M̀ɛni-lɛɛi 15 - Yálá laawoo hɛɓɛ (dc)

Malaka mɛ̨ihveelɛi da mɛ̨nį ɲąąnwąnąą gbəli

¹ Ɛlɛɛ, ŋį́ laakpala mąą mɛ̨nį kɛnɛ̨ ta kaa yələ kwəi, ŋį́ malaka mɛ̨ihveelɛ kaa, mɔ̨nɔ̨ mɛ̨ihveelɛ yɛ ɓo di yəi, a gbəli-kpəli, mąąhɔlɔɓo, diɛ ɓə Yálá nwɔ lííholi naa kulɔi kaa di hu.

² Ɛlɛɛ, ŋį́ gboloyá ta kaa ə ɓo yɛ pɛ̨nɛ̨n, ɉumoɔ a nwɔ̨n. Nuąi tii di yee ə tɛɛ ɉuwɔi tii ɓa, da mąąnįnįn, da naa nwɔ kwɛdɛn ɉɛɓɛ́ kɔw di mɛ̨i, di ɓo tɔɔni bɛ̨nɛ̨n galan gboloyái tii mɛ̨i, Yálá ŋą gwɛnįnŋaai ə ɓo di yee ɲą.

³ Diɛ Yálá ŋą tímun Moisə ŋą wələi too, ɛlɛɛ, da mɛlaa lon ŋą wələi; diɛ kɛ mą: «Ku Nąmu Hééɓolaa kəlee Nąmu Yálá, gɛmɛ̨nįɠaa kɛnɛ̨i nɛlɛɛ. Ŋą pələɠaa kəlee haŋąąi a tɛ̨ą, yai a huwu kəlee nwɔ Hééɓomun

⁴ Ną́mu, gbɛɛ ɓə hva pɛli ɲɔwi yɛ́, ɛlɛɛ, hvo mąąwiɛlaa tɛɛ ə́ laa pɔ? Mąąhɔlɔɓo, yɛ́ kɔw tanɔ̨n gbən mə ə́ mąąhəɠɛɛ. Hįi lɔi kəlee kaa pai pai, ɛlɛɛ, di gwɛli hvilɛn yɛ́, mąąhɔlɔɓo, ə́ wɔ kitiɠaai daa too pono ɲą.»

⁵ Yili pulu, ŋį́ ɲɛ̨́i hee, ŋį́ Yálá hee pɛlɛ́i tii yələkɔlɔn ɉu, yai gələ lon gaa mu, ŋį́ gaa, naa ə ɓo,

⁶ ɛlɛɛ, malaka mɛ̨ihveelɛi tii mɔ̨nɔ̨ mɛ̨ihveelɛi ə kɛ di yəi, di kulɔ Yálá hee pɛlɛ́ mu; di mąą həɠə yɛ kwələ kpɔ pə-pə, yɛ lən, di hąą yiliɛ a hɛni.

⁷ Ɉuwɔ nąąn tii dɔ̨nɔ̨ ə hɛni kpələ-kɔ́wɔ mɛ̨ihveelɛ tɛɛ malaka mɛ̨ihveelɛi tii pɔ, naahvɛɛ a Yálái a vúlumąą ɲɛ̨n deei hvo mą, ŋą liiɲąnwąną.

⁸ Ɛlɛɛ, Yálá hee pɛlɛ́ laa ə hvɛɛ a lulu, Yálá nwɔ mąąwiɛlaa, da ŋą yəi kɛnɛ̨laa mąą mɛ̨nį ɓa. Ɛlɛɛ, nui lɔpee ta hva pɛli kɛ lɔi yálá hɛlɛ́n, ə lɛɛ ɉu, mɔ̨nɔ̨ mɛ̨ihveelɛi tii malaka mɛ̨ihveelɛi tii yəi, bɔ mɛ̨nį ə kɛ.