Markə 16 - Yálá laawoo hɛɓɛ (dc)Jesus muhəɠə mɛ̨nį yɛ kulɔ haaɓɛlaa lɔwai ( Matie 28.1-8 ; Lukə 24.1-12 ; Ɉaan 20.1-10 ) 1 Hvįįtɔɔ yələ tɛɛ pulu, Mari Magdala mun, da Ɉakə ə lɛɛ Salome di lee Mari di wulɔ kun-nɛɛ ya diɛ li bui Jesus powa ɓa gámą hu. 2 Ɉimahi yələwala piinɛ̨ɛ̨, hvóló kɛɛ kɛa kulɔi, nɛ̨ąą tii di pa gámą la. 3 Di kɛi di kee ni mąąni kɛ bələ pɔ, diɛ kɛ mą: «Gbɛɛ ɓə lii gwɛni həɠəi gámą la gu yəi?» 4 Di lɛɠɛɛ kɛa nąą, di di ɲɛ̨i hee kɛa gámą la di nąą kaa, di gwɛni kaa giliɠilin ŋąą, Ɉəɠɛɛ gámą laaləi, yaan gwɛnii tii kɛnɛ̨i kpɔ kɛ a mɔlɔɔ. 5 Di həliɛ kɛa gámą la, di gámą hu kaa, hulɔnu da yɛ ɓo heeni gámą hu ɓa-mįi-yee hu pələ, həɠə kwəlɛɛ yɛ ɓo gwaną. Nɛ̨ąą tii di ɲɔ̨w kpɔ a mɔlɔɔ. 6 Ɉulɔnu tii ə mo diɛ, yɛ diɛ: «Ka hvo ɲɔ̨w. Jesus Nazarɛtə mun ŋɛ̨i di gbanwo kolɔwa ɓa, ya ɓə ka ka gwɛli, hvo kɛa ɓɛ, aa nwun aa kulɔ haaɓɛlaa lɔwai. Ka pa, ɓɛi ə kɛ laa, ka nąą kaa. 7 Kɛlaa, ka li ka mo Piɛrə ɓa, ə mą kɛ galan nɛa yiiɠaai tii diɛ, kaa diɛ: ‹Gaa lii ka mąąkpɔn ɉi Galile lɔi hu, nąą ɓə ka káá lii gáái laa.›» 8 Di həɠə gámą la a gilɛ, di ɲɔ̨w kpɔ di hu ə pu diɛ, di hvo pɛli ɉukulɔi nui lɔpee ta ɓa, di ɲɔ̨w pələ ɓa. Jesus ə gbɔwɔ lɛ Mari Magdala ɓa ( Matie 28.9-10 ; Ɉaan 20.11-18 ) 9 Jesus nwun ŋąą ə kulɔ haaɓɛlaa lɔwai, nɔwɔ hu voló tɔlɔɔ a ɉimahi yələ yələwala pɔ, ə kulɔ ponoŋa Mari Magdala daai mun mą; yaa ŋɛ̨i aa kɛ ɲinɛn mɛ̨ihveelɛ kpɛ bului. 10 Ə li ə nwoo hukulɔ mɛlaa diɛ, diɛi ŋɛ̨i da diɛni di kɛi Jesus haa wɔlɔ ɓoi. 11 Kɛlaa, ɓɛlɔwai di mɛ̨n na diɛ Jesus kaa a vulú, ə lɛɛ Mari yɛ kɛ diɛ, ə gaa a ɲɛ̨ikɔw, di hvo laa na. Jesus ə gbɔwɔ lɛ nwɔ kalan nɛai veelɛ ɓa ( Lukə 24.13-35 ) 12 Yili pulu, Jesus ə gbɔwɔ lɛ nwɔ kalan nɛai veelɛ ɓa a ɉuwu takpɛli, ɓɛlɔwai di kɛ la yɛa pələ ta ɓa diɛ li. 13 Di pənə di pa di ɉukulɔ di ɓɛlaa diɛ, di hvo nwɔ̨nɔ̨ laa di la. Jesus ə gbɔwɔ lɛ nwɔ kalan nɛa pow kɔ́w-tɔnɔi ɓa ( Matie 28.16-20 ; Lukə 24.36-49 ; Ɉaan 20.19-23 ; Gɛlaɠaa 1.6-8 ) 14 Ɲąą kpɛɛi, Jesus ə gbɔwɔ lɛ nwɔ kalan nɛa pow kɔ́w tɔ̨nɔ̨i ɓa ɓɛlɔwai di kɛi di kɔ̨nɔ̨n mį́i la. Ə haŋąą diɛ, mąąhɔlɔɓo, di di lii walawala di hvo laa di ɓɛlaa woo la, ɓɛlɔwai di kɛ la diɛ, Jesus aa nwun aa kulɔ haaɓɛlaa lɔwai. 15 Yili pulu, Jesus ə mo diɛ, yɛ diɛ: «Ka li yɛnɛ̨ɛ̨ nąą kəlee, ka wəlɛɛ lɛlɛɛ laa həli hį́i kəlee ɓa. 16 Nui a laa na, da mąąwaa, nwun mąą a ɓo. Nui a wala laa na, nwun na a pili. 17 Nuąi da laa nwəlɛɛ lɛlɛɛ la, kpalo mɛ̨nįɠaai di kaa pai kɛi gɛi náá hu, diɛ ka: di kaa pai kɛi ɲinɛnŋąą kpɛi nuą pulu, náá hu, diɛ hį́i woo takpɛliɠaa ɓo. 18 Di kaa pai kɛi kaaləɠaa hon ɉi a di yee, ə mą kɛ daa pili mąą hɛn da kpələ, hva hɛn da kɛ a diɛ; da di yee laa ɲɔ̨n gɛ nuą mɛ̨i, di kɔ́lɔi a pono.» Jesus ə pənə ə li Nąn bɔ ( Lukə 24.50-53 ; Gɛlaɠaa 1.9-11 ) 19 Jesus kpɛɛ kɛa a nwooɠaa tii ɓoɔ diɛ, ə muhəɠə ə tɛ yələi ə hee Yálá yee lɛlɛɛ mɛ̨i. 20 Galan nɛa di pənə di pulu, diɛ Yálá laawoo laa həli kɛɛnąą kəlee. Ną́mu ə kɛi kpɔnmąą tɛɛ di pɔ́ gólói tii kɛ mɛ̨nį hu, yɛ di wɔ kalan gɛ woo kɛ a tɛ̨ą, kpalo mɛ̨nįɠaa kɛɛ hu. |