Markə 7 - Yálá laawoo hɛɓɛ (dc)Mɛ̨nį nu pɔlɔ-pɔlɔɠaa di mo ( Matie 15.1-9 ) 1 Farisiɛ̨ɠaa da tɔ́n galamɔ̨ɔ̨ taɠaa, diɛ ŋɛ̨i həɠə Ɉerusalɛmə daai di di ŋąąkpɔn, di pa Jesus kwɛlɛ. 2 Yii kɛa di gaa diɛ Jesus nwɔ kalan nɛai taɠaa di kaa kɔ̨nɔ̨n mįi a di yee ŋą kpan (mukulaa ɓaa: di hvo di yei waa li yɛ pələi di wɔ huwula tɔ́n gaa la.) 3 Yaan, Farisiɛ̨ɠaa da Ɉuifəɠaa di kɛi dɔ́n tii hon. Di hva kɛ kɔ̨nɔ̨n mį́i akɛ di hvo di yei waa li yɛ pələi di wɔ huwula tɔ́n mąą liɛwoo kaa la. 4 Ə mą kɛ daa həɠə lɔwɔ-kpala ŋą, di hva kɛ kɔ̨nɔ̨n mį́i a kɛ di hvo di wɔ tɔ́n tii bɔ tuwɔ ɓo li. Huwula mɛ̨nį tamąą kaa kɛ laa yii di kanąn ŋąą kɛ mą, yɛ pələi: kpələ kɔ́wɔ huwaa mɛ̨nį, da ya ləɠiɠaa waa mɛ̨nį, ləɠiɠaa, ə mą kɛ, da gəgənŋąą. 5 Farisiɛ̨ɠaa da tɔ́n galamɔ̨ɔ̨ɠaa di Jesus mąąni kɛ yili hu diɛ mą: «Lə mɛ̨nį ɓa ə́ nwɔ kalan nɛai di hva tuwɔ yɛ bələ gu wɔ huwula tɔ́nŋąąi pɔ yii kaa la, ə mą kɛ daa kɛi kɔ̨nɔ̨n mį́i, di hva di yei waa, diɛ nɛɛ a gban?» 6 Jesus ə di woo pulu pənə yɛ diɛ: «Kaa kpɔ ɓə Yálá kwəi mɛ̨nį hukulɔ mun Esai ə wɔlɔ mɛ̨nį ɲɛ̨i ɓo ka laa mɛ̨i, ka tɛ ɲɛ̨i mɛ̨nį kɛ nuą ŋɛ̨i. Yálá ə mo gwəi mɛ̨nį hukulɔ mun Esai laaləi yɛ diɛ: «‹Nuą ŋɛ̨i da mą́ą́wiɛ lɔ a di laaləi, kɛlaa, di wɔ kiliŋąhiɛ mąą kwɛaa mą́ą́. 7 Gwɛlɛ da vilɛn mą́ą́ ga a kpɛli-kpɛli. Mąąhɔlɔɓo, da kɛ nuą túwɔ́ pələ kalan ɉi di kee ɓa diɛ kɛ diɛ, ɲą́ą́ Yálá, ɲą́ą́ ɓə di tɔɔ la.›» 8 Jesus ə mo diɛ, yɛ diɛ: «Ka kɛ lənəi Yálá nwɔ tɔ́n ma, kaa nuą di wɔ huwula mɛ̨nįɠaa kɛ.» 9 Ə mo diɛ, yɛ diɛ: «Kaa Yálá nwɔ tɔ́n, lɛɛ laa, kaa hvilɛn ka wɔ huwula mɛ̨nįɠaa pulu. 10 Mąąhɔlɔɓo, Moisə ə mo yɛ diɛ: ‹Ə nąn da ə́ lee di mąąwiɛ.› Yɛ nwɔ̨nɔ̨ diɛ: ‹Nui a woo ɲɔ̨n mo nąn ɓa a wala kɛ tii nee ɓa, mąąnɛ̨ɛ̨ di yili mąą nui paa.› 11 Kɛlaa ka wɛi, ka wɔ huwula mɛ̨nį pɔlɔɠaa hu, ka mo kaa diɛ: ‹Nui a kɛ nąn a wala kɛ tii nee ɓa, kpɔnmąąi ŋį kɛi pa dɛɛi ka pɔ, gáá yili kɛi a: «koliban». Yili mukulaa ɓaa: Yálá kɔ́ hɛn.› 12 A kɛ tii mąą tiɓo kɛ mun kulɔ, ə gɛ, hvo kpɔnmąą tɛɛ gaa nuą pɔ. 13 Bələ lɔ ɓə ka kɛ Yálá laawoo mąą pənəi la a ka wɔ huwula mɛ̨nįɠaa, kaa nuą kalan na. Pələ kpɔlɔɔ ɓə ka mɛ̨nį takpɛliɠaa mąą pənə la.» Hɛn ɲii a nu kɔ́hɔɓo ( Matie 15.10-20 ) 14 Yili pulu ə nu kpului tii təli, yɛ diɛ: «Ka kəlee ka ka wəli tɔɔ mą́ą́, ka nwóó ŋąą kaa. 15 Hɛn nɔpee nu a dɛ na, yili hva gɔhɔɓo. Kɛlaa, yii a kulɔ nu la, ya ɓə a nu kɔ́hɔɓo. 16 Akɛ wəli kaa kaa, ka mɛ̨n a nɛlɛɛ.» 17 Ɓɛlɔwai Jesus da nwɔ kalan nɛai di lɔ la bɛlɛ́n, di hvo kɛ kɛa nu kpulu hu, di mąąni kɛ diɛ mą: «Ɉanwon ŋɛ̨i mukulaa ɓa lə?» 18 Ə mo diɛ yɛ diɛ: «Akɛti, ka hva pɛli mɛ̨nį kpaɠala kaai? Ka hvo gɔlɔn kaa hɛn ɲii nu a nɔ na hva gɔhɔɓo! 19 Mąąhɔlɔɓo, yili hva li nu nii hu; kɛlaa, a li nu kwəi, yili pulu, ə li la hii pulu.» Nwoo tii pɔ, Jesus ə nɛ yɛ diɛ: «Kɔ̨nɔ̨n ɉuwu kəlee kaa a mąą həɠɛɛ.» 20 Jesus ə mo nwɔ̨nɔ̨ yɛ diɛ: «Yii a kulɔ nu la, a həɠə nu nwɔ kiliŋąhiɛ hu, yili ɓə a nu kɔ́hɔɓo. 21 Mąąhɔlɔɓo, nu lii hu ɓə kiliŋąhiɛ ɲɔ̨nwɔ̨ɔ̨ɠaa da kulɔ laa, yɛ nu tɔɔ a mɛ̨nį ɲɔ̨n gɛɛ, yɛ bələi: nwuɔ̨ kɛɛ kaa la, nu paa mɛ̨nįɠaa, 22 nwɛli hon ŋąą, nu ɲɛ̨i kulaa ə ɓɛlan ɲei hɛn ɓɔ a ɲɔ̨nwɔ̨ɔ̨, gbąną laa mɛ̨nį, mɛ̨nį pili ɉu kɛɛ, tolo ɲɔ̨nwɔ̨ɔ̨ kulaa, lalan biliɛ, kpɔnŋąą kɛnɛ̨, ə mą kɛ da kilikpɛɛɲei laa. 23 Mɛ̨nį ɲɔ̨n ŋąą tii gəlee da kulɔ nu nwɔ kiliŋąhiɛ hu, diɛ nu kɔ́hɔɓo.» Nwea nɛ̨ɛ̨nu ta ə laa Jesus la ( Matie 15.21-28 ) 24 Yili pulu, Jesus ə li taa ta hu Tirə lɔi hu. Ə lɔ pɛlɛ ta mu. Hvo kɛ bɔ nuą di hvo gɔlɔn diɛ mą gaa laa. Kɛlaa, hva pɛli kɛ lɛɛi a nooɔ. 25 Nɛ̨ɛ̨nu ta ə kɛ laa, ɲinɛ̨n yɛ ɓo non nɛ̨ɛ̨nu pulu. Ə Jesus mąą woo mɛ̨n, ə pa ə too Jesus kɔ́wɔ mu. 26 Nɛ̨ɛ̨nui tii hvo kɛ a Ɉuifə mun. Ə kɛ a Fenisi taa ta hu mun Siri lɔi hu. Ə Jesus mąąnɛ̨ɛ̨ yɛ mą: «Gɛ́ ə́ ɲinɛ̨n ŋɛ̨i kpɛ nón nɛ̨ɛ̨nu pulu.» 27 Jesus ə mo mą yɛ mą: «Lɛapɛlɛɛ da wala ni pilɛ, nu hva di kɔ̨nɔ̨n ɉəɠə hvo bu yilɛ pɛlɛɛɠaa diɛ.» 28 Nɛ̨ɛ̨nu tii yɛ Jesus ɓa: «Tɛ̨ą li Ną́mu. Kɛlaa, lɛapɛlɛɛɠaa daa kɛi kɔ̨nɔ̨n mį́i, yii a kulɔ di yei a tooi, yilɛ pɛlɛɛɠaa da yili mį́i.» 29 Jesus ə mo nɛ̨ɛ̨nu tii ɓa, yɛ mą: «Ə wɔ woo pulu pənə mąą mɛ̨nį ɓa, pənə ə́ li ə́ pɔɔli. Ɲįnɛ̨n tii kɛi ə́ lon naa nɔ̨nwɔ̨ ɓo, aa həɠə bulu.» 30 Nɛ̨ɛ̨nu tii ə pənə ə li bɔɔli, ə non nɛ̨ɛ̨nu kaa naa ɲei gbin ŋą; ɲinɛn aa həɠə bulu. Jesus ə muųgbɛ ta laa hvaa 31 Jesus kulaa kɛa Tirə lɔi hu, ə li Sidɔn lɔi hu. Ə Daa Kpɛa-kpɛaa Pow lɔi hu ɓɔ. Ə pa Galile lɔi bowa-ya kwɛlɛ. 32 Di pa bɔ a hulɔnu ta nwəli tinɛ̨ɛ̨, ə lɛɛ, hvo kɛi hvaa. Di nɛ̨ɛ̨mąą hvə mą diɛ mą: «Ə yee pɛlɛ mą.» 33 Jesus ə ɉulɔnu tii hon, ə kulɔ la nuą lɔwai, ə ɲee kpiəɠaa lɔ nwəli hveelɛi hu, ə naaya hvilɛn ɉulɔnu tii nɛ̨n ŋą. 34 Yili pulu ə ɲɛ̨i pili yələi, ə nii tɛ ə doo; yɛ ɉulɔnu tii ɓa: «Ɛfata!» Mukulaa ɓaa: «Hvólóon.» 35 Ɲąąɓa, ɉulɔnu tii wəli ə hvólóon, nɛ̨n yɛ pənə, yɛ kɛa hvaa a ɉu ponoɔ̨. 36 Jesus ə nuą tii kəlee liɛwoo ɓo, yɛ diɛ: «Ka hvo ɉukulɔ nui lɔpee ta ɓa.» Kɛlaa, pələi lɔ ə kɛi di liɛwoo kɛ la a nwanąi, bələ lɔ ɓə di kɛi mɛ̨nįi tii hukulɔ la a di nwanąi. 37 Nuą tii di kwəi ə pili diɛ ə tɛɛ gɛi ɓa. Diɛ kɛ diɛ: «Gɛ mɛ̨nįɠaa kəlee lɛlɛɛi hvo gaai, gaa wəli wolo nuą wəli hvólóon ɉi, yɛ muųgbɛɠaa laa hvaa.» |