M̀ɛni-lɛɛi 12 - Yálá laawoo hɛɓɛ (dc)

Mąąɲɔw-hɛn da nɛ̨ɛ̨nu

¹ Mɛ̨nį kɛnɛ̨ ta ə kɛ yələ kwəi, nɛ̨ɛ̨nu ta ɓə, mąą həɠə ə kɛ a hvóló, ɲąnįn ə ɓo gɔwɔ mu, ɛlɛɛ, tɔɔɓɔlɔ ə ɓo nwuɔ̨, mąą puɔ a pɛmɛ̨lɛ̨n-gɔw pow kɔ́w hveelɛ.

² Nɛ̨ɛ̨nui tii ə kɛ a koonɛ̨ą, naa yɛɛi lɔwai aa həli kɛa kɛ, gwəinwąną aa hee ɉu yɛ wɔlɔ.

³ Ya ɓə, mɛ̨nį takpɛli ə pənə ə kɛ yələ kwəi, mąąɲɔw-hɛn kɛnɛ̨ ta ə kulɔ yələ kwəi, gbɔluɔ yɛ nwɔ̨n. Nwun ganįn ə ɓo ɲą mɛ̨ihveelɛ, ɛlɛɛ, mįnɛ̨ ə ɓo pow, tɔɔɓɔlɔ mɛ̨ihveelɛ ə ɓo nwun ganįn dɛitɛi tii ɓa.

⁴ Yələ kwəi pɛmɛ̨lɛ̨n-gɔwɠaa ɓɛlaɓoɔ ɉu haaɓa, nwon ə bələ tɔ̨nɔ̨ tuluun, ə bu nɔi ɓa. Mąąɲɔw-hɛn tii ə kɛ tɔɔni gwəinwąną kɛ nɛ̨ɛ̨nui liila, yɛ a naayɛɛ lɔ, ə nokolo mįi.

⁵ Nɛ̨ɛ̨nui tii ə naayɛɛ a hulɔnu, yai pai hįi kəlee ɲąąwooɓoi a kwɛli hvaɠa. Kɛlaa, di non ɉəɠə də li la Yálá pɔ, ɛlɛɛ, di ɉee nwɔ tɔɔkpəlin hu.

⁶ Ya ɓə, nɛ̨ɛ̨nui tii ə pu, ə li nɔi pun ɉu, ɓɛi Yálá ə nąą pɛli mąą mɛ̨nį ɓa, əgɛ, ə lɛɛ laa, diɛ gɔ̨nɔ̨n gɛ, hvóló waa tɔ̨nɔ̨ pulu nwun veelɛ-ɲee-mɛ̨ida yee mu.

⁷ Ya ɓə, kɔ́ kɛnɛ̨ ə muhəɠə yələ kwəi, Mikaɛlə ɛlɛɛ, da nwɔ malakaɠaai di kɔ́ pɛlɛ mąąɲɔw-hɛn tii ɓa. Ɛlɛɛ, mąąɲɔw-hɛn yaan ə pɛlɛ diɛ da ɲee pɔɠaa,

⁸ kɛlaa, mąąɲɔw-hɛn yee hvo lɔ, ɉeei hvo kɛa hɔlɔɓo yələ kwəi da ɲee pɔɠaa.

⁹ Mąąɲɔw-hɛn gɛnɛ̨i tii, di bili, yai a gaaləi wɔlɔ kɛi, a yai naa ɓaa: nąnį, ɛlɛɛ, ɓilihi, yai a yɛnɛ̨ɛ̨ kəlee ɲąąhɛnmun, di bili ə yɛɛ lɔi mɛ̨i da ɲee pɔɠaa.

¹⁰ Yili pulu, ŋį́ woo kɛnɛ̨ ta mɛ̨n yələ kwəi, yɛ kɛ mą: «Nu ɓalo yələ ka, gu wɔɔ Yálái ŋą tɔɔlaa yələ ka, da ŋą yəi kɛnɛ̨laa, ɛlɛɛ, Kristə ŋą Hééɓolaa yələ ka; mąąhɔlɔɓo, nui kɛ a gu nąn nonnii kálámąɓomun, daa bili, a yai kɛli di kálámąɓo Yálá ɓa a kpinį da hvóló.

¹¹ Kɛlaa, di wɛi, di yee aa tɛɛmą mɛlaa lon ɲąmą haalai, ɛlɛɛ, da nwoo tii di kɛli mąą kɛla hvaa ɓoi. Di hvo kɛ di di wɔɔ yɛnɛ̨ɛ̨ wɛlilakɛ li, ə lɛɛ ɉu di haa.

¹² Yili ɓə gaa mą, yələkɔlɔn, 'ká kwəinɛ̨ɛ̨ kulɔ, ə mą kɛ, káái laa heeni. Kpalo aa ɓɛla lɔi da gboloyá diɛ, mąąhɔlɔɓo, nąnį aa yɛɛ di pɔ, niikələnŋąą gwəi, gili aa pu ɉu, yɛ kɛ, ŋą lɔwai hu hvo kwɛa li.»

¹³ Yii kɛa mąąɲɔw-hɛn tii kili ə pu ɉu yɛ daa bili lɔi mɛ̨i, ə hvilɛn gɛa nɛ̨ɛ̨nui tii naayɛɛ a lon ɉulɔnu, bulu yɛ gbɛ.

¹⁴ Di Kúwɔ koon gbɛa-kpɛaa hveelɛ tɛɛ nɛ̨ɛ̨nui tii pɔ, ə gɛ, ə koon, ə li nɔi pun ɉu, ɓɛi tii di naa pɛli mąą mɛ̨nį ɓa, diɛ gɔ̨nɔ̨n gɛ laa, mąą ə kwɛaa gaaləi tii ɓa, ə lɛɛ ɉu kwɛlan ɉaaɓa da gbulɔ.

¹⁵ Ya ɓə, gaaləi tii ə ɓaɠi a yálee kɛnɛ̨ ta, ə vilɛn nɛ̨ɛ̨nui tii pulu, ə gɛ, ɲá hvaŋą ə ɉəɠə.

¹⁶ Kɛlaa, lɔi ə nɛ̨ɛ̨nui mąąkpɔnmąą ɓo: Lɔi ə naa ɓo, ɛlɛɛ, ə ɲái tii mąąɲɔw-hɛn ə maɠi, ə gəlee kpələ.

¹⁷ Niikələn bələ gwəi nɛ̨ɛ̨nui pɔ, gaaləi ə pənə ə li ə kɔ pɛlɛ, nɛ̨ɛ̨nui lon gbəliɠaai lɛɛ laa diɛ, a diɛi tii di yee kąnąnŋąą kɛ Yálá ŋą tíɓoɠaai diɛ, ɛlɛɛ, da Jesus mąą kɛla hvaa.

¹⁸ Yili pulu, ə li ə tɔɔ gboloyá kwɛlɛ.