Markə 5 - Yálá laawoo hɛɓɛ (dc)Jesus ə ɲinɛ̨n gbɛ hulɔnu ta pulu ( Matie 8.28-34 ; Lukə 8.26-39 ) 1 Yili pulu, Jesus da nwɔ kalan nɛai di kɛɛ kɛa ɲá pulu pələ, Geraseni nuą di wɔ lɔi ɓa. 2 Jesus kɛɛ kɛa kulɔi gələn ɉu, ŋąąɓa, hulɔnu ta ə həɠə kámą la ə pa, ə naa kwiɛn. Ɲinɛ̨n ə kɛ ɉulɔnu tii pulu. 3 Ɉulɔnu tii ɲii ɓa kɛ a kámą la. Nu ta lɔpee hva pɛli kɛ ɲili hvo lɛɛ ɲili hu; ə mą kɛ daa ɲili a yɔwɔn. 4 Mąąhɔlɔɓo, hvóló tamąą, da ɲili kɛ a kwɛli yɛli da yɔwɔnŋąą, kɛlaa, ə mą kɛ tii, a gwɛli yɛli da ɲɔ̨wɔnŋąą tii hu tee ə kulɔ ɲili hu. Nu ta lɔpee hvo kɛi pɛli golohoɓoi. 5 Hvóló kəlee, ə kɛ kámą laɠaa ɓa, yɛ tɛ yeeɠaa tonna yɛ lia tómą, yɛ gbɔwɔ mąąnwąną a kwɛniɠaa. 6 Ɉulɔnu tii ə Jesus kaa lɔ kwɛaala yɛ pa, ə gilɛ həɠə, ə pa, ə tɔɔ Jesus kɔ́wɔ mu; 7 ə tómą kpɔ a nwoo kɛnɛ̨ yɛ mą: «Lə ɓə yɛ ə́ gɛ a ɲą́ą́, Jesus, Yálá yaai gaa yələkɔlɔn ɉu non? Gáá nɛ̨ɛ̨mąą hvəə yɛ́, 'gɛ Yálá ɓa, hvó náánɔ̨nwɔ̨ ɓo.» 8 Ə mo tii, mąąhɔlɔɓo, Jesus ə kɛ mą: «'Ɲinɛ̨n, həɠə ɉulɔnu ŋɛ̨i pulu.» 9 Jesus ə ɲinɛ̨n tii mąąni kɛ yɛ mą: «'Ə́ laa ɓa a gbɛɛ?» Ɲinɛ̨n tii yɛ Jesus ɓa: «Náá ɓa a ‹Kpulu›, mąąhɔlɔɓo, ku tamąąi.» 10 Ɲį́nɛ̨n tii ə nɛ̨ɛ̨mąą hvə Jesus ɓa yɛ mą: «'Hvo ku kpɛ hvo ku kulɔ nɔi ŋɛ̨i hu.» 11 Ɓoi kpulu kɛnɛ̨ ta ə kɛ laa ɲee ɓa ɲá kwɛlɛ diɛ di kɔ̨nɔ̨n gwɛli. 12 Ɲįnɛ̨nŋąą tii di nɛ̨ɛ̨mąą hvə Jesus ɓa diɛ mą: «Hvaama kwə li ku hvilɛn moiɠaa tii pulu.» 13 Jesus yɛ diɛ: Ŋą́ą́ hvaa mą. Ɲįnɛ̨nŋąą tii də li di lɔ moi kpului tii hu, moiɠaa kəlee di gilɛ həɠə diɛ ɲee yɛɛ, gəlee də li di pu ɲái, di nwun na ə pili. Moiɠaa tii lonoɔ a pɛli kɛ ə kɛ a: ɓoi waa hveelɛ. 14 Nuą tii kɛi moiɠaa mąąkpɛ, di tɛɛ a gilɛ, də li di mɛ̨nį tii hukulɔ taai, ə mą kɛ ɲii yɛa kələ laɠaa ɓa, ɓɛi nuą di kɛi taatɛlɛɛɠa tɔɔlaai. Nu kpulu ə pa nąą kaa mɛ̨nį ɓa. 15 Nuą tii pa, di həli Jesus ɓa, nui tii ɲinɛ̨nŋąą di kɛ bulu, di gaa heeni, həɠə yɛ ɓo gwaną, kili lɛlɛɛ yɛ ɓo mą, ɲɛ̨i laɠiɛ. Nuą tii kəlee di ɲɔ̨w. 16 Ɉulɔnu tii ɲinɛ̨nŋąą di kɛ bulu, pələi di həɠə la bulu, da pələi moiɠaa tii mąą mɛ̨nį ə kɛ la; nuąi mɛ̨nįɠaa tii kəlee nąą kaa, də li diɛ ɉukulɔ. 17 Nuą tii di nɛ̨ɛ̨mąą hvə Jesus ɓa diɛ mą: Ku kaa nɛ̨ɛ̨mąą hvəə yɛ́ kuɔ ə́ həɠə ɓɛ kuɔ lɔi hu. 18 Ɓɛlɔwai kɛa Jesus ə tɛ la gələn ɉu, ɉulɔnu ŋɛ̨i ə ɲinɛ̨nŋąą kpɛ bulu, yili ə nɛ̨ɛ̨mąą hvə mą, ə gɛ, ə lɛɛ bɔ da yaa də li. 19 Jesus hvo hvaa mą. Kɛlaa, ə kɛ mą: «'Pənə ə́ li ə́ pɔɔli. Mɛ̨nį ŋɛ̨i Yálá aa gɛ yɛ́, ə́ ɉukulɔ ə́ yei bɛlɛ́n nuą diɛ.» 20 Ɉulɔnu tii ə li kɛa, mɛ̨nįɠaa Jesus ə gɛ ma, yɛ yili hukulɔ Daa Kpɛa-kpɛa Pow lɔi tii hu nąą kəlee. Nuą kɛi nwoo mɛ̨n di kwəi ə pili diɛ. Ɉuifə nwun nąmu ta lon nɛ̨ɛ̨nu, da nɛ̨ɛ̨nu ta yii ɲąmą ɲɔ̨n ə kɛ mą, di mąą mɛ̨nį ( Matie 9.18-26 ; Lukə 8.40-56 ) 21 Ɓɛlɔwai Jesus ə pənə ə ɲá teen na, nu kpulu kɛnɛ̨ ə pa, ə mąą tinɛ̨n, ɓɛlɔwai ə kɛ tɔɔ ni la ɲá kwɛlɛ. 22 Yálá hvɛli pɛlɛ́ nwun nąmu ta yii da kɛ naa ɓa a Ɉairɔsə, ə pa ə pɛlɛ Jesus kɔ́wɔ mu. 23 Ə nɛ̨ɛ̨mąą hvə mą yɛ mą: «Gɛ́ ə́ pa ə́í yee pɛlɛ mɛ̨i, ə gɛ, gɔlɔi ə pono ə yɛnɛ̨ɛ̨ kɛ.» 24 Ɉairɔsə da Jesus di kɛɛ lii, nu kpulu kɛnɛ̨ ə hvilɛn di pulu, diɛ vaną. 25 Nɛ̨ɛ̨nu ta ə kɛ laa, ɲąmą ɲɔ̨n yɛ ɓo mą. Ɲɔn tii aa kɛ kwɛlan bow gɔw hveelɛ kɛ mą. 26 Nɛ̨ɛ̨nu tii aa kɛ mɔ̨nɔ̨ tamąą mį́i hali kɛ nuą yei. Ɲəi waliɠaa kəlee daa kɛ kpɛɛ. Kɛlaa, gɔlɔi hvo pono. Yaamun, ɲɔ̨n ə kɛi lɔ too bulu. 27 Nɛ̨ɛ̨nu tii, mɛ̨nįɠaa Jesus ə kɛi gɛ ə yiliɠaa kəlee mąą pələ mąn. Ə pa Jesus pulu pələ nu kpulu hu, ə ɲee hee Jesus nwɔ həɠəi ɓa. 28 Mąąhɔlɔɓo, ə giliŋąhiɛ yɛ mą: «Akɛ ŋą ɲéé hee kpɛli nwɔ həɠəi ɓa, gɔ́lɔ́i a pono.» 29 Nɛ̨ɛ̨nu tii nwɔ ɲąmą ɲɔ̨n tii ə kpɛɛ kpɔlɔɔ tii ŋąąɓa. Ə gili kɔ́lɔn gbɔwɔ kpinį hu yɛ nwɔ ɲąmą ɲɔ̨n aa kpɛɛ mą. 30 Jesus ə gili kɔ́lɔn yɛ huwalawala taa aa kulɔ ɉu. Ə tinɛ̨n ə ɲɛ̨i hee bulu pələ yɛ diɛ: «Gbɛɛ ɓə ɲee hee nwɔ́ həɠəi ɓa?» 31 Nwɔ kalan nɛai diɛ mą: «Yɛ́ gaa nu kpulu aa ə́ mąą tinɛ̨n diɛ ə́ hvaną, yɛ́ kɛɛ mąąləngə yɛ́ kə diɛ: ‹Gbɛɛ ɓə ɲee hee mą́ą́?›» 32 Kɛlaa, Jesus ə ɲɛ̨i laa gwɛlɛ, ə gɛ, nui ɲee hee mą ə gaa. 33 Nąąlɔwai, nɛ̨ɛ̨nu tii ə ɲɔ̨w, mąą yɛ kpɛlin. Mąąhɔlɔɓo, mɛ̨nį kɛ la ə gɔlɔn. Ə li ə too Jesus kɔ́wɔ mu, ə tɛ̨ą kəlee ɓo mą. 34 Kɛlaa, Jesus ə mo mą, yɛ mą: «Nón nɛ̨ɛ̨nu, ə́ wɔ laa na laa aa ə́ ɓalo, li liilaa hu, ə́ wɔ ɲɔ̨n gbɛɛ li yɛ́.» 35 Ɓɛlɔwai Jesus ə kɛi mɛ̨nįɠaa tii ɓo la, wɛlɛɛ ɓo nuą di həɠə Ɉairusə yei bɛlɛ́n di pa diɛ mą: «Ə́ lon aa haa. Hvó mąąkwɛli kɛmun hviikpɛɛ.» 36 Jesus hvo nwooɠaa tii kaa a mɛ̨nį nwalawala. Ə mo Ɉairusə ɓa yɛ mą: «Hvo ɲɔw, laa na laa kɛ lɔ.» 37 Jesus hvo hvaa mą nui lɔpee ta hvo hvilɛn bulu, hvo kɛli Piɛrə, Ɉakə da nəɠə Ɉaan. 38 Də li di həli Yálá hvɛli pɛlɛ́ nwun nąmu Ɉairusə yei bɛlɛ́n. Jesus ə nu kpulu kɛnɛ̨ kaa laa, damąą diɛ wɔlɔ kpɔ a di woo kɛnɛ̨. 39 Ə lɔ bɛlɛ́n, yɛ nuą tii diɛ: «Nɛlɛ nwɔ wɔlɔ ɓə ka káá moi, kaa kɔ̨nwɔ̨? Nɛ̨ɛ̨non hvo haa li, gaa yii.» 40 Nuą tii di kɛi yɛlɛ mą. Jesus ə nuą tii kəlee kpɛ bɛlɛ́n, ə lɛɛ lɔ a: nɛ̨ɛ̨non nąn da nee, ə lɛɛ, Jesus nwɔ kalan nɛa haaɓai, diɛ lɔ ɓə lɛɛ bɛlɛ́n ɓɛi nɛ̨ɛ̨non bowa ə kɛ laai. 41 Jesus ə nɛ̨ɛ̨non hon a ɲee, yɛ mą: «Talita kumi!» Yili mukulaa ɓaa: «Nɛ̨ɛ̨non, gáá moi yɛ, gɛ́ ə́ ə́ ɲənąąɓo.» 42 Nɛ̨ɛ̨non ə muhəɠə kpɔlɔɔ tii a mąą hulaa yɛ hiɛ. Gaa kwɛlan ə kɛ pow kɔ́w hveelɛ Yii kɛa nuą di ɓɛli kaa, di kwəi ə pili kpɔ diɛ kɛnɛ̨. 43 Kɛlaa, Jesus ə mo nɛ̨ɛ̨non tii nwɔ nuą diɛ kpɔ a nwąnąi, yɛ diɛ: Ka hvo mo nui lɔpee ta ɓa. Yili pulu yɛ diɛ: «Ka kɔ̨nɔ̨n dɛɛ bɔ ə mį́i.» |