M̀ɛni-lɛɛi 10 - Yálá laawoo hɛɓɛ (dc)Malaka da ɉɛɓɛ́ logolo 1 Ɛlɛɛ, ŋą́ malaka takpɛli kaa, vaŋą kɛnɛ̨ɛ̨, ə həɠə yələi ə yɛɛ. Mąą yiliɛ a tulɔ kpinįn, mąąwiɛlaa həɛ dɔwɔla a gbəimiliin, ɲɛ̨ilaai ə ɓo yɛ, hvóló, ɛlɛɛ, gɔwɔɠaa di ɓo mu yɛ nwɔ̨n. 2 Hɛɓɛ́ logolo ta ə kɛ ɲee ɲą, naaɓoɔ. Ə mamįiyee-kɔwɔ tɔɔ gboloyá ɲą, ə gɔɓɛyee-kɔwɔ tɔɔ lɔi mɛ̨i. 3 Ɛlɛɛ, ə tomą kpɔ a nwoo kɛnɛ̨, yɛ yala aa kɛli huluun. Yii kɛa ə huluun tii, yələgbąnąą mɛ̨ihveelɛ di di nwoo tɛ. 4 Yii kɛa tii ɲələgbąnąąɠaa woo ə tɔɔ, ŋą́ kɛ bɔ ŋą́ bɛ̨ɛ̨, ŋį́ woo ta mɛ̨n ɲələi, yɛ kɛ mą́ą́: Nwɛlɛɛi ɲələgbaąnąą mɛ̨ihveelɛi di mo, nɛɛ ə́ kwəi a loo mɛ̨nį, 'hvó bɛ̨ɛ̨. 5 Malakai tii ləi ŋį́ gaa gɔwɔ tɔɔ gboloyá ɲą, da lɔi mɛ̨i, ə mamįiyee tɛ yələi, 6 ə gwɛla, a Nui gaa a húlu ɲɛ̨n deei hvo mą, naa, yai yələkɔlɔn da ɉu hɛnŋaa pɛli, lɔi da ɉu hɛnŋaa, gboloyá da ɉu hɛnŋaa; yɛ diɛ: guu hvo kɛa mą. 7 Kɛlaa, ɓɛlɔwai malaka mɛ̨ihveelɛnąą kaa pai nwɔ tului hvɛɛi la, a pa gɔwɔ tɔɔi yɛ nwɔ tului hvɛɛ, nąąlɔwai ɓə Yálá ŋą mɛ̨nį looŋąą pɔ mɛ̨nį a kɛ la, yɛ bələ ə wɔlɔ mo la ŋą tínuąi a gwəi mɛ̨nį hukulɔ nuą di laaləi. 8 Ɛlɛɛ, nwoo tii ŋį́ mɛ̨n yɛ həɠə ɲələi pələ, yɛ nwɔ̨nɔ̨ mą: «'Li, malaka tii gɔwɔ tɔɔ gboloyá ɲą, dɔɔ lɔi mɛ̨i, ɉɛɓɛ́i tii ɲəi naaɓoɔ, 'ə́ ɉəɠə ɲəi.» 9 Ŋą́ lɛɠɛ malaka ɓa, ŋą́ mąąnɛ̨ɛ̨ gɛ́ kɛ ə ɉɛɓɛ́ lon tɛɛ bɔ́. Yɛ mą́ą́: «Ɉon, ə́ mįi. Gaa pai kɛi a nwąnąą ə́ kwəi, kɛlaa, gaa pai kɛi a nɛ̨ɛ̨ ə́ la, yɛ kwɛin nwulɔ.» 10 Ŋą́ ɉɛɓɛ́ logoloi tii hon malaka yəi, ɛlɛɛ, ŋį́ mįi. Nɛ̨ɛ̨i kɛ ná yɛ kwɛin nwulɔ, kɛlaa, yii kɛa ŋį́ mįi, ə nwąnąą góólon ɉu. 11 Ɛlɛɛ, diɛ mą́ą́: «Hvó kɛli nwɔ̨nɔ̨ ə́ Yálá kwəi mɛ̨nį hukulɔ nu huwuɠaa diɛ, hįi lɔiɠaa diɛ, hįiwooɓo nuą diɛ, ɛlɛɛ, da tɔɔɓɛlaa tamąą.» |