Markə 9 - Yálá laawoo hɛɓɛ (dc)1 Jesus yɛ nwɔ̨nɔ̨ diɛ: «A tɛ̨ą kpɔ-kpɔ gáá moi kaa, nu taɠaa kaa ɓɛ di hvo pai haai, ə lɛɛ la ɉu, di Yálá nwɔ tɔɔlaai kaa yɛ pa a huwalawala.» Jesus ɲɛ̨ilaa mąą ə hvalin ( Matie 17.1-13 ; Lukə 9.28-36 ) 2 Hvoló mɛ̨ida tɛɛ pulu, Jesus ə Piɛrə, Ɉakə da Ɉaan di təli, da diɛni di tɛ yee kwɛa ta tonna di tɔ̨nɔ̨ kɛɛnąą. Jesus ɲɛ̨ilaa mąą ə hvalin di ɲɛ̨i ɓa. 3 Mąą həɠə ə kwələ yɛ lən. Nui lɔpee ta hvo lɔi mɛ̨i yii a pɛli həɠə waai ə kwələ tii. 4 Yili pulu galan nɛa haaɓai tii di Eli da Moisə di kaa, da Jesus ni diɛ lono kɛ. 5 Piɛrə yɛ Jesus ɓa: «Ną́mu, gu kɛ lɔ kɛa ɓɛ, ɓɛ ɲąąnɛ̨ɛ̨i. Ku kaa kələ haaɓa tɔɔi. Dɔ̨nɔ̨ ə kɛ a ə́ wɔ, dɔ̨nɔ̨ ə kɛ a Eli nwɔ, dɔ̨nɔ̨ ə kɛ a Moisə nwɔ.» 6 Mɛ̨nįi mąąnɛ̨ɛ̨ kɛ ə mo hvo kɛ gɔlɔn. Mąąhɔlɔɓo, da mɛlaa kəlee di ɲɔ̨w. 7 Tulɔ kpinįn gɛnɛ̨ ə yɛɛ di mɛ̨i, ə di mɛ̨i kpulu a nįnįn. Woo ta ə kulɔ dulɔ kpinįn tii hu, yɛ kɛ diɛ: «Nííɓa Lon maa a nui ŋɛ̨i, 'ka ka wəli tɔɔ nwoo ɓa.» 8 Ɲąąɓa, galan nɛai tii di di kwɛlɛ kaa di hvo nui lɔpee ta kaa, hvo kɛli Jesus yaa tɔ̨nɔ̨ lɔ ɓə kɛ di kwɛlɛ. 9 Di kɛɛ kɛa ɲee yɛɛi, Jesus ə di liɛwoo ɓo yɛ diɛ: «Mɛ̨nį ŋɛ̨i kaa gaa, ka hvo ɉukulɔ nui lɔpee ta ɓa, ə lɛɛ la ɉu, Nu Lon ə haa, ə muhəɠə, ə kulɔ haa ɓɛlaa lɔwai.» 10 Di niɛwoo tii hon. Kɛlaa, di kɛi di kee ni mąąni kɛ, diɛ kɛ mą: «Ə pənə ə kulɔ haaɓɛlaa lɔwai ɓaa a lə?» 11 Yili pulu, di pənə di Jesus mąąni kɛ, diɛ mą: «Lə mɛ̨nį ɓa, tɔ́n galamɔ̨ɔ̨ɠaa, da kɛ kɛi diɛ: ‹Hvo kɛli Eli a gbɛa pa tɔwɔ?›» 12 Ə di woo pulu pənə, yɛ diɛ: «Mąąnɛ̨ɛ̨ kpɔ Eli ə gbɛa pa, ə mɛ̨nįɠaa kəlee hee gbanɲą. Kɛlaa, lə mɛ̨nį ɓa, Yálá laawoo hɛɓɛ́ ə mo nwɔ̨nɔ̨, yɛ diɛ: ‹Nu Lon kaa pai mɔ̨nɔ̨ mį́i, nwɛli ə kpɛɛ nuą diɛ?› 13 Kɛlaa, gáá tɛ̨ą ɓoi kaa, Eli aa gbɛa kɛ pa. Kɛlaa, nuą di ɉon nɔ yɛ pələi di liiɓa kaa la, yɛ pələi kpɔlɔɔ Yálá laawoo hɛɓɛ́ ə mo la mąą mɛ̨nį hu.» Jesus ə hvɛli-hvɛli ɲɔ̨n gɛ mun da kɔ́lɔi pono ( Matie 17.14-21 ; Lukə 9.37-43 ) 14 Di paa kɛa di həli galan nɛa yiiɠaa tii diɛ, di gaa, nu kpulu kɛnɛ̨ aa di mąą tinɛ̨n, da tɔ́n galamɔ̨ɔ̨ɠaa diɛ hɛa too. 15 Yii kɛa nu kpului tii ə Jesus kaa, di kəlee di kwəi ə pili diɛ. Di kpulun diɛ li naa kwiɛn ɉi. 16 Jesus ə nwɔ kalan nɛai mąąni kɛ, yɛ diɛ: «Lə hea ɓə ka diɛni ka káá dooi?» 17 Hulɔnu ta ə kɛ laa nu kpulu lɔwai, yɛ Jesus ɓa: «Mąąkwɛli kɛmun, nón ŋɛ̨i ɓə ɲinɛ̨n gaa bulu! Ɲįnɛ̨n tii hva gɛ nokoloi ŋɛ̨i hvo hvaa. 18 Ɓɛi lɔpee ɲinɛ̨n tii a ɉon naa, a doo nɔi ɓa, yɛ ɲį́n ɲą mį́i, ə nwalawala gɔw ɓa, yɛ nɛaya hvili-hvili tɛ. Ŋą́ą́ nɛ̨ɛ̨mąą hvə ə́ wɔ kalan nɛai diɛ, gɛ́ di gbɛ bulu. Kɛlaa, di hvo pɛli gbɛi.» 19 Jesus ə mo nu kpului tii ɓa, yɛ diɛ: «Nu huwu ɲɔ̨nwɔ̨ɔ̨ɠaa ɓaa kaa, laa na laa hvo ka yei. Akɛti, hvo kɛli gwa lɛɛ gu kee ɓa hąą mįnɛ̨ lɔwai, ə gɛ, kaa pɛli mɛ̨nįɠaa ɲɛ̨i kɛi? Akɛti, hvo kɛli ŋą níí kpələ ka mu hąą mįnɛ̨ lɔwai? Ka pa a nokoloi tii bɔ́.» 20 Di paa la bɔ. Yii lɔ ɲinɛ̨n tii ə Jesus kaa, ə nokoloi tii hu kpɛli gbɔ kɛnɛ̨, ə doo nɔi ɓa, yɛ giliɠilin, nɛaya hvili yɛ tɛ. 21 Jesus ə nokoloi tii nąn mąąni kɛ yɛ, mą: «Kwɛlan ɲɛli ɓə ɲɔ̨n ŋɛ̨i aa gɛ mą?» Nokoloi nąn ə nwoo pulu pənə, yɛ mą: «Ə gɔwɔ tɔɔ mą kpɔɔ a nokolo yələ. 22 Hvoló tamąą, ɲinɛn ŋɛ̨i a kɛ nokoloi ŋɛ̨i pili yai, da a gɛ, yɛ bili nwɔ̨n ɉu, yɛ kɛ ə baa. Kɛlaa, ku ɲɛ̨i mąą wɛli kaa, ə kpɔnmąą tɛɛ ku pɔ; akɛ yá pɛli mą.» 23 Jesus yɛ mą: «Ə kaa kɛi mą́ą́: ‹Akɛ yá pɛli mą.› Nui laa na laa kaa ɲei, mɛ̨nį kəlee a pɛli kɛi ɲɛ̨i.» 24 Ɲąąɓa, nokoloi tii nąn ə mo kpɔ a nwoo kɛnɛ̨ yɛ, mą: «Ŋą́ą́ laa na. Kɛlaa, hvo kɛli yá mą́ą́ kpɔnmąą ɓo nwɔ́ laa na laa hvo kɛnɛ̨ li.» 25 Jesus ə nu kpulu kaa diɛ pa mą, ə haŋą ɲįnɛ̨n tii ɓa, yɛ mą: «'Ɲįnɛ̨n! Yɛ́i ə kaa nokoloi ŋɛ̨i pulu, hva gɛ hvo hvaa, hvo mɛ̨nį mɛ̨n, gɛ́ ə həɠə bulu. 'Hvo kpɔ kɛa pənə hvo hvilɛn bulu.» 26 Ɲįnɛ̨n tii ə tómą, ə nokoloi tii hukpɛlin, ə həɠə bulu. Nokoloi tii ə too, ə kɛ yɛ nu a haa. Nuąi kɛ nąą kwɛlɛ, di kɛi kɛ diɛ: «Aa haa.» 27 Kɛlaa, Jesus ə nokoloi tii yee hon ə muhəgə, ə dɔɔ. 28 Ɓɛlɔwai Jesus da nwɔ kalan nɛai di lɔ la bɛlɛ́n, diɛ ɓo di tɔ̨nɔ̨ kɛɛnąą; galan nɛa di mąąni kɛ, diɛ mą: «Lə mɛ̨nį ɓa, ku hvo kpɛli li ɲinɛn tii kpɛi?» 29 Jesus ə di woo pulu pənə, yɛ diɛ: «Ɲįnɛ̨n ɉuwui ŋɛ̨i, Yálá hvɛliɛ háálai lɔ ɓə nu a pɛli gbɛi la nu pulu.» Jesus ə pənə nwɔ̨nɔ̨ ə ɉaa mɛ̨nį da muhəɠə mɛ̨nį ɓo ( Matie 17.22-23 ; Lukə 9.43-45 ) 30 Jesus da nwɔ kalan nɛa di həɠə laa, də li tɛɛ Galile lɔi, Jesus hvo kɛ bɔ, ɓɛi gaa laa, nuą di hvo nąą kɔ́lɔn. 31 Mąąhɔlɔɓo, ə kɛi nwɔ kalan nɛai kalan, a ɉaa mɛ̨nį, da muhəɠə mɛ̨nį, yɛ kɛ diɛ: «Di kaa pai lɔi Nu Lon gilii, di baa, kɛlaa, hvóló haaɓa tɛɛ pulu, a pənə ə kɛ a vulu.» 32 Kɛlaa, galan nɛa di hvo kɛi nwoo tii mukulaa kɔ́lɔn; di kɛ ɲɔ̨w mąąni kɛi. Jesus nwɔ kalan nɛai di mąąni kɛ, diɛ mą: Gbɛɛ ɓə a nu kɛnɛ̨ ku lɔwai? ( Matie 18.1-5 ; Lukə 9.46-48 ) 33 Di həliɛ Kafarnaumə daai, di lɔ bɛlɛ́n. Jesus ə nwɔ kalan nɛai mąąni kɛ, yɛ diɛ: «Lə mɛ̨nį ɓə, kɛi Ɉea too bələ pɔ?» 34 Kɛlaa, di di laa pilɛ, mąąhɔlɔɓo, ɉeai di kɛi doo bələ pɔ, ya ɓaa: di kɛ bɔ, nui gaa a nu kɛnɛ̨ di lɔwai, di kɛ a mąą nu kɔ́lɔn ŋąą. 35 Jesus ə hee, ə galan nɛa pow kɔ́w hveelɛ təli. Yɛ diɛ: «Nui gaa bɔ ə kɛ tɔwɔ, mąąnɛ̨ɛ̨ ə kɛ a mɛlaa kəlee di ləɠə, ə kɛ a mɛlaa di wɔ tímun.» 36 Yili pulu, ə lokolo ta həɠə, ə ɉee ɲee kɔ̨nwɔ̨n ɉu, ə mo diɛ, yɛ diɛ: 37 «Nui lɔpee a ɲee hee nɛapɛlɛɛɠaa ŋɛ̨i ta mu, ɲą́ą́ mą́ą́ mɛ̨nį ba, ɲą́ą́ gbinįi ka tii aa ɲee hee mú. Nui nwɔ̨nɔ̨, a ɲee hee mú, hvo kɛ ɲee hee li ɲą́ą́ dɔ̨nɔ̨ mú; a ɲee hee nui ə dɔ́ɔ́ mu.» Nui hvo a gu yowo gaa a gu ta ( Lukə 9.49-50 ) 38 Ɉaan ə mo Jesus ɓa, yɛ mą: «Ku nu ta kaa yɛ ɲinɛnŋąą kpɛ ə́ laa hu. Ku kɛ bɔ ku mo mą, ə kpəla mą. Mąąhɔlɔɓo, hvo a gu ta.» 39 Kɛlaa, Jesus ə mo mą, yɛ mą: «Ka hvo kɛ mą: kpəla mą. Mąąhɔlɔɓo, nui lɔpee ta hva pɛli kpalo mɛ̨nį kɛi náá hu, yɛ nwɔ̨nɔ̨ mɛ̨nį ɲɔ̨n mo náá mɛ̨i. 40 Mąąhɔlɔɓo, nui hvo ɓaa a gu yowo, gaa a gu ta. 41 Nui lɔpee a kpələ kɔ́wɔ ŋąą tɔ̨nɔ̨ tɛɛ ka ta pɔ yalaɠi hu, mąąhɔlɔɓo, ka káá a Kristə nwɔɔ; gáá tɛ̨ą ɓoi kaa, mąą nui a yili vɛla hɔlɔɓo.» Kpalo yii gaa nɛ̨ŋɛ̨ ɉu ( Matie 18.6-9 ; Lukə 17.1-2 ) 42 «Nɛapɛlɛɛ ŋɛ̨i daa laa ná, nui lɔpee a gɛ da a həɠə bələ mɛ̨i, viɛlaɓoɔi di kwɛni kpuwulu kɛnɛ̨ kpulɔn gwaną di bili gboloyá baləi. 43 Akɛ ə́ yee a kɛi kɛ ə́ ə́ həɠə pələ ɓa, ə́ ə́ too nɛ̨ŋɛ̨ ɉu, dee yɛ ə́ bili. Mąąhɔlɔɓo, viɛlaɓoɔi ə́ yee ə lɛɛ yɛ́ tɔ̨nɔ̨ ə́ li Yálá-taa, 44 ə tɛɛ ə́ nąą kəlee ŋąąpɛliɛ ɓa, diɛ bili ɉahanąma nwɔ̨n ɉu yii hva luwun. 45 Akɛ ə́ kɔ́wɔ tɔ̨nɔ̨ aa kɛi kɛ ə́ ə́ həɠə pələ ɓa, ə́ ə́ too nɛ̨ŋɛ̨ ɉu, dee yɛ ə bili, viɛlaɓoɔi ə́ kɔ́wɔ ə lɛɛ yɛ́ tɔ̨nɔ̨, ə́ li Yálá-taa, 46 ə tɛɛ ə́ nąą kəlee ŋąąpɛliɛ ɓa, diɛ ə́ pili ɉahanama nwɔ̨n ɉu yii hva luwun. 47 Akɛ ə́ ɲɛ̨ikɔw tɔ̨nɔ̨ aa kɛi kɛ ə́ ə́ həɠə pələ ɓa, ə́ ə́ too nɛ̨ŋɛ̨ ɉu, gulɔ yɛ́ bili, viɛlaɓoɔi ə́ ɲɛ̨ikɔw ə lɛɛ yɛ́ tanɔ̨n ə́ li Yálá-taa, ə tɛɛ ə nąą kəlee ŋąąpɛliɛ ɓa diɛ ə́ pili ɉahanama nwɔ̨n ɉu, 48 nąą nwɛi, koloi a pu laa nu hu, hva haa, nąą nwɔ̨n va luwun. 49 Mąąhɔlɔɓo, di kaa pai nu kəlee ɓɛlɛ ɓoi a nwɔ̨n. 50 «Kpolo kaa a hɛn nɛlɛɛ, kɛlaa, kpolo leen a kpɛɛ mą, lə ɓə da pɛli neen gɛi la mą? Mąąnɛ̨ɛ̨ ka kɛ pələ a kɛ yɛ kpolo. 'Ka nɛ̨ɛ̨ a ka kee, liilaa ə kɛ ka lɔwai.» |