Markə 6 - Yálá laawoo hɛɓɛ (dc)Nazarɛtə nuą di hvo laa Jesus la ( Matie 13.53-58 ; Lukə 4.16-30 ) 1 Jesus ə həɠə laa yɛ li Nazarɛtə daai, ɓɛi ə nokolo laa kɛ laai. Nwɔ kalan nɛai di hvilɛn bulu. 2 Hvįįtɔɔ yələ, ə kɛi nuą mąąkwɛli di wɔ Yálá hvɛli pɛlɛ́ mu. Nuą tii kɛi nwoo mɛ̨n, di kwəi ə pili diɛ; diɛ kɛ diɛ: «Akɛti, mįnɛ̨ ɓə ə həɠə laa a yii mąą mɛ̨nįɠaa ŋɛ̨i? Ə mɛ̨nį kɔ́lɔn ŋąą ŋɛ̨i hɔlɔɓo ləi? Mį ɓə ə həɠə laa a gbalo mɛ̨nįɠaa kɛɛ ŋɛ̨i? 3 Akɛti, Mari lon ŋɛ̨i a nwulu haɠa mun ya hvə li mɔ̨ɔ̨? Kɛlɛi nəɠəni ɓaa a: Ɉakə, Ɉosɛsə, Ɉudə da Simɔn? Akɛti, mąąhalani di hvo mɔ̨ɔ̨ ɓɛ ka gu lɔwai?» Di wɔ kiliŋąhiɛɠaa kɛ pələi tii ɓə gɛ di hvo laa na. 4 Jesus ə mo diɛ yɛ diɛ: «Yálá kwəi mɛ̨nį hukulɔ mun mąąwiɛ kɛɛnąą kəlee, hvo kɛli lɔ bɔ taai da nwɔ nuą lɔwai, ə mą kɛ ɲɛ̨i bɛlɛ́n nuą, diɛ ɓə di hva mąąwiɛ.» 5 Jesus hvo kɛa pɛli kpalo mɛ̨nį kɛ laa, hvo kɛli lɔ nwɔn gɛ nuą tii ə ɲee pɛlɛ di mɛ̨i, ə di kɔ́lɔi pono. 6 Nazarɛtə nuą di wɔ wəli walawala laa ə gwəi pili mą. Yili pulu, Jesus ə li di kwɛlɛ taaɠaa hu yɛ kalan gɛ. Jesus ə nwɔ kalan nɛai tii, ə di tɔɔ hveelɛ-hveelɛ ( Matie 10.5-15 ; Lukə 9.1-6 ) 7 Ə nwɔ kalan nɛa pow kɔ́w hveelɛ təli ə di tɔɔ hveelɛ-hveelɛ, ə di tí. Ə huwalawala tɛɛ di pɔ ɲinɛ̨nŋąą mɛ̨i. 8 Ə mo diɛ yɛ diɛ: «Ka kɛi li, ka hvo hɛn nɔpee ta həɠə. Hvo kɛli lɔ hiɛ kulɔ tunwɔ̨n. Ka hvo kɔ̨nɔ̨n ɉəɠə. Ka hvo ɓíi həɠə, əlɛɛ, ka hvo wali həɠə. 9 Ka gbakeakea lɔ ka kɔ́wɔ ŋą. Kɛlaa, ka hvo həɠə hveelɛ həɠə.» 10 Ə mo nwɔ̨nɔ̨ diɛ yɛ diɛ: «Ɓɛlɔwai ka həli la taa ta hu, pɛlɛ yii da ka lɔ mu, ka lɛɛ laa, ə lɛɛ la ɉu ka pulu pənəi lɔwai ə ɉəli. 11 Akɛ daa tii hu nuą da wala di yee hee ka mui, da wala di wəli tɔɔ ka woo ɓai, ka həɠə laa. Ka kɛi həɠə laai, ka ka kɔ́wɔ ɲą munun gulɔ ka kɔ́wɔ ɓa ka nɛɛ laa. Yili a kɛ diɛ a ka wɔ kɛla.» 12 Galan nɛa liɛ kɛa, di kɛi kɛ nuą diɛ: «Ka tinɛ̨n ka ka túwɔ́ pɛlɛ ɲɔ̨nŋąą mąąhvalin.» 13 Di kɛi ɲinɛ̨nŋąą kpɛ, diɛ ɲɔ̨n gɛ nuą tamąą mąąti a wulɔ di kɔ́lɔi yɛ pono. Ɉaan Baptistə haa mɛ̨nį ( Matie 14.1-12 ; Lukə 9.7-9 ) 14 Nąąlɔwai, tɔɔmun Herodə ə Jesus mąą mɛ̨nį bələ mɛ̨n, mąąhɔlɔɓo, mąą tin ə too kɛɛnąą kəlee. Nu taɠaa di kɛli kɛ diɛ: «Ɉaan-Batistə ka tii aa nwun aa kulɔ haa yəi, mɛ̨nį gɛi kpalo mɛ̨nį kɛɛ nwɔ huwalawala kaa la ɲei yaa li.» 15 Daɠaa diɛ kɛ diɛ: «Eli ka tii. A wala kɛ tii, Yálá kwəi mɛ̨nį hukulɔ mun da lɔ li, yii gɛ pələ kaa lɔ yɛ tɔlɔɔ nwɛi ta.» 16 Nwooɠaa tii mɛ̨n Herodə ə moi, ə mo yɛ diɛ: «Ɉaan-Batistə ŋɛ̨i ŋą nwun dee ŋą, ya ka tii aa nwun aa kulɔ haa yəi!» 17 Pələi Herodə ə Ɉaan nwun dee la ŋą bələ ka: Herodə ə mo yɛ di Ɉaan hon di ɲili di doo gaho ŋą. Herodə ə gɛ tii, mąąhɔlɔɓo, ə nəɠə Filipə nɛ̨ą Herodiadə həɠə a nɛ̨ą. 18 Ɉaan ə kɛi mo Herodə ɓa yɛ kɛ mą: «Mąą hvo nɛ̨ɛ̨li hvo ə́ ləɠə nɛ̨ą həɠə a ə́ nɛ̨ą.» 19 Herodiadə liiholiɛ kɛ Ɉaan pɔ, ə kɛ bɔ ə Ɉaan paa. Kɛlaa, hva pɛli kɛ mą, Herodə mąą mɛ̨nį ɓa. 20 Herodə ə kɛi ɲɔ̨w Ɉaan ɓa. Mąąhɔlɔɓo, ə kɛ gɔlɔn yɛ Ɉaan kaa a nu mąąhəɠɛɛ, əlɛɛ, dəlimo. Herodə ə kɛi Ɉaan mɛ̨i kaa. Herodə aa kɛi kɛ Ɉaan woo mɛ̨n, gwəi ə kɛi pili mą. Kɛlaa, ə mą kɛ tii, nwoo mɛ̨n nwɛli ə kɛ lɔ mą. 21 Yələ ta, Herodə ə kɛi gaa yələ mąą kwəinɛ̨ɛ̨ kulɔ. Volói tii ə kɛ Herodiadə ɲɛ̨i ɓa a hvóló lɛlɛɛ yai kɛ a pɛli kɛ ə Ɉaan paa la. Herodə ə nwɔ kalanɉonŋąą nuą kəlee ŋąąkpɔn, ə mą kɛ nwɔ holahi nwun nąmįną, da Galile kalanɉonŋąą kəlee. Ə hɛli kɛnɛ̨ pɛli diɛ. 22 Herodiadə lon nɛ̨ɛ̨nu ə pa ə mąną kpɔ a nɛlɛɛ nuą tii ɲɛ̨i ɓa. Yili ə Herodə da mɛlaa di kwəinɛ̨ɛ̨ kpɔ kɛnɛ̨. Tɔɔmun Herodə ə mo nɛ̨ɛ̨non tii ɓa yɛ mą: «Yii lɔpee ə́ kaa bɔ, naa ɓo mą́ą́; ŋą dɛɛ ə́ pɔ.» 23 Herodə ə nɛ̨ɛ̨mą ə nwoo kwɛlɛ nɛ̨ɛ̨non ma, yɛ mą: «Yii lɔpee ya vɛli mą́ą́ ŋą dɛɛ ə pɔ. Ə mą kɛ nwɔ tɔɔlaai bələ tɔ̨nɔ̨ ɓə, ŋą dee ə́ pɔ.» 24 Nɛ̨ɛ̨non tii ə kulɔ ə li yɛ nee ɓa: «Lə kpɔ ɓə mąąnɛ̨ɛ̨ ŋą vɛli tɔɔmun ma?» Nee yɛ mą: «Li yɛ mą: Ɉaan-Batistə nwun galən ɓə gáá bɔ.» 25 Nɛ̨ɛ̨non ə gilɛ həɠə ə li yɛ tɔɔmun ma: «Ɉaan-Batistə nwun mə gáá bɔ naa gəgən ɉu.» 26 Yili hvo kpɔ nɛ̨ɛ̨ tɔɔmun ma. Kɛlaa, nwooi tii ə gwɛlɛ mɛlaa ɲɛ̨i ɓa, mąą mɛ̨nį ɓa, hvo kɛ bɔ hvo gwɛla woo kala. 27 Herodə ə nɛ̨ɛ̨mą ə nwɔ gaho pɛlɛ́ lamun dɔ̨nɔ̨ tɔɔ ə li ə Ɉaan nwun dee ŋą ə paa la. Gaho pɛlɛ́ la mun tii ə li gaho pɛlɛ́ mu ə Ɉaan nwun dee ŋą. 28 Ə Ɉaan nwun naa gəgən ɉu ə paa la ə dɛɛ nɛ̨ɛ̨non pɔ. Nɛ̨ɛ̨non ə li ə dɛɛ nee pɔ. 29 Yii kɛa Ɉaan nwɔ kalan nɛai di yili bələ mɛ̨n, di pa di bowa həɠə də li di noo. Jesus ə nu waa lɔɔli kɔ̨nɔ̨n gɛ ( Matie 14.13-21 ; Lukə 19.10-17 ; Ɉaan 6.1-14 ) 30 Galan nɛa pow kɔ́w hveelɛ tii Jesus ə di tɔɔ, di pənə di pa. Yiiiɠaai kpɔ di gɛ, da yiiɠaai kpɔ di galan, di gəlee hukulɔ Jesus ɓa. 31 Nu kpulu kɛnɛ̨ ə kɛ laa. Daɠaa diɛ li, daɠaa diɛ pa. Nu kpulu kɛnɛ̨ pələ mąą mɛ̨nį ɓa, lɔwai hvo hɔlɔɓo Jesus da nwɔ kalan nɛai di yei di hvo di kɔ̨nɔ̨n mį́i. Ya ɓəi gɛ, yɛ diɛ: «Ka pa gu kulɔ nuą lɔwai gwəli kɛɛnąą ta ka ka hvįįtɔɔ.» 32 Di kulɔ nuą lɔwai di tɛ di hee gələn ɉu. 33 Kɛlaa, nuą di di kaa diɛ li, di di kɔ́lɔn. Nuą di həɠə daa kpɛa-kpɛaɠaa hu di pa di kɔ́wɔ ŋą. Di laa a ɲá koo di gbɛa həli ɓɛi Jesus da nwɔ kalan nɛai di kɛi pa ɲá teen ɉi laai. 34 Ɓɛlɔwai Jesus ə kulɔ la gələn ɉu, ə nu kpulu kɛnɛ̨i tii kaa, di ɲɛ̨imąąwɛli ə ɉon. Mąąhɔlɔɓo, di kɛ pələ ə kɛɛ yɛ ɓɛlaa kpulu yii mɛ̨i kaa mun və mą. Ə di kalan a mɛ̨nį tamąą. 35 Yələ wilii pɔ, hvitili yɛ kɛa pu, Jesus nwɔ kalan nɛai di lɛɠɛ mą, diɛ yɛ mą: «Kpini kaa kɛa pɛlɛi, ɓɛ kaa a lɔi pun ɉu. 36 Mo nuą ŋɛ̨i diɛ: də li gu kwɛlɛ taaɠaa hu di di kɔ̨nɔ̨n gwɛli di ɲá.» 37 Kɛlaa, Jesus ə di woo pulu pənə yɛ diɛ: «Kaa kpinįi ka di kɔ̨nɔ̨n gɛ.» Galan nɛa di mąąni kɛ diɛ mą: «Ə kaa bɔ gwə li ku wali kwələ nwun veelɛ lɛɠɛ ya, ku gɛ a di kɔ̨nɔ̨n?» 38 Jesus ə mo diɛ yɛ diɛ: «Lɛɠɛ yɛli ɓə laa ka yei? Ka li ka nąą kaa.» Yii kɛa də li di nąą kaa, di mo mą diɛ mą: «Lɛɠɛ lɔɔli da hɔ̨nwɔ̨lee hveelɛ ɓə laa.» 39 Jesus yɛ diɛ: «Ka mo nuą diɛ, di hee nɔi ɓa gala ŋą.» 40 Nuą di hee a di kpulu a nu nwun dɛitɛi, daɠaa nu yee-lɔɔli. 41 Yili pulu, Jesus ə nɛɠɛ lɔɔli huɠalə-ɠalə, ə dɛɛ nwɔ kalan nɛai pɔ, ə gɛ, di ɲąąkwɛlɛ nuą diɛ. 42 Nu kəlee di mį́i di pilɛ. 43 Nɛɠɛ kpəli lɛɛ da Ɉɔwɔlee kpəli, di ɲɛɠɛ, ə kpɔlo pow kɔ́w hveelɛ laa hvee, di paa la Jesus pɔ. 44 Nuą gɔ̨nɔ̨n tii mį́i, di kɛ a hinąą nu waa lɔɔli. Jesus ə hiɛ ya ɲą ( Matie 14.22-23 ; Ɉaan 6.15-21 ) 45 Ɲąąɓa, Jesus ə mo nwɔ kalan nɛai diɛ yɛ diɛ: «'Ká tɛ gələn ɉu ka ɲá teen dɔ́wɔ́ Bɛtsaida daa pələ.» Yaa kpinįi tii ə lɛɛ laa yɛ nu kpului tii tɔɔ pɛlɛi. 46 Yii kɛa Jesus ə nuą tii tɔɔ pələi, ə tɛ yee kpukpu ta tonna yɛ Yálá hvɛli yaa tɔ̨nɔ̨. 47 Kpini pɛlɛɛ kɛa kɛ, gələn yɛ ɓo ɲá hąąi. Jesus yaa tɔ̨nɔ̨ yɛ ɓo gahin ŋą. 48 Hvaŋa ə kɛi dɛɛ ɲá ŋą. Jesus kili ə kɛ ɉu yɛ nwɔ kalan nɛai kaa mɔ̨nɔ̨ mį́i gələn ɉiɛ mɛ̨nį hu. Yələ ɓoi kpinį mu, Jesus ə hvilɛn ɲá ŋą yɛ hiɛ yɛ li nwɔ kalan nɛai pɔ. Ə gɛ yɛ aa kɛi pa tɛɛi diɛ. 49 Ɓɛlɔwai di gaa la ɲa ɲái, di kɛi di kiliŋąhiɛ diɛ kɛ diɛ: Haaŋamu ka tii pai di pɔ, diɛ tómą. 50 Mąąhɔlɔɓo, di kəlee di gaa, di ɲɔ̨w, di mąą yɛ kpɛlin. Ɲąąɓa, Jesus ə hvaa di pɔ yɛ diɛ: «Ka ka liikpələ, ka hvo ɲɔw, ɲą́ą́ ka tii.» 51 Yili pulu, ə tɛ di pɔ gələn ɉu, vaŋa ə kpəla mą. Di kəlee di kwəi ə pili diɛ kpɔ kɛnɛ̨. 52 Mąąhɔlɔɓo, gbalo mɛ̨nįi Jesus ə gɛ nɛɠɛ mɛ̨nį hu, di hvo gbaɠala kaa. Di wɔ mɛ̨nį kɔ́lɔn ŋąą hvo kɛ kɛnɛ̨ li di hvo gbaɠala kaa. Jesus ə nwɔn gɛ nuą tamąą kɔ́lɔi pono Gɛnesarɛtə lɔi hu ( Matie 14.34-36 ) 53 Di kpɛɛ kɛa a ɲá teen ŋąą Gɛnesarɛtə lɔi hu, di di wɔ kələn gbulɔn laa gahin mą. 54 Di kulaa gələn ɉu, ɲąąɓa, nuą daa mąn Jesus kɔ́lɔn. 55 Gaai kɛa nuą tii di mo, də li di bələ ɓo nɔi nąą kəlee. Nu kəlee diɛ pa a di wɔ ɲɔ̨n gɛ nuą di laa lii hu, ɓɛi da Jesus mąą pɛlɛ mɛ̨n naa. 56 Ɓɛi lɔpee ə kɛi li laa, ə kɛ a taa kɛnɛ̨, ə kɛ a taa logolo nuą di kɛi pa a ɲɔ̨n gɛ nuą diɛ, di laa gwəli hąąiŋąą ɓa, diɛ nɛ̨ɛ̨mąą hvə Jesus ɓa, ə gɛ, di di yee hee lɔ nwɔ həɠə won ɓa. Yaan, nuą lɔpee kɛi di yee hee mą di kɔ́lɔi ə kɛi pono. |