛnɛ̨i tii heeni gboloyá kwɛlɛ, bələi di pai giti teei la, ŋį́ bələ lɛ yɛ́.

² Yaa tii ɓə lɔi mɛ̨i tɔɔɓɛlaa daa di kpɔwɔ too bɔ nwɛlikɛɛ tii hu, ɛlɛɛ, nwɔ wɛlikɛ lɔɔ tii aa lɔi mɛ̨i nuą, hon.»

³ Ya ɓə Kili ə gbə́ŋə́, ə li a ɲą́ą́ nɔi pun ɉu. Ɛlɛɛ, ŋą́ nɛ̨ɛ̨nu ta kaa, ɉeɛ huwɔ kpɔluɔ gbələtətə ta mɛ̨i, Yálá lalan naaɠaa pɛ̨ɛ̨ nąą kəlee, ɛlɛɛ, nwu ganįn ə ɓo mɛ̨ihveelɛ, mįnɛ̨ ə ɓo pow.

⁴ Nɛ̨ɛ̨nui tii mąą yiliɛ a nįnį-kɔlɔ həɠə kpɔluɔ gbələtətə, mąą puɔ, a hɛni, a kúwɔ-kwɛnį lɛlɛɛɠaa. Hɛni kpələkɔwɔ ə kɛ yee ɲą, naahvɛɛ a mɛ̨nį kɔhɔɓoɔɠaa: a ŋą wɛlikɛ mąąliɓi túwɔ́ɠaa.

⁵ Laa ta pɛ̨ɛ̨ dɔwɔla, a mɛ̨nį hu kpinįɛ, diɛ kɛ mą: «Babilonə daa-lee kɛnɛ̨i, yai a nwɛlikɛ nɛ̨ąą, ɛlɛɛ, da mąąliɓi túwɔ́ɠaai kpɔ lɔi mɛ̨i, di lee.»

⁶ Ŋą́ nɛ̨ɛ̨nui tii kaa, mąąhəɠə nuą da Jesus ŋą kɛlaɠaa di ɲąmą aa ɉon yɛ lɔɔ. Gaai ŋį́ mo, gwə́i ə pili kpɔ mą́ą́ kɛnɛ̨.

⁷ Ya ɓə, malaka yɛ mą́ą́: «Lə mɛ̨nį ɓa ə́ kwəi aa pili yɛ́? Gáá pai nɛ̨ɛ̨nui tii, da ɉuwɔi tii nwun ganįn gaa mɛ̨ihveeɛ, ɛlɛɛ, mįnɛ̨ ə ɓo pow, ŋą mɛ̨nį hu kpinįɛ, hukulɔi yɛ́.

⁸ Ɉuwɔi tii ə́ gaa, ə wɔlɔ kɛ laa, kɛlaa hvo kɛa laa. Gaa pai kulɔi nowa kpon gweaa hu, ə li nwun napili hu. Ɛlɛɛ, lɔi mɛ̨i nuąi di laa hvo kɛ pɛ̨ɛ̨ li ɓalo hva kpɛɛ hɛɓɛ́ hu, ə həɠə kpɔ yɛnɛ̨ɛ̨ kɔwɔ tɔɔ yələ ɓa, di kwəi kaa pai pilii diɛ, da ɉuwɔi tii kaai da mo, mąąhɔlɔɓo, ə kɛ laa, hvo kɛa laa, kɛlaa, gaa pənəi ə pa.

⁹ «Nwun-gɛ-ɉulaa da kilikɛɲəilaa ŋą yələ ka: Nwun ganįn mɛ̨ihveelɛi tii kaa a ɲee kpɛa-kpɛaa mɛ̨ihveelɛi nɛ̨ɛ̨nui tii kaa heeni nwuɔ̨, di kaa lɔ nwɔ̨nɔ̨ a tɔɔɓɛlaa mɛ̨ihveelɛ.

¹⁰ Nɔɔli aa too, mɛ̨idanąą kaa tɔɔlaa kɛi, mɛ̨ihveelɛnąą hvo ni pa li; kɛlaa, ɓɛlɔwai gaa pai pai la, gaa lɔ pai heei hva lamun naa.

¹¹ Ɉuwɔi tii wɔlɔ kɛ laa, ɛlɛɛ, hvo kɛa laai, yaa kpinįi ɓə a dɔɔmun mɛ̨ihaaɓanąą. Naa kaa lɔ nwɔ̨nɔ̨ dɔɔɓɛlaa mɛ̨ihveelɛi tii pɔ, ɛlɛɛ, yɛ li nwun napili hu.

¹² «Mįnɛ̨ powi tii ə́ gaa, tɔɔɓɛlaa pow li, yiiɠaai di hvo ni tɔɔlaa hɔlɔɓo li, kɛlaa, di kaa pai dɔɔlaa hvaŋą ɲąąkwɛlɛi da ɉuwɔi tii ni lɛɛlɛ tɔ̨nɔ̨ yee mu.

¹³ Di kwəi kiliŋąhiɛ kaa tanɔ̨n, ya ɓaa: Di di hvaŋą kəlee lɔ ɉuwɔi tii ŋą tiɓo hu.

¹⁴ Di kaa pai kɔ́ pɛlɛi Mɛlaa Lon ma, ɛlɛɛ, Mɛlaa Lon ɲee kaa pai tɛɛi diɛ, mąąhɔlɔɓo, ya ɓə gaa a nąmuɠaa kəlee di Nąmu, hééɓoɠaa di wɔ Hééɓomun, ɛlɛɛ, yaa, da nuą ə di təli, ə di həɠə ɉu, ɛlɛɛ, tələnmo nuą, da diɛni di yee kaa pai tɛɛi mą.»

¹⁵ Yili pulu, malaka yɛ mą́ą́: «Ɲáɠaa tii ə́ gaa ɓɛi nwɛlikɛ nɛ̨ɛ̨nui tii heɛ ə kɛ laai, di kaa a huwuɠaa, a nu kpuluɠaa, hįi lɔiɠaa, ɛlɛɛ, da hįi wooɠaa.

¹⁶ Mįnɛ̨ powi tii ə́ gaa, ɛlɛɛ, da ɉuwɔi tii, di kaa pai wɛlikpɛɛmąą laa kulɔi a nwɛlikɛ nɛ̨ɛ̨nui, di kaa pai mąą hɛnŋąa kəlee kulɔi mą, di nɛɛ a gbuwulu. Di kaa pai ɉuwɔ mįi, ɛlɛɛ, di gələn a nwɔ̨n.

¹⁷ Mąąhɔlɔɓo, Yálá aa ɉuwɔi tii kwəi kili pɔ mɛ̨nį kɛɛ too di lii hu, a gwəi kili tanɔ̨n, ya ɓaa, di di hvaŋą da di wɔɔ huwalawalalaa lɔ ɉuwɔi tii ŋą tíɓo hu, ə lɛɛ ɉu, Yálá laa woo pɔ mɛ̨nį ə kɛ.

¹⁸ «Ɛlɛɛ, nɛ̨ɛ̨nui tii ə́ gaa, daa-lee kɛnɛ̨i hééɓolaa kɛi, lɔi mɛ̨i tɔɔɓɛlaa kəlee mɛ̨i, yaa li.»