Markə 15 - Yálá laawoo hɛɓɛ (dc)

Di li a Jesus Pilatə lííla

¹ Yələ wala piinɛ̨ɛ̨, ɉaláá laa həli nuą nwun nąmįną da Ɉuifə kalanɉonŋąą, ə mą kɛ, dɔ́n galamɔ̨ɔ̨ɠaa da tɔ́nvili nąmįną kəlee di di nwun dɔɔ. Yili pulu, di Jesus hon di ɲili, də li di dɛɛ Pilatə pɔ.

² Pilatə ə Jesus mąąni kɛ, yɛ mą: «Ɉuifəɠaa di wɔ tɔɔmun mąą a yɛ́?» Jesus ə nwoo pulu pənə, yɛ mą: «Yaa kpɔlɔɔ ka tii yáá mo, ya ɓaa a ɲą́ą́.»

³ Ɉaláá laa həli nuą nwun nąmįną di mɛ̨nį ɲɔ̨n damąą ɓo a Jesus laa.

⁴ Pilatə ə Jesus mąąni kɛ nwɔ̨nɔ̨, yɛ mą: «Mɛ̨nįɠaa ŋɛ̨i di kaa moi a ə́ laa, ə́ kaa kɛi lə?»

⁵ Jesus hvo kpɛli woo pulu pənə tɔ̨nɔ̨ kpɛli kɛ; yili ə Pilatə kwəi pili mą.

Jesus paa mɛ̨nį

⁶ Pakə hɛli həli pələ tɛitɛi kəlee, gaho nąmui kɛ nuą da di yee lɛ mą, diɛ kɛ Pilatə ɓa: Nui ŋɛ̨i kulɔ gaho ŋą́, ya ɓə kɛ Pilatə a gulɔ gaho ŋą.

⁷ Hulɔnu ta ə kɛ laa, diɛ kɛ naa ɓaa Barabasə. Ə kɛ gaho ŋą da nuą yiiɠaai kɛ di lɔɔ nɔi kili. Hvóló ta, nuą tii di di kwɛitee, di nu paa.

⁸ Nu kpului tii kəlee di lɛɠɛ Pilatə ɓa diɛ mą: «Mɛ̨nįi ya kɛ gɛi a ku wɔ hɛli həli pələ tɛitɛi kəlee hu, da kɛ nwɔnɔ̨.»

⁹ Pilatə ə di woo pulu pənə, yɛ diɛ: «Ka káá bɔ ŋą tee Ɉuifəɠaa di wɔ tɔɔmun ŋɛ̨i ɓa?»

¹⁰ Mąąhɔlɔɓo, Pilatə ə gɔlɔn gɛ yɛ haláá laa həli nuą nwun nąmįną di kaa Jesus tɛŋɛ̨n gwɛlɛi ma tolo ɲɔ̨nwɔ̨ɔ̨ mąą mɛ̨nį ɓa.

¹¹ Ɉaláá laa həli nuą nwun nąmįną di nɔ kwəi kɛ, nu kpului tii ɓa ə gɛ di mo Pilatə ɓa ə tee Barabasə ɓa.

¹² Pilatə ə pənə ə mo nu kpului tii ɓa, yɛ diɛ: «Lɛ ɓɛ ka ka bɔ ŋį́ gɛ́ a nui ŋɛ̨i ka káá kɛi mą, Ɉuifəɠaa di wɔ tɔɔmun?»

¹³ Nuą tii kəlee di pənə di tómą nwɔ̨nɔ̨ kɛnɛ̨, diɛ mą: «Gbanwo kolɔwa ɓa!»

¹⁴ Pilatə ə di mąąni kɛ yɛ diɛ: «Akɛti, mɛ̨nį ɲɔ̨n nə kɛɛ ɓə ə gɛ?» Nuą tii kəlee di tómą kpɔ nwɔ̨nɔ̨ kɛnɛ̨, diɛ mą: «Gbanwo kolɔwa ɓa!»

¹⁵ Pilatə ə kɛ bɔ ə nu kpului tii kwəinɛ̨ɛ̨, ya ɓə gɛ ə Barabasə kulɔ gaho ŋą; ə mo di Jesus kɛlɛ a kwɛli hvaɠa, yili pulu, ə dɛɛ di pɔ, diɛ li gbanwoi kolɔwa ɓa.

Holahiɠaa di yɛlɛ kulɔ Jesus hu

¹⁶ Ɉolahiɠaa di Jesus hon dɛ li la Pilatə nwɔ tɔɔ kwəli hu, gbahalanamą yəi dɔɔ pɛlɛ́ mu. Di gɔ́kulááɠaa kəlee təli laa.

¹⁷ Ɉolahiɠaa tii di gbaawii kpɔlu too Jesus kwaną, di ɲąąlən gbinįn a kalan di ɉee nwun ma.

¹⁸ Yili pulu, diɛ kwɛli hvilɛn mą, diɛ kɛ mą: «Ɉuifəɠaa di wɔ tɔɔmun, ə́ yii kpɛli!»

¹⁹ Yili pulu, diɛ gɛlɛ nwun ma a hveen gbaɠa, diɛ di laayá taɠa mą, diɛ pu di kpəlin na, diɛ kwəli hvilɛn mą.

²⁰ Yii kɛa di yɛlɛ kulɔ kpɔ tii ɉu a di liiɓa pələ, di gbaawii kpɔlui tii kulɔ gwaną, di nwɔ həɠəɠaai too gwaną, di kulɔ la gala hu, diɛ li kɛa la gbanwoi kolɔwa ɓa.

Di Jesus kpanwo kolɔwa ɓa

²¹ Simɔn yai kɛ a Sirɛnə lɔi hu mun, yai kɛ a Alɛsandrə da Rufusə di nąn, ə həɠə ɲəi ɲɛa yɛ pa, gɔ́kulááɠaa di ɉon a hɔlɔhima, diɛ mą: «Jesus laa hon nwɔ kolɔwai mu.»

²² Dɛ li a Jesus kɛɛnąą ta, diɛ kɛ nąą laa ɓa: «Gɔlgota», mukulaa ɓaa: nwun gonon ɲee ɓa.

²³ Di mirə wulɔ pu lɔɔ hu di dɛɛ Jesus pɔ; kɛlaa, hvo gɛ hvo gbələ.

²⁴ Gɔ́kulááɠaa di Jesus kpanwo kolɔwa ɓa. Di nwɔ həɠəɠaai ŋąą kpɛlɛ a kpɛɛn biliɛ.

²⁵ Ɓɛlɔwai di Jesus kpanwo la kolɔwa ɓa, ə kɛ a yələwala hvóló liɛn ŋąąnwąnąi lɔwai.

²⁶ Di hɛɓɛ́ pɛ̨ɛ̨ di bɛlɛ Jesus nwɔ kolɔwa nwun na, yii a gbanwo mɛ̨nį nwun nɛ nuą diɛ. Di bɛ̨ɛ̨ ɉu diɛ mą: «Ɉuifəɠaa di wɔ tɔɔmun.»

²⁷ Ɓɛi di Jesus kpanwo laa, di nu hveelɛ kpanwo gwɛlɛ, diɛ ɓo a toomɛ̨i kɛ nuą. Dɔ̨nɔ̨ yɛ ɓo mamįiyee hu, dɔ̨nɔ̨ yɛ ɓo gɔɓɛyee hu.

²⁸ Pələ ɓə mɛ̨nįi Yálá laawoo hɛɓɛ́ ə mo yɛ hvilɛn na Jesus ɓa, naa ə hon na. Yaai ə kɛ mą: «Di kaa pai gwɛdɛn ɉi mɛ̨nį ɲɔ̨n gɛ nuą lɔwai.»

²⁹ Nuą kɛi tɛɛ naa kwɛlɛ, da di ɲɛ̨i hee Jesus ɓa diɛ di nwun gbɛŋɛ̨n, diɛ nalan, diɛ di laa kpan ɲąli la, diɛ kɛ mą: yɛi ŋɛ̨i kɛ diɛ: «Ya Yálá hee pɛlɛ́ pu, ə́ dɔɔ hvóló haaɓa yee mu,

³⁰ ə́ kpɔ́ɔ́ nwun mąąɓo yɛ́ kpinįi, ə́ kulɔ kolɔwa ɓa.»

³¹ Ɉaláá laa həli nwun nąmįną da dɔ́n galamɔ̨ɔ̨ɠaa diɛ kpɛli di kɛi yɛlɛ kulɔ Jesus hu di kee lɔwai, diɛ kɛ mą: «Ə́ kɛi nu takpɛliɠaa ɓalo, ya ka hva pɛli gbɔwɔ ɓaloi.

³² Yaai kɛi kɛ diɛ: gaa a Nwun mąąɓomun Yálá ə naakwɛlanmo, yɛ́ ɓo a Israɛlə tɔɔmun ya ɓəi! Ə kulɔ ka ni kolɔwa ɓa ə hvilɛn ku gaa, ya ɓə a gɛ ku laa na.» Nuą tii di di kpanwo kolɔwa ɓa Jesus kwɛlɛ, diɛ kpɛli di kɛi Jesus lalan.

Jesus haa mɛ̨nį

³³ Ə kɛ a hvóló tɛɛ nwun ma lɔwai, kpinį ə pɛlɛ lɔi mɛ̨i nąą kəlee ə lɛɛ la ɉu, ə kɛ a lɛɛlɛ haaɓa.

³⁴ Nɛɛlɛ Ɉaaɓa na həliɛ kɛa, Jesus ə tómą kpɔ kɛnɛ̨ yɛ mą: «Eloi, Eloi lama sabaktani.» (Yili mukulaa ɓa: «Nwɔ́ Yálá, nwɔ́ Yálá, lə mɛ̨nį ɓa ə́ lənə mą́ą́!»)

³⁵ Nuą tii kɛ laa daɠaa di nwoo tii mɛ̨n, di mo diɛ mą: «Ka ka wəli tɔɔ tai, gaa Eli təli.»

³⁶ Nu tɔ̨nɔ̨ ə gilɛ həɠə, ə li ə yee hunwɔ kpinįn hveen gbaɠa ɓa, ə nɔ lɔɔ kpona hu, ə nɛɠɛ Jesus laa ɓa, ə gɛ, ə gbələ; nui tii lɔ ɓə nwɔ̨nɔ̨ kɛ diɛ: «Ka gu ɲɛ̨i hee tai laa, akɛ Eli kaa pai gulɔi kolɔwa ɓa.»

³⁷ Kɛlaa, Jesus ə tómą kpɔ kɛnɛ̨, yili pulu, ə haa.

³⁸ Ɉəɠə ɓɛlai ŋɛ̨i kɛ Yálá hee pɛlɛ́ mɛlaɓo ɉu hveelɛ, mɛlaa kɔ́wɔ ə tɔɔ yələi yɛ yɛɛ la nɔi ɓa.

³⁹ Ɉolahi kudiɠii ŋɛ̨i kɛ Jesus lííla, yii kɛa ə Jesus haa pələ kaa tii, ə mo yɛ diɛ: «Ɉulɔnui ŋɛ̨i ə kɛ kpɔ a Yálá lon gbɔ-kpɔ a tɛ̨ą.»

⁴⁰ Nɛ̨áá taɠaa di kɛ tɔɔ ni kwɛa la, diɛ nąą kaa. Nɛ̨ąąɠaa tii lɔwai, Mari Magdala mun da Mari ŋɛ̨i kɛ a Ɉakə logolo da Ɉose, əlɛɛ, da Salome ni di lee di kɛ di pɔ.

⁴¹ Nɛ̨ąą tii ɓə kɛ Jesus pɔ diɛ kpɔnmąą tɛɛ bɔ; da diɛni kəlee ɓə həɠə Galile lɔi hu, əlɛɛ, da nɛ̨ąą takpɛliɠaa di kɛ bɔ ɓɛlɔwai di kɛ la Ɉerusalɛmə daai, nɛ̨ą tii kəlee di kɛ laa tɔɔ ni.

Jesus powa loo mɛ̨nį

⁴² Hvitili pui lɔwai həliɛ kɛa, yɛ bələi volói tii ə kɛ la a pakə hɛli nwɔ kɛ pələ pɛli hvóló, ə kɛ a hvįįtɔɔ yələ mąą yii.

⁴³ Nąąlɔwai, Ɉosɛfə Arimate daai mun, yáá kɛ a tɔ́nvili Nąmu ta yii mąąwiɛ, ə kɛ mą, yaa kpinįi ə kɛi Yálá-taa tɔɔlaa mąą kpɔn. Ə pa laa, ə nii kpələ ə lɔ Pilatə pɔ bɛlɛ́n, ə Jesus powa mąą mɛ̨nį hu hvɛli mą.

⁴⁴ Jesus haa mɛ̨nį ɉa ə Pilatə kwəi pili mą; ə ɉolahi nwun nąmu təli, ə mąąni kɛ, yɛ mą: «Akɛti, Jesus aa ma haa?»

⁴⁵ Ɓɛlɔwai ɉolahi nwun nąmu ə kɛ la mą, Jesus aa haa, Pilatə ə Jesus powa tɛɛ Ɉosɛfə pɔ.

⁴⁶ Ɉosɛfə ə həɠə kwəlɛɛ ya, ə Jesus powa kulɔ kolɔwa ɓa ə mąą kpinįn gɛ la; gbɔwɔ kpinį kámąi kɛ aa dee kwɛni wolo hu, ə li ə Jesus laa ɉu, ə kwɛni kiliɠilin ə naa gámą laaləi

⁴⁷ Mari Magdala mun da Ɉose nee Mari di kɛ laa, di Jesus powa loo di ɲɛ̨i ɓa.