Markə 4 - Yálá laawoo hɛɓɛ (dc)Mɔ̨nun ɉuwu pili mun mąą hanwon ( Matie 13.1-9 ; Lukə 8.4-8 ) 1 Jesus ə kalan gɛ nwɔ̨nɔ̨ Galile bowa-ya kwɛlɛ, nu kpulu kɛnɛ̨ ə ŋąąkpɔn gwɛlɛ; ə tɛ ə hee gələn ɉu ɲa ŋą. Nu kpului tii di kɛ ɲa kwɛlɛ di ɲɛ̨i heɛ mą. 2 Ə di kalan a mɛ̨nį tamąą hanwon ɉu. Ə kɛi di kalan yɛ kɛ diɛ: 3 Ka ka wəli tɔɔ. Hulɔnu ta ə kɛi mɔ̨nun ɉuwu pili. 4 Gɛɛ bili, da ə too bələ kwɛlɛ, nwɛ̨nįɠaa di pa di gbələ. 5 Da ə too hvanɲą, ɓɛi pɔlɔ hvo kɛ laa kɛnɛ̨. Di ɓɔn ɉa. 6 Kɛlaa, hvóló ə hee diɛ ə di paa. Mąąhɔlɔɓo, pɔlɔ hvo kɛ laa kɛnɛ̨ ɉamu hvo yɛɛ ɉu. 7 Ɉuwu ta ə too yɔw-ŋąąlən ɉu. Di ɓɔn ɲɔ̨w-ŋąąlən gbɔlɔ ə kpəlaan na, ə paa; hvo ɓa. 8 Kɛlaa, daɠaa di too lɔi lɛlɛɛ hu. Di ɓɔn. Di kɛnɛ̨ di ɓa. Daɠaa di ɓa yɛ ɓo: pow haaɓa, daɠaa pow mɛ̨ida. Daɠaa di wɛi yɛ ɓo nwundɔ̨nɔ̨. 9 Jesus ə mo diɛ yɛ diɛ: «Akɛ wəli kaa kaa, ka mɛ̨nį ŋɛ̨i mɛ̨n.» Lə mɛ̨nį ɓa Jesus ə kɛi hvaa lɔ a hanwon? ( Matie 13.10-17 ; Lukə 8.9-10 ) 10 Ɓɛlɔwai kɛa Jesus da nwɔ kalan nɛa pow kɔ́w hveelɛ di kɛ la di tɔ̨nɔ̨ kɛɛnąą da nu taɠaa, galan nɛa di mąąni kɛ diɛ mą: Ɉanwon ŋɛ̨i ə ɉɔɔ mukulaa ɓa a lə? 11 Ə di woo pulu pənə yɛ diɛ: «Ka wɛi, kaa Yálá-taa tɔɔlaa hu mɛ̨nį lowuɔɠaa aa tɛɛ ka pɔ. Kɛlaa di wɛi, hvo tɛɛ li di pɔ, da mɛ̨n hanwon ɉu. 12 Əgɛ, yɛ pələi Yálá laawoo hɛɓɛ́ ə mo la, yɛ mą: «‹Da kɛɛ kaa, di hva mąąkpɛɛ; wəli kaa diɛ mɛ̨nį yɛ too ɉu, kɛlaa, di hva aa kaa; əgɛ, di hvo pa tinɛ̨n di hvo kpəla mɛ̨nį ɲɔ̨n mą, di mąąhvaa hvo lɛɛ!›» Mɔ̨nun ɉuwu pili mun mąą hanwon ɉukulɔ ( Matie 13.18-23 ; Lukə 8.11-15 ) 13 Yili pulu, Jesus ə mo diɛ yɛ diɛ: «Ka hvo moɔ ɉanwon ŋɛ̨i mukulaa kɔ́lɔn? Akɛti, ka pɛli kani ka hanwon da kpɛli mukulaa kɔ́lɔn nəi? 14 Mɔ̨nun ɉuwu, ya ɓaa Yálá laawoo laa. 15 Nu taɠaa kɛ pələ kaa yɛ: bələ kwɛlɛ, ɓɛi nwoo tii a too laa. Ɓɛlɔwai nuą tii da Yálá laawoo mɛ̨n na, ɓilihi a pa ə nwoo tii kulɔ di lii hu. 16 Pələ lɔ ɓə ga la nwɔ̨nɔ̨ daɠaa diɛ, da di yee hee Yálá laawoo mu, yɛ vanɲą lɔi tii. Da mɛ̨n, da di yee hee mu a kwəinɛ̨ɛ̨. 17 Kɛlaa, di hva nɛɛ laa nwoo tii hvo ɉeei kaa di lii hu. Da di yee hee lɔ mu a lɔwai logolo tiikpə. Ɓɛlɔwai ɓɛlɛkpɛɛ mąą a həli la diɛ Yálá laawoo mąą mɛ̨nį ɓa, da lənə Yálá mąą mɛ̨nį ɓa. 18 Yii ŋɛ̨i too ɲɔ̨w ɲąąlən ɉu, yili mąą nuą diɛ ka tii, da Yálá laawoo mɛ̨n. 19 Kɛlaa, yɛnɛ̨ɛ̨liihɛlɛnŋąą, da hɛn gɔw nwɔ ɲɛ̨i kulɔ bɔ, ə mą kɛ, yɛnɛ̨ɛ̨ nwɔ ŋąąnɛɛɠaa da kpinįn a diɛ, ə di hvinatɔn, di hva pɛli ɓai. 20 Nu taɠaa da di yee hee nwoo tii mu yɛ pələi nɔi lɛlɛɛ kaa la. Da gbaɠala kaa. Daɠaa di ɓa yɛ ɓo: pow haaɓa, daɠaa pow mɛ̨ida, daɠaa nwun dɔ̨nɔ̨.» Labon mąą hanwon ( Lukə 8.16-18 ) 21 Yili pulu, Jesus yɛ diɛ: «Nu hva nwɔ̨n dɔɔ hvo ɉee hɛn ɲąŋą mu; a wala kɛ tii, hvo ɉee kpowəi. Kɛlaa, nu ya ɉee kpɛlin gweaa ŋą. 22 Mɛ̨nį yiiɠaa mɛ̨i kpulɔɔ, gəlee kaa pai kulɔi pono ŋą. 23 Akɛ mɛ̨nį mɛ̨n nwəli kaa kaa, ka mɛ̨n a nɛlɛɛ!» 24 Jesus ə mo nwɔ̨nɔ̨ diɛ, yɛ diɛ: «Mɛ̨nį yiiɠaa ka káá mɛ̨n ɉi, ka gɛ a nɛlɛɛ! Pələi ka káá mɛ̨inɛ̨ɛ̨ kɔ́ɔn ɉi la kaa dɛɛ nuą pɔ, pɛlɛ lɔ ɓɛ Yálá a gɔwɔn na, ə da laa mɛ̨i ə dɛɛ ka pɔ. 25 Mąąhɔlɔɓo, nui hɛn gaa ɲɛ̨i, da da pɛlɛ mą. Kɛlaa, nui hɛn və ɲəi, yii woloi gaa ɲɛ̨i da gulɔ ɲɛ̨i.» Hanwon ɲii vilɛn ŋąąi mɔ̨nun mą 26 Jesus yɛ nwɔ̨nɔ̨ diɛ: «Yálá-taa tɔɔlaa kɛ pələ kaa yɛ, hulɔnu ta yii ə mɔ̨nun ɉi ɲei ɲɛa. 27 Ə tɛ taai. Ə lɛɛ la ɉu mɔ̨nun ə ɓɔn, ə kpilɛ, ə wolo ə mɔ. Pələi kpɔ mɔ̨nun tii ə tɛɛ la yɛ kɛ tii, ɉulɔnui tii hvo yili gbaɠala kɔ́lɔn. 28 Nɔi tii lɔ ɓə ɉihɛn tii kɔ̨nɔ̨n gɛ, ə lɛɛ la ɉu ə mɔ̨n. 29 Yii kɛa mɔ̨nun ə mɔ, nąmu ə li ə dee.» Hanwon yii vilɛn ŋąą mɛ̨ɲɛ̨nɛ̨n gɔw ɓa ( Matie 13.31-32 ; Lukə 13.18-19 ) 30 Jesus ə mo nwɔ̨nɔ̨ diɛ yɛ diɛ: «Lə ɓə gwa pɛli gu Yálá-taa tɔɔlaa kɔ́ɔn mą? A wala kɛ tii, hanwon nə kɛɛ ɓə gwa pɛli gu ɉɔɔ yɛ hvilɛn mą? 31 Gɛ pələ kaa yɛ mɛ̨ɲɛ̨nɛ̨n gɔw yii dikpə dɛɛ hihɛn gɔw kəlee ɓa lɔi mɛ̨i. 32 Kɛlaa, nu ya ɉi, a kɛnɛ̨ nwɛ̨nį yɛ pɛli daa tɔɔi ɉu.» 33 Pələ ɓə Jesus ə kɛi nuą kalan na hanwon ɉu, yɛ pələi yii ŋɛ̨i kaa la. Ə kɛi ɉanwonŋąą tii hɔɔ yɛ bɛli nwoo mɛ̨n nuą di wɔ mɛ̨nį kpaɠala kaa kɛ pələ kaa la. 34 Hvo kɛi mɛ̨nį ta ɓo diɛ kpɛli-kpɛli akɛ hvo hanwon ɉɔɔ li. Kɛlaa, da kɛ kɛa di tɔ̨nɔ̨ kɛɛnąą da nwɔ kalan nɛai, a gəlee mukulɔ diɛ. Jesus ə hvaŋą kɛnɛ̨ kɔ́lɔ haamą ( Matie 8.23-27 ; Lukə 8.22-25 ) 35 Voló tɔ̨nɔ̨i tii mąą yələ wilii, Jesus ə mo nwɔ kalan nɛai diɛ, yɛ diɛ: «Ka gwəli ɲá pulu pələ.» 36 Di nu kpului tii lɛɛ laa di həɠə di tɛ gələn ɉu da Jesus ni. Kələn da kpɛliɠaa di kɛ gələn tii kwɛlɛ. 37 Di kɛɛ ɲá teen ɉi, diɛ ɓo ɲá ŋą hvaŋą kɛnɛ̨ ə gɔwɔ tɔɔ yɛ tɛɛ. Ya yɛ tɛ gələn ɉu, yɛ kɛ kpɔ ə naahvɛɛ. 38 Jesus ə kɛ laa ni gələn gbon ŋą yɛ yii, nwun naa ɓɔlɔ kpinįn da mɛ̨i. Nwɔ kalan nɛai di lɛɠɛ mą, di nwun; diɛ mą: «Mąąkwɛli kɛmun! Gu haa hiɛ ka oo! Yili hvo ə́ lii kulɔi yɛ?» 39 Jesus ə ɲɛ̨ilaaɓo, ə haŋą vaŋa ɓa, yɛ ɲá ɓa: «'Kɔlɔ haa yɛ́.» Vaŋa ə kpəla ma. Kɛɛ mąą ə haa kpɔ tin. 40 Yili pulu, yɛ diɛ: «Lə mɛ̨nį ɓa ka ɲɔ̨w kpɔ tii kɛnɛ̨? Akɛti, laa na laa hvo ka yəi?» 41 Di ɲɔ̨w kpɔ a mɔlɔɔ, diɛ kɛ di kee ni diɛ: «Nu ləi ɓaa a ɉulɔnu ŋɛ̨i, yaai, ya da hvanwa da nwoo hon?» |