M̀ɛni-lɛɛi 1 - Yálá laawoo hɛɓɛ (dc)Ɉɛɓɛ́ nwun ɲą haɠa woo 1 Mɛ̨nį loɔɠaai Jesus Kristə ə nɛ a kwɛlɛɛ gɛɛ, yai Yálá ə dɛɛ bɔ, yɛ nɛ nwɔ tínuą diɛ, a mɛ̨nįɠaai pai kɛi, ɉu hvo kwɛa li. Ə nwɔ malaka tɔɔ yɛ pa nɛi ŋą tímun Ɉaan ɓa, 2 yai moi yɛ ə gɛɛ tii kaa, hɛa hvo ɉu, Yálá laa woo li, ɛlɛɛ, gaa a Jesus Kristə ŋą kɛla woo. 3 Nwun na nɛ̨ɛ̨mun maa, nui a ɉɛɓɛ́i ŋɛ̨i ɓo, ɛlɛɛ da nuąi da di wəli tɔɔ ɉu woo ɓa, ɛlɛɛ, mɛ̨nįɠaai bɛ̨ɛ̨ ɉu, diɛ di yee kąnąn mą, gbala ə tɔɔ, guu mąą aa kpuɔ. Ɉɛɓɛ́ kɛmun ə gbɔwɔ kiliin 4 Ɲą́ą́ Ɉaan, ɲą́ą́ ɓə ɉɛɓɛ́i ŋɛ̨i tɛɛi gbɔn ɉeei mɛ̨ihveelɛi Asi lɔi hu diɛ. Nɛ̨ɛ̨laa da liilaa ə kɛ ká pɔ, yɛ həɠə, nui gaa laa, yai kɛ laa, yai pai, yɛ həɠə, nįį mɛ̨ihveelɛi ŋą tɔɔkpəlin niila, di yəi, 5 ɛlɛɛ, yɛ həɠə Jesus Kristə yəi, yai a kɛlai a kulɔ nwoo ɓa, yai a nu dɔlɔɔi nwun yɛ kulɔ haa nuą lɔwai, ɛlɛɛ, lɔi mɛ̨i hééɓolaa kəlee di wɔɔ Hééɓomun. A nui gu wɛli kaa mą, yai gu kulɔ gu wɔ nɛ̨ŋɛ̨nŋaa yəi a ɲąmą, 6 ə gu kɛ a tɔɔ nu huwu, a haláá laa həli nuą kpɛa-kpɛaa a Nąn Yálá nwɔɔ, yai mąąwiɛlaa, da huwalawalalaa di kaa ɲəi a kwɛlan gəlee, ɲɛ̨n deei hvo mą. Mįiną! 7 'Ká ká ɲɛ̨i hee, ya ka tii pai tulɔ-kpinįn ɉu! Ɛlɛɛ, ɲɛ̨i kɔw kəlee kaa pai gaai, ɛlɛɛ, ə mą kɛ, nuąi ɉɔɔ a kpala. Huwu kəlee kaa pai ɉaa wɔlɔ ɓoi. A tɛ̨ą gaa tii! Amįįną! 8 Ɲą́ą́ ɓə a dɔlɔɔ, ɛlɛɛ, a gbɛlai, Hééɓo laa Kəlee Nąmu Yálá woo li! Yai kɛ laa, yai laa Yiihu, ɛlɛɛ, yai pai, yai a Hééɓomun. Nu lon ŋą mąąwiɛ laa kɛnɛ̨ɛ̨ 9 Ɲą́ą́, ká nąn non Ɉaan, yai ká diɛni ká kaa ká kee pɔ mɔ̨nɔ̨ tanɔ̨n ɉu, dɔɔlaa hu, ɛlɛɛ, da dɔɔa nwąnąi laa hu Jesus hu, ŋą́ kɛ Patmɔsə tín ɉu, Yálá laa woo mąą mɛ̨nį ɓa, ɛlɛɛ da Jesus mąą kɛla hvaa ɓo mɛ̨nį ɓa. 10 Kili-Mąąhəɠɛɛ ə ɉə́ɠə a gu Nąmu ŋą hvólói, ɛlɛɛ, ŋą́ woo kɛnɛ̨ ta mɛ̨n búlú pələ, ə ɓo yɛ tulu woo, 11 yɛ kɛ mą: «Mɛ̨nįɠaa tii ə́ kaa gaai, 'bɛ̨ɛ̨ hɛɓɛ́ ta hu, ə́ dɛɛ gbɔn ɉeei mɛ̨ihveelɛi ɓa: Efɛsə, Smirnə, Pɛrgamə, Tiatirə, Sardɛsə, Filadelfi da Laodise.» 12 Ŋą́ tínɛ̨n, ə gɛ, nwooi tii kɛli bələ ɓo mą́ą́, ŋą́ gaa, ɛlɛɛ, tínɛ̨n ŋį́ mo, ŋą́ wulɔ nwɔ̨n ɉee hɛn mɛ̨ihveelɛ kaa, ə ɓo a hɛni; 13 ɛlɛɛ nwulɔ nwɔ̨n ɉee hɛn mɛ̨ihveelɛi tii lɔwai, ŋą́ nu ta kaa laa yɛ nu lon. Həɠə kwɛaa ɓə kɛ gwąną, ɉɛ̨ątɔɔ a hɛni kɔlɔ. 14 Nwun galən, ɛlɛɛ, nwun nɛɠa, gwɛlɛɛ kpɔ kɛ yɛ wuɛ-hunwɔ̨, ɛlɛɛ, ɲɛ̨i kɔw yɛ ɓo yɛ nwɔ̨n nən, 15 gɔwɔɠaa diɛ ɓo yɛ da ɓala-kwɛli hu waa a huluun nwɔ̨n, ɛlɛɛ, nwoo ə ɓo yɛ gboloyá huluun dín. 16 Pɛmɛ̨lɛ̨n-gɔw mɛ̨ihveelɛ ə kɛ mamįiyee ɲą, ɛlɛɛ, líikpakpa kwɛa ɲąąliɛ, yɛ kulɔ na. Ɲɛ̨ilai yɛ lən yɛ hvóló a tɛ nwun ma. 17 Gaai ŋį́ mo, ŋį́ too gɔwɔ mu yɛ ŋą́ haa. Kɛlaa, ə mamįiyee tunwɔ̨n mą́ą́, ɛlɛɛ, yɛ mą́ą́: «'Hvó ɲɔw, ɲą́ą́ ɓə a Dɔlɔɔ ɛlɛɛ, da gbɛla mąą! 18 Ɛlɛɛ, a Vúlúmąą; ŋą́ wɔlɔ haa, kɛlaa yiihu, 'ɓɛ káá, gáá kɛa a vúlú a yələ kəlee da nwɔɔ, ɛlɛɛ, ɲą́ą́ ɓə haa ŋą kpon gwɛliɠaa kaa ɲə́i, ɛlɛɛ da ɲąmuątaa. 19 Mɛ̨nįɠaai ə́ ɲɛ̨i ə gaa, yiiɠaai kɛi yiihu, ɛlɛɛ, yiiɠaai pai kɛi yili nąą pulu, 'bɛ̨ɛ̨. 20 Yii ɓaa bɛmɛ̨lɛ̨n-gɔw mɛ̨ihveelɛ mąą mɛ̨nį-hu-kpinɛ̨ɛ̨ tii ə́ gaa má-mįiyee ɲąi, ɛlɛɛ, nwulɔ nwɔ̨n ɉee hɛn mɛ̨ihveelɛi tii a ɉɛnii, 'ə́ ɲɛ̨i hee: Bɛmɛ̨lɛ̨n-gɔw mɛ̨ihveelɛi tii, di kaa a gbɔn ɉeei mɛ̨ihveelɛi di wɔ malakaɠaa, ɛlɛɛ, nwulɔ nwɔ̨n ɉee hɛn mɛ̨ihveelɛi tii, diɛ ɓo a gbɔn ɉeei mɛ̨ihveelɛi.» |