M̀ɛni-lɛɛi 13 - Yálá laawoo hɛɓɛ (dc)

Huwɔ hveelɛ

¹ Yili pulu, ŋą́ huwɔ ta kaa yɛ kulɔ gboloyá hu, mįnɛ̨ ə ɓo nwuɔ̨ pow, nwun ganįn ə ɓo mɛ̨ihveelɛ, mįnɛ̨ɠaa tii, tɔɔɓɔlɔ pow ə ɓo di nwuɔ̨, ɛlɛɛ, laa pɛ̨ɛ̨ nwun ganįnŋaa tii diɛ, a Yálá lalan naaɠaa.

² Ɉuwɔi tii ŋį́ gaa, gɛ pələ ə kɛ yɛ kwɛ́li, gɔwɔɠaa diɛ ɓo yɛ yáwolo, ɛlɛɛ, naaləi ə ɓo yɛ yala. Ɛlɛɛ, mąąɲɔɔ-hɛn tii ə nwɔ yəi kɛnɛ̨laa tɛɛ bɔ, ə bɛlɛ nwɔ tɔɔkpəlin ma, ɛlɛɛ, da ɲąąwooɓolaa kɛnɛ̨ɛ̨ ta.

³ Nwun ganįnŋaai tii, dɔ̨nɔ̨ ə kɛ yɛ, da nwąną kpɔ baa pələ ɓa, kɛlaa, nwąną kɛnɛ̨i tii di mo, bala ə kpɛɛ. Lɔi nąą kəlee kwəi ə pili diɛ, di hvilɛn ɉuwɔi tii pulu.

⁴ Ɛlɛɛ, diɛ kɛa kwɛli hvilɛn mąąɲɔw-hɛn tii ɓa, gbala ə tɔɔ, aa kɛ ɲąąwooɓolaa tɛɛ ɉuwɔi tii pɔ, ɛlɛɛ, diɛ kwɛli hvilɛn ɉuwɔi tii ɓa, diɛ kɛ mą: «Gbɛɛ ɓə gaa yɛ ɉuwɔi ŋɛ̨i, ɛlɛɛ, yɛ pɛli kɔ pɛlɛi mą?»

⁵ Di hvaa laaləi kɛ ɉuwɔi tii pɔ, yɛ pɛli, huɲąŋą kɛnɛ̨ wooɠaa ɓoi, da Yálá lalan nwooɠaa, ɛlɛɛ, di hvaŋą tɛɛ bɔ, ə gɛ-mɛ̨nį kɛ ɲąnįn bow-nąąn-kɔw-hveelɛ yee mu.

⁶ Ə naa pili yələi, yɛ Yálá lalan nwooɠaa ɓo, yɛ Yálá laa ɓɛlɛ too, da vɛli pɛlɛ́, ɛlɛɛ, da yiiɠaai kpɔ di heɛ kaa yələkɔlɔn ɉu.

⁷ Di mąąlaa tɛɛ bɔ, ə gɛ, ə kɔ́ pɛlɛ mąąhəɠə nuą diɛ, ɛlɛɛ ɲee ə tɛɛ diɛ, ɛlɛɛ, di hvaŋą tɛɛ bɔ nu huwu kəlee mɛ̨i, nu kəlee mɛ̨i, da hįi woo ɓo nuą kəlee.

⁸ Lɔi mɛ̨i heeɓonuą kəlee diɛ kwɛli hvilɛn mą, diɛi kpɔ tii di laa hvo kɛ pɛ̨ɛ̨ li mɛlaa lon di gulɔ a haláá, ŋą yɛnɛ̨ɛ̨ kɛ hɛɓɛ́i hu, ə həɠə kpɔ yɛnɛ̨ɛ̨ kɔwɔ tɔɔ yələ ɓa.

⁹ Nui nwəli kaa mą, ə mɛ̨nį ŋɛ̨i mɛ̨n a nɛlɛɛ!

¹⁰ Nui mąąnɛ̨ɛ̨ ə li luwɔlaa hu, gaa pai lii luwɔlaa hu. Nui mąąnɛ̨ɛ̨ di pa baa a ɓɔwa kwɛaa, ɓɔwa kwɛa lɔ ɓə pai baai. Nu mąąhəɠɛɛɠaa kąnąn mɛ̨nį laa na laa ɓa, ɲələ ka.

¹¹ Ya ɓə, ŋį́ huwɔ takpɛli kaa yɛ kulɔ lɔi mu. Mįnɛ̨ ə ɓo nwuɔ̨ hveelɛ yɛ ɓɛlaa lon, kɛlaa, yɛ hvaa yɛ mąąɲɔw-hɛn.

¹² Ɉuwɔ tɔlɔɔi tii nwɔ hvaŋąi ɓə ə kɛli kólo kɛ ɉu ɲɛ̨i mu. Ə kɛli hɔlɔhimą laa lɔi mɛ̨i heeɓo nuą mɛ̨i, diɛ kwɛli hvilɛn ɉuwɔ tɔlɔɔi tii di nwąną baa pələ ɓa, yai bala ə kpɛɛ, mą.

¹³ Ə kɛli kwɛlɛɛn mɛ̨nį kpɛa-kpɛaa kɛ, yɛ nwɔ̨n gulɔ yələi yɛ ɲɛɛ lɔi ɓa, nu kəlee ɲɛ̨i ɓa.

¹⁴ Ə kɛli lɔi mɛ̨i nuą nwun ɉu lan a gbalo mɛ̨nįɠaai di gɛɛ mąą laa tɛɛ bɔ, yɛ gɛ ɉuwɔi tii ɲɛ̨i mu. Ə mo diɛ, yɛ kɛ, ɉuwɔi tii di nwąną a ɓowa kwɛaa, ɛlɛɛ, bala ə kpɛɛi, di mąąnįnįn bɛli, di dɔɔ.

¹⁵ Di mąąlaa tɛɛ bɔ, əgɛ, ə ɉuwɔ tii mąąnįnįn nɔ̨ɔ̨ too ɉu, yɛ pɛli hvaai, ɛlɛɛ, nui a wala kwɛli hvilɛn ɉuwɔi tii mąąnįnįn ma, yɛ pɛli baai.

¹⁶ Nu kəlee kpɔ, lɛapɛlɛɛ mąn, nu kpɛa-kpɛaa mąn, hɛn gɔw nąmu, yeehvowolomun, nui gbɔwɔ yee kɔnma, ɛlɛɛ, luwɔ, ə hɔlɔhima laa di mɛ̨i, ə gɛ, ə gɔlɔn ɉii kɛ di ɓa-mįi-yee ɓa, awala kɛ tii, di tɔwɔla.

¹⁷ Ɛlɛɛ nwɔ̨nɔ̨, nui lɔpee ta hva pɛli lɔwɔ́tɔɔi a wala kɛ tii hɛn da yai, akɛ ɉuwɔi tii kɔlɔn ɉɛn və mą, a wala kɛ tii, naa heekpəlina kɛ hɛɓɛ́ kɔw hvo mą.

¹⁸ Mɛ̨nį hukpɛ kili nwɛi nąą ka kɛa; nui nwun gaa ɉu, ya ɓə a pɛli ə ɉuwɔi tii laa hɛɓɛ́ kɔw ɉeekpəlina kɛi, mąąhɔlɔɓo, ɉeekpəlina kɛɛ, a kɛ a nu kan naa; ɛlɛɛ, gwɛdɛn gɔwi tii ɓaa nwun-mɛ̨ida-ɲee-mɛ̨ida-kɔw-mɛ̨ida.