Markə 3 - Yálá laawoo hɛɓɛ (dc)

Hulɔnu ta yii kɛ ɲee kpalaa mą

¹ Jesus ə pənə nwɔ̨nɔ̨ ə li Yálá hvɛli pɛlɛ́ ta mu, hulɔnu ta ə kɛ laa ɲee kpalaa mą.

² Nuą tii kɛ laa di ŋɛ̨i heei kɛ Jesus ɓa, diɛ kɛ diɛ: kɛ gaa pai hulɔnu tii kɔ́lɔi ponoi a vįitɔɔ yələ! Mąąhɔlɔɓo, di kɛ bɔ di mąą ɲąba lɔ.

³ Ɉulɔnu tii kɛ ɲee kpalaa ma Jesus ə mo mą, yɛ mą: «Ə muhəɠə ə́ tɔɔ ɓɛi ŋɛ̨i, nu kəlee ɲɛ̨i ɓa.»

⁴ Yili pulu, nuą tii kɛi nąą kaa, ə mo diɛ, yɛ diɛ: «Guɔ tɔ́n kaa kɛi lə? Akɛti, mąąnɛ̨ɛ̨ nu ə mɛ̨nį lɛlɛɛ kɛ a vįitɔɔ yələ, a wala kɛti mɛ̨nį ɲɔ̨n? Akɛti, mąąnɛ̨ɛ̨ nu ə nu nwun mąąɓo, a wala kɛti nu ə nu paa a vįitɔɔ yələ?» Kɛlaa, nuą di hvo kɛ bɔ di hvo nwoo pulu pənə.

⁵ Jesus ə di kaa, níí ə holi di wɔ kiliŋąhiɛ ɲɔ̨nwɔ tii kɛ di diɛ mąą mɛ̨nį ɓa. Ə nɛ̨ɛ̨mą, ə mo ɉulɔnu tii ɓa yɛ mą: «Ə yee haŋą.» Ɉulɔnui tii ə́ ɲee haŋą, ɲee ŋąą ə́ pɛli.

⁶ Farisiɛ̨ɠaa di kulɔ Yálá hvɛli pɛlɛ́ mu a mąą hulaa da Herodə nwɔ nuą, də li di di nwun dɔɔ a bələi mąąnɛ̨ɛ̨ di tɛɛ la di Jesus hon di baa.

Nu kpulu kɛnɛ̨ ə pa Jesus ɓa

⁷ Jesus da nwɔ kalan nɛai də li Galile bówa kwɛlɛ. Nu kpulu kɛnɛ̨ ə hvilɛn bulu. Daɠaa di həɠə Galile lɔi hu, daɠaa Ɉude lɔi hu,

⁸ daɠaa di həɠə Ɉerusalɛmə daai, daɠaa di həɠə Idume lɔi hu, da Ɉurdɛn yá pulu lɔi hu taa kpɛa-kpɛaɠaa hu, yɛ pələi Tirə da Sidɔn. Nu kpulu kɛnɛ̨i tii di pa Jesus pɔ, mąąhɔlɔɓo, mɛ̨nįɠaai ə kɛi gɛ di bələ mɛ̨n.

⁹ Jesus ə mo kɛa nwɔ kalan nɛai diɛ, yɛ diɛ: Ka gələn dɔ̨nɔ̨ hvólóon ŋį́ tɛ ɉu ŋą kulɔ nuą lɔwai, di hvo pa kɛ lɔ gii-giin ɉi.

¹⁰ Mąąhɔlɔɓo, aa kɛ nu tamąą kɔ́lɔi pono, nuą kpɔ ɲɔ̨n ə kɛ diɛ, di kɛ bɔ di di yee pɛlɛ mą, diɛ di kee ni pili.

¹¹ Ɓɛlɔwai ɲinɛ̨nŋąą di kɛi Jesus kaa la, di kɛi too gɔwɔ mu diɛ kɛ mą: «Ə kaa a Yálá lon.»

¹² Kɛlaa, ə kɛi mo diɛ, yɛ kɛ diɛ: Ka hvo nɛ́ nuą diɛ.

Jesus ə nwɔ kalan nɛa pow kɔ́w hveelɛ həɠə ɉu

¹³ Jesus ə tɛ ɲee ɓa, nuą yiiɠaa ə kɛ di pɔ, ə di təli, di lɛɠɛ mą.

¹⁴ Ə nu pow kɔ́w hveelɛ həɠə ɉu, ə́ di laa hee a kɛlaɠaa. Ə di həɠə ɉu, ə gɛ, di kɛ bɔ yɛ di tɔɔ kalan gɛ hiɛ ɓa.

¹⁵ Ə huwalawala tɛɛ di pɔ, ə gɛ, diɛ ɲinɛ̨nŋąą kpɛ nuą pulu.

¹⁶ Nu pow kow hveelɛ tii laa ka ŋɛ̨i: Simɔn yaai Jesus ə naa mɛ̨i hee a Piɛrə,

¹⁷ Ɉakə da nəɠə Ɉaan diɛi kɛ a Zebede non Ɉinąą, diɛ kpɛli Jesus ə di laa mɛ̨i hee a Boanɛrgɛsə (yili mukulaa ɓaa a: nuą di kaa yɛ yələgbąnąą.)

¹⁸ Andre, Filipə, Bartelemi, Matie, Tomasə, Ɉakə Alfe lon ɉulɔnu, Tade, Simɔn yii nɔi nwun mąąɓo liihɛlɛn ə kɛ mą,

¹⁹ da Ɉudasə yai kɛ a Iskariotə mun, yaai pai Jesus tɛŋɛ̨n gwɛlɛi.

Jesus yei bɛlɛ́n nuą di kɛ bɔ di dəli da diɛni də li

²⁰ Jesus ə pənə ə pa bələn, nu kpulu kɛnɛ̨ ə pənə ə ŋąąkpɔn gwɛlɛ. Jesus da nwɔ kalan nɛai di hvo kɛi kpɛli lɔwai hɔlɔɓo, ə gɛ, di di kɔ̨nɔ̨n mį́i.

²¹ Yii kɛa ɲei bɛlɛ́n nuą di mąą mɛ̨nį bələ mɛ̨n, di hvilɛn bulu, əgɛ, di ɉon də li la bɛlɛ́ laaləi. Mąąhɔlɔɓo, di kɛi kɛ diɛ: «Ɉu aa pu mą.»

Jesus ə mɛlɛkpɛɛ mąą nuą woo pulu pənə

²² Dɔ́n galamɔ̨ɔ̨ɠaa ŋɛ̨i hɛɠɛ Ɉerusalɛmə daai, di pa, di mo diɛ diɛ: «Beɛlzebulə ɓə bulu!» Ɛlɛɛ: «Ɲįnɛ̨nŋąą nwun nąmu ɓə ɉuwalawala ŋɛ̨i tɛɛi bɔ yɛ ɲinɛ̨nŋąą kpɛ la nuą pulu.»

²³ Jesus ə di təli yɛ mɛ̨nį ɓo diɛ a hanwon yɛ kɛ diɛ: «Ɓilihi a pɛli gbɔwɔ kpɛ pələ kɛi ləi?

²⁴ Lɔi lɔpee ɉu nuą da kɔ́ pɛlɛ di kpɔɔ ɓa, mąą lɔi tii, yii hva kwɛa.

²⁵ Pɛlɛi lɔpee mu nuą daa kɛi gɔ́ a di kee ni, mąą pɛlɛi a pu.

²⁶ Akɛ ɓilihi a muhəɠə gbɔwɔ laa ɓa, ə ɓɛla ɓo too nwɔ tɔɔlaai hu, nwɔ tɔɔlaai hva lamun; əlɛɛ, ɲii hvóló hu hva kwɛa.

²⁷ «Nu hva pɛli lɔi huwalawala mun ɲei bɛlɛ́n hvo ɲei hɛn gɔw həɠə, akɛ hvo ɉuwalawala mun tii yili li. Akɛ ya ɲili, ya pɛli ə ɲei bələn ɉɛnŋąą kəlee həɠə a ə wɔ.

²⁸ «A tɛ̨ą kpɔ-kpɔ gáá moi kaa, nɛ̨ŋɛ̨nŋąąi nuą da gɛ, ə mą kɛ Yálá ɓɛlɛ too mąą wooɠaai da mo, da pɛli di mąąhvaalɛɛ hɔlɔɓo;

²⁹ kɛlaa, nu a Kili-Mąąhəɠɛɛ lalan, mąą nu mąąhvaa hva lɛɛ kpɔ tɔ̨nɔ̨ kpɛli. A kɛ tii nɛ̨ŋɛ̨ ɲii kpɛɛ hvo mą, aa ɉəɠə.»

³⁰ Jesus ə mɛ̨nįɠaa tii mo tii diɛ, mąąhɔlɔɓo, di mo diɛ: ɲinɛ̨n gaa bulu.

Jesus nee da nee lonni

³¹ Jesus nee da nəɠəni di pa, di lɛɛ tɔɔ ni ɲɛnɛ̨ɛ̨ di nu ta tɔɔ yɛ lɔ bɛlɛ́n dəli.

³² Nu kpulu kɛnɛ̨ ə kɛ heeni gwɛlɛ daa mąą tinɛ̨n. Di mo mą diɛ mą: «Ə lee da ə́ ləɠəni di kaa ɲɛnɛ̨ɛ̨ diɛ ə́ kwɛli.»

³³ Jesus ə di woo pulu pənə yɛ diɛ: «Néé ɓa a gbɛɛ? Gbɛɛ ɓa nəɠə?»

³⁴ Yili pulu, nu kpului tii kɛ heeni gwɛlɛ, ə ɲɛ̨i hee di mɛ̨i, yɛ diɛ: «Néé da nəɠəni ka ŋɛ̨i.

³⁵ Nui lɔpee a Yálá liiɓa kɛi, ya ɓə gaa a néé lon ɉulɔnu da néé lon nɛ̨ɛ̨nu, a wala kɛ tii néé.»