Markə 2 - Yálá laawoo hɛɓɛ (dc)Jesus ə kpɛlɛɠɛlɛ ɲɔ̨n gɛ mun da kɔ́lɔi pono ( Matie 9.1-8 ; Lukə 5.17-26 ) 1 Hvóló tamąą tɛɛ pulu, Jesus ə pənə ə pa Kafarnaumə daai, nuą di mɛ̨n diɛ gaa bɛlɛ́n, 2 nu kpulu kɛnɛ̨ ə pa di di ŋąąkpɔn bɛlɛ́ laaləi, nu tɛɛi hvo kpɛli lɛɛ laa. Jesus ə kɛi nuą tii kalan. 3 Nu nąąn di pa a kpɛlɛɠɛlɛ ɲɔ̨n gɛ mun da Jesus pɔ naa lii hu. 4 Kɛlaa, di hvo pɛli lɔi bɛlɛ́n a ɲɔ̨n gɛ mun, nu kpulu mąą mɛ̨nį ɓa. Ya ɓə gɛ, di tɛ di bɛlɛ kɔ́n mą kulɔ, ɓɛi kpɔlɔɔ tii Jesus ə kɛ laa nąą nwun mɛ̨i, di nwɔn gɛ mun lɛɛ laani naa hɛn mɛ̨i, di ɲɛɛ Jesus lííla. 5 Yii kɛa Jesus ə di wɔ laa na laa kaa, ə mo gbɛlɛɠɛlɛ ɲɔ̨n gɛ mun tii ɓa yɛ mą: «Nón ɉulɔnu, ə́ kɛ nɛ̨ŋɛ̨ mąąhvaa aa lɛɛ.» 6 Tɔ́n galamɔ̨ɔ̨ɠaa di kɛ laa, diɛ di kiliŋąhiɛ diɛ kɛ diɛ: 7 «Lə mɛ̨nį ɓa nui ŋɛ̨i kaa hvaai ŋɛ̨i? Gaa Yálá lalan ɉi! Gbɛɛ ɓə a pɛli nɛ̨ŋɛ̨n mąąhvaalɛɛi, akɛ Yálá yaa tɔ̨nɔ̨ hvəi?» 8 Ɲąąɓa, yii kɛa Jesus ə di wɔ kiliŋąhiɛ kaa tii, ə mo diɛ yɛ diɛ: «Lə mɛ̨nį ɓa giliŋąhiɛ ɲɔ̨nwɔ̨mąn ŋɛ̨i kaa kaa? 9 Akɛti, nu ya kɛ nu ɓa: ‹Ə kɛ nɛ̨ŋɛ̨ mąąhvaa aa lɛɛ›, da ‹Ə muhəɠə ə́í laa hɛn ɉəɠə, ə́ li›; mɛ̨nį hveelɛ tii, nɛlɛ ɓə mo laa nɛ̨ɛ̨? 10 Kɛlaa, gɛ́ ka gɔlɔn kaa diɛ, mąą laa kaa Nu Lon ɲei lɔi mɛ̨i ə nɛ̨ŋɛ̨nŋąą mąąhvaalɛɛ.» Yili pulu, ə mo gbɛlɛɠɛlɛ nwɔn gɛ mun tii ɓa, yɛ mą: 11 «'Ə́ muhəɠə ə́ ə́ laa hɛn ɉəɠə, ə́ li ə́ pɔɔli!» 12 Ɲąąɓa, ɉulɔnu tii ə́ muhəɠə, ə li ɲei bɛlɛ́ laaləi. Nu kpului tii kɛ laa di kəlee di ɲɛ̨i ɓa. Di kəlee di kwəi ə́ pili diɛ, diɛ mąąwiɛ tɛɛ Yálá pɔ, diɛ kɛ mą: «Ku hvo ta mɛ̨nįi ŋɛ̨i ɲɔ̨nwɔ̨mąn da kaa li.» Levi təli mɛ̨nį ( Matie 9.9-13 ; Lukə 5.27-32 ) 13 Jesus ə bulu pənə nwɔ̨nɔ̨ yɛ li Galile bowa-ya kwɛlɛ. Nu kpulu kɛnɛ̨ ə pa bɔ yɛ di kalan. 14 Gɛɛ kɛa tɛɛi, ə Alfe lon ɉulɔnu Levi kaa heeni yɛ nįįhɔ̨nwɔ̨ hon. Jesus yɛ mą: «'Hvilɛn búlú.» Levi ə muhəɠə ə hvilɛn bulu. 15 Ɓɛlɔwai Jesus ə li la Levi kpɔ yei bɛlɛ́n, diɛ kɔ̨nɔ̨n mį́i; nįįhɔ̨nwɔ̨ kulɔ nuą da nɛ̨ŋɛ̨ gɛ nuą tamąą di kɛ bɛlɛ́n, da diɛni diɛn kɔ̨nɔ̨n mį́i, ə mą kɛ da Jesus nwɔ kalan nɛai. Nu kpulu kɛnɛ̨ ə kɛ laa. Nu kpulu kɛnɛ̨ ə kɛ laa. 16 Farisiɛ̨ɠaa di kɛ laa, daɠaa diɛ ɓo nwɔ̨nɔ̨ a tɔ́n galamɔ̨ɔ̨ɠaa. Di Jesus nwɔ kalan nɛai mąąni kɛ, diɛ diɛ: «Lə mɛ̨nį ɓa, Jesus da nįįhɔ̨nwɔ̨ kulɔ nuą, ə mą kɛ, túwɔ́ pələ ɲɔ̨n gɛ nuą di kaa kɔ̨nɔ̨n mįi gee ɓa?» 17 Jesus ə di woo mɛ̨n, ə mo diɛ yɛ diɛ: «Nuąi di kɔ́lɔi ponoɔ̨, di mąąkpaan və hali kɛmun mą. Hvo kɛli ɲɔ̨n gɛ nuą ɓə di mąąkpaan gaa hali kɛmun mą. Və́ kɛ pa li tələnmo nuą kwɛli mɛ̨nį ɓa, hvo kɛli túwɔ́ pələ nwɔn gɛ nuą.» Hín nɔ mɛ̨nį ( Matie 9.14-17 ; Lukə 5.33-39 ) 18 Hvóló ta, Ɉaan Baptistə nwɔ kalan nɛai da Farisiɛ̨ɠaa di wɔ kalan nɛai di kɛi hín nɔ. Nuą di pa diɛ Jesus ɓa: «Lə mɛ̨nį ɓa Ɉaan nwɔ kalan nɛai da Farisiɛ̨ɠaa di wɔ kalan nɛai da hín nɔ, ə́ wɔ kalan nɛai di hva hín nɔ?» 19 Jesus ə di woo pulu pənə yɛ diɛ: «Gaa ka kwəi ɓɛlɔwai nɛ̨ɛ̨gbɛla ɉilɛ a mɛlaa təli la hvulú lɔ kwəinɛ̨ɛ̨ ɓa, nąąlɔwai ɓə da kɔ̨nɔ̨n nɛɛ la laa? Kpaa! Yili hva pɛli kɛi tii; di hva pɛli hín nɔi nąąlɔwai. 20 Kɛlaa, yələ ta, nɛ̨ɛ̨gbɛla ɉilɛ a həɠə mɛlaa pɔ, nąąlɔwai ɓə di kaa pai hín nɔi la. 21 Nu hva həɠə ɓɛla nįnɛ̨ hɔlɔ həɠə pɔlɔ ɓa. Mąąhɔlɔɓo, ɉəɠə ɓɛla nįnɛ̨i tii aa kɛi kulɔ bɔlɔ ɓa, a nwolo hu kɛnɛ̨ ə tɛɛ bɔlɔ ɓa. 22 Nu hva lɔɔ nįnɛ̨ pu ɓalá pɔlɔ hu, hvo naa pulu, a kɛ tii nɔɔ a malá wolo, di hvɛɠɛ a nɔɔ da mala. Kɛlaa, nu ya lɔɔ nįnɛ̨ pu ɓalá nįnɛ̨ hu.» Jesus da hvįįtɔɔ yələ ( Matie 12.1-8 ; Lukə 6.1-5 ) 23 Yələ ta, Jesus da nwɔ kalan nɛai di kɛi tɛɛ kpai yɛa ta ɓa, a tuwɔ lɔwɔ yələ. Nwɔ kalan nɛ̨ąi diɛ gbai ta yali diɛ mį́i. 24 Farisiɛ̨ɠaa di mo Jesus ɓa, diɛ mą: «Yaa ɓɛ kaa, mɛ̨nį gu wɔ tɔ́n hvo bɔ, nu hvo gɛ a háákələi hvólói ya ka ŋɛ̨i daa gɛ.» 25 Jesus ə di woo pulu pənə yɛ diɛ: «Akɛti, mɛ̨nį ŋɛ̨i Davidə da ɲee pɔ nuą di gɛ ɓɛlɔwai pulu ə di hon na, ka hvo ta galan ni? 26 Ə lɔ Yálá hee pɛlɛ́ mu, nɛɠɛ ŋɛ̨i kɛ naakwɛlanmoɔ kɛ Yálá ɓa, ə ɉəɠə di mį́i, yɛ da ɲee pɔ nuą. Abiatarə ŋɛ̨i kɛ a haláá laa həli nwun nąmu kɛnɛ̨ nwɔ lɔwai hu. Yaan, guɔ tɔ́n yɛ haláá laa həli nuą lɔ ɓə mąąnɛ̨ɛ̨ di yili mį́i.» 27 Jesus ə mo nwɔ̨nɔ̨ diɛ, yɛ diɛ: «Hvįįtɔɔ yələ ə pɛli lɔ nu mąą mɛ̨nį ɓa, nu hvo pɛli li hvįįtɔɔ yələ mąą mɛ̨nį ɓa. 28 Yili ɓə gaa mą, Nu Lon ɓə a hvįįtɔɔ yələ nąmu.» |