Markə 8 - Yálá laawoo hɛɓɛ (dc)Jesus ə nu waa nąąn gɔ̨nɔ̨n gɛ ( Matie 15.32-39 ) 1 Nąąlɔwai tii hu, nu kpulu kɛnɛ̨ ə pənə ə ŋąąkpɔn Jesus kwɛlɛ, yɛ pələi kɔ̨nɔ̨n və kɛ la di yei, Jesus ə nwɔ kalan nɛai təli yɛ diɛ: 2 Nuą ŋɛ̨i di ŋɛ̨imąąwɛli aa ɉón. Mąąhɔlɔɓo, daa hvóló haaɓa kɛ bɔ́ di hvo nii kɔ̨nɔ̨n mį́i li. 3 Akɛ ŋą di lɛɛ a pulu diɛ li di pɔ taaɠaai ɓa, daɠaa kaa pai kpɔlɔɔn ɉi a pulu bələ pɔ. Mąąhɔlɔɓo, daɠaa kaa di lɔwai, di pɔ taaɠaai kwɛaa. 4 Nwɔ kalan nɛai di nwoo pulu pənə diɛ mą: «Kwa pɛli nu kpulu kɛnɛ̨i ŋɛ̨i kɔ̨nɔ̨n ɉɔlɔɓoi mį ɓɛ nɔi pun ɉu?» 5 Jesus ə di mąąni kɛ yɛ diɛ: «Lɛɠɛ yɛli ɓə gaa laa ka yei?» Diɛ mą: «Lɛɠɛ mɛ̨ihveelɛ ɓə ku yei.» 6 Jesus ə mo nu kpului tii ɓa yɛ diɛ: «'Ka hee nɔi ɓa.» Ə nɛɠɛ mɛ̨ihveelɛi tii həɠə, ə ɉu tee-tee, ə dɛɛ galan nɛa pɔ yɛ diɛ: «'Ka ɲąąkwɛlɛ nuą diɛ.» Kalan nɛa di ɲąąkwɛlɛ lɔ tii. 7 Hɔ̨nwɔ̨lee pɛlɛɛ ta wolo ə kɛ di yei. Jesus ə ɉəɠə, ə Yálá hɛɠɛɛɓo ɉɔwɔleeɠaa mąą mɛ̨nį ɓa, ə dɛɛ galan nɛa pɔ, di ɲąąkwɛlɛ nuą diɛ. 8 Nu kəlee di kɔ̨nɔ̨n mį́i di pilɛ. Gbuɔ-kpuɔ yii lɛɛ, galan nɛa di ɲɛɠɛ ə kpɔlɔ mɛ̨ihveelɛ laahvɛɛ. 9 Nuąi gɔ̨nɔ̨n tii mį́i, di lonoɔ a pɛli kɛ kɛi a nu waa nąąn. Yili pulu, Jesus ə nuą tii tɔɔ bələi də li. 10 Yili pulu, da nwɔ kalan nɛai di tɛ gələn ɉu diɛ li Dalmanuta lɔi hu. Farisiɛ̨ɠaa di kɛ bɔ Jesus ə kpalo mɛ̨nį ta kɛ di gaa ( Matie 16.1-4 ) 11 Farisiɛ̨ɠaa di pa da Jesus ni diɛ hɛa too, di kɛ bɔ di Jesus hon nwoo hu. Di mo Jesus ɓa diɛ mą: «Kpalo mɛ̨nį ta kɛ yii kwa gaa ku laa na kuɔ ə́ wɔ huwalawala a həɠə Yálá pɔ.» 12 Jesus ə nįį tɛ ə doo kpɔ a ɉu kwɛaa, yɛ diɛ: «Lə mɛ̨nį ɓa háákələi nuą diɛ ŋį́ kpalo mɛ̨nį ta kɛ di gaa? Gáá tɛ̨ą ɓoi kaa, kpalo mɛ̨nį ta lɔpee hva pɛli kɛi di ɲɛ̨i ɓa.» 13 Yili pulu, ə həɠə laa ə tɛ gələn ɉu ə ɲá teen ɲá pulu pələ. Farisiɛ̨ɠaa da Herodə ni di wɔ kalan yii gaa yɛ lɛɠɛ tɛ hɛn ( Matie 16.5-12 ) 14 Jesus nwɔ kalan nɛai di lɛ̨ą di hvo kɔ̨nɔ̨n ɉəɠə, lɛɠɛ tɔ̨nɔ̨ lɔ ɓə kɛ di yəi gələn ɉu. 15 Jesus ə di liɛwoo ɓo yɛ diɛ: «'Ka gɛ a nɛlɛɛ: ka ka kpɔɔ mɛ̨i kaa Farisiɛ̨ɠaa da Herodə ni di wɔ lɛɠɛ tɛ hɛn mąą mɛ̨nį ɓa.» 16 Galan nɛa di kɛi mo di kee lɔwai, diɛ kɛ mą: «Nɛɠɛ tii gu hvo ɉəɠə li mąą mɛ̨nį ka tii gaa moi la.» 17 Yii kɛa Jesus ə di wɔ kiliŋąhiɛ kaa tii, ə mo diɛ, yɛ diɛ: «Lə mɛ̨nį ɓa ka káá kɛi diɛ: ‹Nopɛin tii gu hvo ɉəɠə li ya ɓə?› Akɛti, ka hva ni mɛ̨nį kpaɠala kaa? Akɛti, ka kili aa walawala? Akɛti, ka wɔ mɛ̨nį kɔ́lɔn ŋąą hvo kɛnɛ̨ li? 18 Ka ɲɛ̨ikɔw kaa kaa, ka hva kɛɛ mąąkpɛɛ la, wəli kaa kaa, ka hva mɛ̨nį mɛ̨n na. Akɛti, mɛ̨nį nąą kili hva lɛɛ ka ŋą? 19 Ɓɛlɔwai ŋą nɛɠɛ ɲąąkwɛlɛ la ɉinąą waa lɔɔlii ɓa, gbɔlɔɠaai lɛɛ, ə kɛ a kpɔlɔ yɛli?» Galan nɛa diɛ mą: «Ə kɛ a kpɔlɔ pow kɔ́w hveelɛ.» 20 Jesus yɛ diɛ: «Ɓɛlɔwai ŋą nɛɠɛ ɲąąkwɛlɛ la nu waa nąąn ma, gbɔlɔɠaai lɛɛ ə kɛ a kpɔlɔ yɛli?» Di mo mą diɛ mą: «Ə kɛ a kpɔlɔ mɛ̨ihveelɛ.» 21 Jesus yɛ diɛ: «Akɛti, ka hvo ni mɛ̨nį tii kpaɠala kaa li?» Jesus ə ɲɛ̨ipumun da ɲɛ̨i hvólóon Bɛtsaida daai 22 Jesus da nwɔ kalan nɛai di həliɛ Bɛtsaida daai, di pa a ɲɛ̨ipumun da Jesus pɔ. Di nɛ̨ɛ̨mąą hvə mą, ə gɛ, ə ɲee tunwɔ̨n mą. 23 Jesus ə́ ɲɛ̨ipumun tii hon a ɲee, ə kulɔ la taai. Ə nɛaya pu ɲɛ̨i, ə ɲee laa mɛ̨i, yɛ mą: «Ə kaa kɛɛ kaai?» 24 Ɲɛ̨ipumun tii ə nwun muhəɠə, ə ɲɛ̨i laaɓo. Yɛ mą: «Gáá nuą kaai, kɛlaa, gáá lɔ di kaai yɛ wuluɠaa diɛ hiɛ.» 25 Jesus ə pənə ə ɲee pɛlɛ ɲɛ̨ipumun tii ɲɛ̨i; yili pulu, ə ɲɛ̨ikɔw mąątaɠa, gɔlɔi ə pono, yɛ kɛa kɛɛ mąąkpɛɛ a nɛlɛɛ. 26 Jesus yɛ nui tii ɓa: «Daa mąąlaa ə́ li ə́ yəi bɛlɛ́ laaləi, 'hvo tɛ taai.» Piɛrə ə mo yɛ: Jesus kaa a nwun mąąɓomun yaai Yálá ə dɔɔ ( Matie 16.13-20 ; Lukə 9.18-21 ) 27 Jesus da nwɔ kalan nɛai də li Sesare Filipə nwɔ taai hu, da gwɛlɛ taa taɠaa. Jesus ə nwɔ kalan nɛai mąąni kɛ bələ pɔ yɛ diɛ: «Nuą da kɛ kɛi lə mą́ą́ mɛ̨nį hu?» 28 Di nwoo pulu pənə diɛ mą: «Nu taɠaa da kɛ kɛi diɛ: Ɉaan-Batistə ɓaa a yɛ́; daɠaa diɛ kɛ mą: Eli ɓaa a yɛ́; daɠaa diɛ kɛ mą: Yálá kwəi mɛ̨nį hukulɔ mun da lɔ ɓaa a yɛ́.» 29 Jesus yɛ diɛ: «Akɛti, kaan, ka kɛ kɛi diɛ gbɛɛ ɓa a ɲą́ą́?» Piɛrə ə nwoo pulu pənə yɛ mą: «Ə kaa a nwun mąąɓomun yaai Yálá ə dɔɔ; yaai da kɛ mą: Kristə.» 30 Jesus ə mo kpɔ diɛ a nwąnąi yɛ diɛ: «'Ka hvo mo nui lɔpee ta ɓa.» Jesus ə ɉaa mɛ̨nį da nwun mɛ̨nį ɓo ( Matie 16.21-28 ; Lukə 9.22-27 ) 31 Yili pulu, Jesus ə gɔwɔ tɔɔ, yɛ nwɔ kalan nɛai kalan, yɛ kɛ diɛ: «Hvo kɛli kɛ Nu Lon ə mɔnɔ̨ mį́i kpɔ kɛnɛ̨, galanɉonŋąą, ɉaláá laa həli nuą, ə mą kɛ dɔ́n galamɔ̨ɔ̨ɠaa, di kaa pai lənəi mą, ga pai haai, kɛlaa, hvóló haaɓa tɛɛ pulu, gaa pai muhəɠəi ə kulɔ haa yəi.» 32 Jesus ə kɛi kpɔ mo diɛ a ɉuponoɔ. Ya ɓə ə gɛ, Piɛrə ə dəli da yaa di kulɔ nuą lɔwai; yɛ Jesus ɓa: «Yili hva kpɔ pɛli həli yɛ́.» 33 Jesus ə tinɛ̨n, ə bulu hvə Piɛrə ɓa, ə haŋą mą; yɛ mą: «'Həɠə búlú ɓilihi. Mąąhɔlɔɓo, ə́ wɔ kiliŋąhiɛ hvo yɛ Yálá nwɔ kiliŋąhiɛ, kɛlaa, nu kiliŋąhiɛ ɓə gaa yɛ́.» Mɛ̨nįi mąąnɛ̨ɛ̨ nu ə gɛ yɛ hvilɛn Jesus pulu ( Matie 16.24-28 ; Lukə 9.23-27 ) 34 Jesus ə nu kpului tii ŋąąkpɔn da nwɔ kalan nɛai, yɛ diɛ: «Nui gaa bɔ ə hvilɛn búlú, hvo kɛli ə gbɔwɔ haa wulu həɠə ə hvilɛn na búlú. 35 Mąąhɔlɔɓo, nui a gbɔwɔ nɔw hviɛlaɓo ə dɛɛ mą́ą́ mɛ̨nį ɓa, a hvɛɠɛ la. Kɛlaa, nui a lənə gbɔwɔ ɓa mą́ą́ mɛ̨nį ɓa, da nwɛlɛɛ lɛlɛɛ mąą mɛ̨nį ɓa; mąą nui nii a ɓalo. 36 Akɛ nu ya yɛnɛ̨ɛ̨ hɛn gɔw kəlee hɔlɔɓo, ə ɉɔ̨nwɔ̨ kɛ a ə nwɔ yɛnɛ̨ɛ̨, yili dɔlɔ ɓaa a lə? 37 Akɛti, lə ɓə nu a pɛli dɛɛi a nii mąąhvalin? 38 Akɛ nu a nwumɛ̨ náá ɓoi, ə nwumɛ̨ nwɛlɛɛ lɛlɛɛ ɓo mɛ̨nį ɓa, háákələi nuą ŋɛ̨i di hvo tələnmo li diɛ nɛ̨ŋɛ̨ gɛ, di ŋɛ̨i ɓa, Nu Lon yaa kpɛli a tinąą nwumɛ̨ mąą nu laa ɓoi, ɓɛlɔwai a paa la da Yálá nwɔ malakaɠaa Nąn nwɔ mąąwiɛ hu.» |