M̀ɛni-lɛɛi 14 - Yálá laawoo hɛɓɛ (dc)

Mɛlaa lon da nuą di nwun mąąɓoɔ

¹ Ɛlɛɛ, ŋą́ ɲɛ̨́i hee lɔ, ŋį́ Mɛlaa Lon gaa tɔɔni Siɔn yee nwuɔ̨, ɛlɛɛ, da nu waa-nwun-dɔ̨nɔ̨-ɲee-nąąn-kɔw-nąąn (144.000) diɛi naa, da Nąn naa pɛ̨ɛ̨i di tɔwɔla.

² Ɛlɛɛ, ŋą́ woo ta mɛ̨n yɛ həɠə yələ kwəi, yɛ yálee kɛnɛ̨ huluun din, yɛ tulɔ tuwɔ tin gɛnɛ̨, ɛlɛɛ, nwooi tii ŋą́ mɛ̨n, ə kɛ yɛ hvɛ́li kɛ nuą da di yee pu di wɔɔ gwɛnįnŋaai ɲą, diɛ ɲɔw.

³ Di kɛli wələ nįnɛ̨ too dɔɔkpəlin niila, ɉuwɔ nąąn tii liila, ɛlɛɛ, da galanɉonŋaa tii liila. Ɛlɛɛ, nui lɔpee ta hva pɛli nwələi tii mąąkwɛlii, ə kulɔ lɔ, nu waa-nwun-dɔ̨nɔ̨-ɲee-nąąn-kɔw-nąąn (144.000) tii, diɛi di nwun mąą aa ɓo, diɛ həɠə lɔi mɛ̨i.

⁴ Di hvo di mąąliɓi li a nɛ̨ɛ̨nu mɛ̨nį, mąąhɔlɔɓo, di hvo nɛ̨ɛ̨nu mɛ̨nį hu kɔlɔn. Di hvilɛnŋąąi mɛlaa Lon bulu, ɓɛi aa kɛli li laa, diɛ ɓo bɔ. Diɛ ɓə di nwun mąą aa ɓo nu kanŋaa lɔwai, yɛ dɔɔ dɔwɔɠaa a Yálá nwɔɔ, ɛlɛɛ, da Mɛlaa Lon,

⁵ ɛlɛɛ, lɛɛ mɛ̨nį hvo kulɔ li di la, hon nɔpee hvo diɛ.

Di giti mɛ̨nį laa həli

⁶ Ɛlɛɛ, ŋį́ ɲɛ̨́i hee, ŋį́ malaka ta kaa, yɛ koon gbɔ ɲələ kwəi. Yálá-taa wɛlɛɛ lɛlɛɛ ə kɛ ɲəi, yɛ pa naa həlii lɔi mɛ̨i nuą diɛ: hįi lɔi kəlee, nu huwu kəlee, hįi wooɓo nuą kəlee.

⁷ Ə kɛli mo a nwoo kɛnɛ̨ yɛ kɛ mą: «'Ká ɲɔw Yálá ɓa, ɛlɛɛ, 'ká mąąwiɛ, mąąhɔlɔɓo, ŋą kuui aa həli, ŋą kitii tee ɲələ aa həli. 'Ká gwɛli hvilɛn yələkɔlɔn da lɔi, gboloyá da yá nwun gulɔiɠaa di pɛlimun ma.»

⁸ Ɛlɛɛ, malaka veelɛnąą, ə lɛɛ bulu, yɛ mą: «Aa too, aa too! Babilonə daa-lee kɛnɛ̨i aa too! A yai lɔɔ tɔɔ lɔi kəlee la, a nwɔ wɛlikɛ lɔɔ kpəɠiɛi.»

⁹ Ɛlɛɛ dakpɛli, a malaka ɉaaɓanąą, ə lɛɛ nąą pulu, ə tomą kpɔ a nwoo kɛnɛ̨ɛ̨, yɛ mą: «Nui a kwɛli hvilɛn ɉuwɔi tii ɓa, da mąąnįnįn, ɛlɛɛ, di gɔlɔn ɉɛn kɛ dɔwɔla, awala kɛ tii ɲee ɓa,

¹⁰ mąą nu yaa kpɛlimąn, gaa pai Yálá ŋą lííholi lɔɔi ta kpələi, yai da bu ŋą lííholi kpələ-kɔwɔi hu, di hva ɉumu, ɛlɛɛ, gaa lii mɔ̨nɔ̨ kɔlɔn ɉii nwɔ̨n maɠa hu, malaka mąąhəɠɛɛɠaa da Mɛlaa Lon di ɲɛ̨i ɓa.

¹¹ Di mɔ̨nɔ̨ɓo nwɔ̨n nulu a tɛ, ɲɛ̨n deei hvo mą, ɛlɛɛ, hvįi tɔɔ hva kɛ diɛ kpinį pɛlɛɛ hvóló ɓa, a diɛi tii da kɛ kwɛli hvilɛn ɉii ɉuwɔi tii ɓa da mąąnįnįn, ɛlɛɛ, da nui lɔpee naa ŋą kɔlɔn ɉɛn gaa mą.»

¹² Nu mąąhəɠɛɛɠaai di yee kąnąnŋąą Yálá ŋą tíɓoɠaa diɛ, ɛlɛɛ, da Jesus ŋą laa na laa ɓa, di hvaŋąlɔ yələ ka.

¹³ Ɛlɛɛ, ŋą́ woo ta mɛ̨n yələ pələ, yɛ kɛ mą́ą́: «'Bɛ̨ɛ̨, yɛ mą: ‹Nuąi daa haa yiihu gu Nąmu hu, di nwun na nɛ̨ɛ̨ ɓə!›» Yálá nwɔ Kilii yɛ mą: «Tɛ̨ą li! Da di hvįi tɔɔ di wɔɔ mɔ̨nɔ̨ɠaai diɛ, mąąhɔlɔɓo, di kɛ-mɛ̨nįɠaa hvilɛnŋąąi di pulu.»

Lɔi kiti tee mɛ̨nį

¹⁴ Ɛlɛɛ, ŋį́ ɲɛ̨́i hee, ŋą́ tulɔ kpinįn gwɛlɛɛ ta kaa, ɛlɛɛ, dulɔ kpinįn tii mɛ̨i pələ, nu ta ə kɛ laa, yɛ nu lon. Hɛni ɓɔlɔ ə ɓo nwuɔ̨, mɔ̨nun-dee ɓowa ɲąąliɛɛ ə ɓo ɲəi.

¹⁵ Yili pulu, malaka takpɛli ə kulɔ Yálá hee pɛlɛ́ mu, ə tomą kpɔ a nwoo kɛnɛ̨, nui tii kɛ heeni dulɔ kpinį mɛ̨i, bɔ pələ, yɛ mą: «'Yɛ́ mɔnun-dee ɓowai pili ə́ yee mɛ̨i, ə́ mɔnun dee la. Mɔnun dee yələ aa ɉəli, hvo gaai, lɔi mɛ̨i mɔnun aa mɔ̨n.»

¹⁶ Nąąlɔwai, nui tii kɛ heeni dulɔ kpinįn mɛ̨i, ə nwɔ mɔ̨nun-dee ɓowai hiɛ lɔi mɛ̨i, ɛlɛɛ, ə lɔi mɛ̨i mɔ̨nun gəlee tee.

¹⁷ Yili pulu, malaka takpɛli ə kulɔ Yálá hee pɛlɛ́i yələkɔlɔn ɉu, mu. Yaa kpɛlimąn, mɔ̨nun-dee ɓowa ɲąąliɛ yɛ ɓo ɲəi.

¹⁸ Yili pulu, malaka takpɛli ə həɠə, ɉaláá kulɔi. Ə kɛli nwɔ̨n ɲąąwooɓo, ɛlɛɛ, ə tomą kpɔ a nwoo kɛnɛ̨ɛ̨, nui tii mɔ̨nunu-dee ɓowa ɲąąliɛ ə kɛ ɲəi, bɔ pələ, yɛ mą: «'Yɛ́ mɔ̨nun-dee ɓowa ɲąąliɛi pili ə́ yee mɛ̨i, ə́ lɔi mɛ̨i viɲəɠaa ɓá kulɔ la, hvo gaai, daa kpɔlu.»

¹⁹ Malakai tii ə nwɔ ɓowa ɲąąliɛi hiɛ lɔi mɛ̨i, ə lɔi mɛ̨i viɲə gbɔlu kəlee kulɔ ɉu, ə gbɔlu kəlee pu gbɔwɔ́ kɛnɛ̨ɛ̨i hu, yai a Yálá ŋą liiɲąnwąną kɔwɔ́-lai.

²⁰ Di viɲəɠaa tii yá kulɔ gɔwɔ́-la daa pulu pələ, ɛlɛɛ, ɲąmą ə kulɔ, ə tɛ kpɔ hoo-laa-kwɛli ɓa, ə laa nɔi mɛ̨i a kilə waa tɔ̨nɔ̨ pulu nwun mɛ̨ida.