M̀ɛni-lɛɛi 16 - Yálá laawoo hɛɓɛ (dc)

Gbələkɔwɔ mɛ̨ihveelɛi

¹ Yili pulu, ŋį́ woo kɛnɛ̨ ta mɛ̨n yɛ həɠə Yálá hee pɛlɛ́ mu, yɛ kɛ malaka mɛ̨ihveelɛi tii diɛ: «'Ká li, 'ká Yálá ŋą liiŋąnwąną kpələ-kɔ́wɔ mɛ̨ihveelɛi tii hu ɓo lɔi mɛ̨i.»

² Ɛlɛɛ, malaka tɔlɔɔ ə li, ə nwɛi hu ɓo lɔi mɛ̨i. Nuąi ɉuwɔi tii ŋą kɔ́lɔn ɉɛn ə kɛ diɛ, ɛlɛɛ, diɛ kwɛli hvilɛn mąąnįnįn ma, pala ɲɔ̨nwɔ̨ɔ̨ ə tee diɛ.

³ Malaka veelɛnąą ə nwɛi hu ɓo gboloyá ɲą. Ɲá ə kɛ kpɔ yɛ nu powa ɲąmą, ɛlɛɛ, nɔ̨ɔ̨-nɔ̨ɔ̨ hɛnŋaai kpɔ kɛ gboloyá hu di haa.

⁴ Malaka ɉaaɓanąą ə nwɛi hu ɓo ɲá-leeɠaa ɲą, ɛlɛɛ, da ɲá nwun gulɔiɠaa ɓa: ə mąą pənə a ɲąmą.

⁵ Ɛlɛɛ, ŋą́ yáɠaa di wɔɔ malaka woo mɛ̨n, yɛ mą: «Ə́ haŋąąi, yɛ́i laa, yɛ́i pai kɛ laa, mąąhəɠəmun, mąąhɔlɔɓo, yáá ə́ wɔɔ kitii tee,

⁶ gbala ə tɔɔ, daa nu mąąhəɠɛɛɠaa da ə́ kwəi mɛ̨nį hukulɔ nuą ɲąmą pu, ɲąmą lɔ ɓə yáán ə́ dɔɔ di la, diɛ gbələ. Yili kpɔ ɓə di gwɛli!»

⁷ Ɛlɛɛ, ŋį́ ɉaláá kulɔi woo mɛ̨n, yɛ mą: «A tɛ̨ą, Hééɓo kəlee Nąmu Yálá, ə́ wɔɔ kitiɠaa haŋąąi, ɛlɛɛ, yɛ ɓo a tɛ̨ą.»

⁸ Malaka nąąnną ə nwɛi hu ɓo vóló ɓa. Di mąąlaa tɛɛ bɔ, yɛ pɛli nu kanŋaa kələn ɉii a nwɔ nwɔ̨n.

⁹ Ɛlɛɛ, nu kanŋaa di kələn a wələən gɛnɛ̨; Yálái tii ɲee a pɛli mɔ̨nɔ̨ɠaa tii diɛ, diɛ naa ɓɛlɛ too, kɛlaa, di hvo gɛ di hvo di tuwɔ pələ mąąhvalin, di hvo mąąwiɛlaa tɛɛ bɔ.

¹⁰ Malaka nɔɔlinąą ə nwɛi hu ɓo ɉuwɔi tii ŋą tɔɔkpəlin ma. Nwɔ tɔɔlaai ə too kpinį hu. Nuą diɛ di laa kɔ́lɔ ɲiin a mɔ̨nɔ̨.

¹¹ Diɛ yələkɔlɔn ɉu Yálá lalan, mɔ̨nɔ̨i tii di kaa mįi mąą mɛ̨nį ɓa, ɛlɛɛ, da di wɔ palaɠaai mąą mɛ̨nį ɓa, kɛlaa, di hvo gɛ di hvo di tuwɔ́ pələ mąąhvalin.

¹² Malaka mɛ̨idanąą ə nwɛi hu ɓo Eufratə ɲálee ɲą: Ɲá ə kpala, ə kɛ a pələ dɔɔɓɛlaai həɠəi vóló kulɔi pələ di tɔwɔ.

¹³ Ə kɛ lɔ tii, ŋį́ ɲįnɛ̨n ɉaaɓa kaa, di ɓo yɛ, gbəŋə, diɛ kulɔ mąąɲɔw-hɛn tii la, ɉuwɔi tii la, ɛlɛɛ, da nuąi di kpɔwɔ kɛ a Yálá kwəi mɛ̨nį hukulɔ nuą di la.

¹⁴ Di kɛ a ɲįnɛ̨nŋaa di wɔ kiliɠaa. Di kɛli kwɛlɛɛn mɛ̨nįɠaa kɛ, ɛlɛɛ, də li kpɔ yɛnɛ̨ɛ̨ tɔɔɓɛlaa kəlee pɔ, əgɛ, di di ɲąąkpɔn, diɛ pa pɛlɛi Hééɓolaa kəlee Nąmu Yálá ɓa, a gɔ-kɔ hvóló kɛnɛ̨i.

¹⁵ 'Ə́ ɲɛ̨i hee tai, gáá pai yɛ nwuɔ̨mun. Nwun na nɛ̨ɛ̨mun maa, nui a lɛɛ a ɲɛ̨i, ɛlɛɛ, ə nwɔɔ həɠəi laa hɔnmo, əgɛ, hvo pa nəi lɛɛ a gbuwulu, nwumɛ̨ yɛ tɛ la.

¹⁶ Ɲįnɛ̨nŋaa tii di dɔɔɓɛlaa kəlee ɲąąkpɔn ɓɛi da kɛ mą Hebreu woo hu: «Harmagedɔn».

¹⁷ Malaka mɛ̨ihveelɛnąą ə nwɛi hu ɓo vaŋą hu. Ɛlɛɛ, woo kɛnɛ̨ ta ə kulɔ Yálá hee pɛlɛ́ mu, yɛ həɠə dɔɔkpəlin ɉu, yɛ kɛ mą: «Aa kɛ tii-o!»

¹⁸ Ə kɛ lɔ tii, mąną-mąnąɠaa di kɛ, wooɠaa di tɔɔ, ɛlɛɛ, yələgbąnąąɠaa ə pola, ɛlɛɛ, lɔi ə kpɛlin ɉuwu ta ɓo, ɲɔ̨nwɔ̨mąn hvo ta kɛli ə həɠə kpɔ nu kan ŋą yɛnɛ̨ɛ̨ kɔwɔ tɔɔ yələ ɓa, ə həli la yiihu ɓa.

¹⁹ Daa-lee kɛnɛ̨i ə wolo ɉu geemɛ̨i haaɓa, lɔi mɛ̨i taaleeɠaa kəlee di wolo. Ya ɓə Yálá ə gili hvilɛn Babilonə kɛnɛ̨ɛ̨ ɓa, əgɛ, ə ŋąliiŋąnwąną lɔɔ gbo nɛ̨nŋąąi tɔɔ na.

²⁰ Tín ɉu lɔiɠaa diɛ gilɛ həɠə, ɛlɛɛ, yeeɠaa diɛ kwɛlɛɛn.

²¹ Hanwon gbuwulu kpɛa-kpɛaa nwiaa yɛ kilə pow-nąąn, yɛ kulɔ yələi yɛ too nu kanŋaa diɛ, ɛlɛɛ, nu kanŋaa di Yálá lalan mɔ̨nɔ̨i tii mąą mɛ̨nį ɓa, mąąhɔlɔɓo, mɔ̨nɔ̨ yili mąąmįnį-mįnŋąąi kɛ kɛnɛ̨.