Markə 13 - Yálá laawoo hɛɓɛ (dc)

Jesus ə Yálá hee pɛlɛ́ pu mɛ̨nį ɓo

¹ Jesus kɛɛ kɛa kulɔi Yálá hee pɛlɛ́ mu, nwɔ kalan nɛai dɔ̨nɔ̨ ə lɛɠɛ mą, yɛ mą: «Mąąkwɛli kɛmun, gwɛni lɛlɛɛɠaai kaa tai, əlɛɛ, bɛlɛ́ tɔɔ pələ kaa tai?»

² Jesus ə mo mą, yɛ mą: «Ə kaa bɛlɛ kpɛa-kpɛa ŋɛ̨i tɔɔ pələ kaai, kwɛni lɔpee ta hvo pai lɛɛi mɛlan gwɛni mɛ̨i yii hva too.»

Laanɔ̨nwɔ̨ kɔ́wɔ tɔɔi

³ Jesus kɛɛ heeni Olivə yee mɛ̨i, Yálá hee pɛlɛ́ tənən ma, di tɔ̨nɔ̨ konɉu nuą kɛ gwɛlɛ diɛ ɓaa: Piɛrə, Ɉakə, Ɉaan da Andre; yiliɠaai di mąąni kɛ, diɛ mą:

⁴ «Mįnɛ̨ lɔwai ɓə mɛ̨nįɠaa ŋɛ̨i kaa pai kɛi la? Ɛlɛɛ, lə mɛ̨nįɠaa ɓə kwa gaa kuɔ diɛ mɛ̨nįɠaa tii kɛi lɔwai aa ɉəli?»

⁵ Yili ɓə gɛ Jesus ə mo diɛ, yɛ diɛ: «Ka gɛ a nɛlɛɛ, nu lɔpee ta hvo ka ɓowo.

⁶ Nu tamąą kaa pai pai ɲą́ą́ náá hu, diɛ kɛ diɛ: ‹Nwun mąąɓomun Yálá ə naakwɛlanmo, ya ɓaa a ɲą́ą́.› Di ka pai nu tamąą ɓowoi.

⁷ Ɓɛlɔwai ka káá pai kɛi kɔ́ mɛ̨i wooɠaa mɛ̨n ɉi la yii a kɛ kwɛala da yii a kɛ a nɛɠɛɛ kaa, ka hvo ɲɔ̨w. Mąąhɔlɔɓo, hvo kɛli mɛ̨nįɠaa tii da gbɛa kɛ. Kɛlaa, yili hva nii kɛ a yɛnɛ̨ɛ̨ ŋąąkpɛɛi lɔwai.

⁸ Hį́i lɔiɠaa kaa pai kɛi di muhəɠəi di kee ni laa ɓa. Tɔɔ ɓɛlaa diɛ di muhəɠə di kee ni laa ɓa. Lɔi kaa pai kɛi kpɛlin ɉi kɛɛnąą tamąą ɓa, pulu kpɛa-kpɛaɠaa diɛ too. Kɛlaa, yiliɠaai kəlee kaa lɔ pai kɛi yɛ kwəinwąną kɔ́wɔ tɔɔ.

⁹ «Kɛlaa, ka ka kpɔwɔ mɛ̨i kaa a nɛlɛɛ. Mąąhɔlɔɓo, di kaa pai kɛi lii a kaa kiti pɛlɛ́ɠaa mu; di wɔ Yálá hvɛli pɛlɛ́ɠaa mu diɛ ka kɛ́lɛ́, diɛ li a kaa nwun nąmįną da tɔɔɓɛlaa lííla ɲą́ą́ mą́ą́ mɛ̨nį ɓa. Yili kaa pai kɛi diɛ a mąą kɛlahvaa ɓoɔ.

¹⁰ Mąąhɔlɔɓo, hvo kɛli nwəlɛɛ lɛlɛɛ ŋɛ̨i laa ə həli hį́i kəlee ɓa.

¹¹ Ɓɛlɔwai di kaa pai lííla a kaa kiti tee pɛlɛ́ɠaa mu, ka hvo ka liihɛlɛn a wooi mąąnɛ̨ɛ̨ ka mo, kɛlaa, nąąlɔwai tii hu woo yii a tɛ ka la ka mo. Mąąhɔlɔɓo, nwooi tii hva həɠə kaa kpinįi ka kwəi, kɛlaa, Kili-Mąąhəɠɛɛ ɓə a dɛ ka la.

¹² Nuą kaa pai kɛi di kaayɔɠaa tɛŋɛ̨n gwɛlɛi, ə gɛ, di di paa. Lon gaa nuą diɛ kpɛli diɛ gɛ tii a di lonni. Lon yɛ muhəɠə gaa mun naa ɓa, baa mɛ̨nį ɓa.

¹³ Ka wɛli kaa pai kpɛɛi nu kəlee ɓa, ɲą́ą́ náá mąą mɛ̨nį ɓa, kɛlaa, nui a tɔɔ kpaan ə lɛɛ ɉu ŋąąkpɛɛi lɔwai, mąą nui nwun mąą a ɓo.»

Mąąwɛli mɛ̨nį kɛnɛ̨i laa Ɉerusalɛmə ɓa

¹⁴ Nwoo ŋɛ̨i Jesus kaa moi, yɛ kɛ mą: «Ɓɛlɔwai ka káá pai Kristə ɲowo kaai la yɛ Yálá hee pɛlɛ́ kɔ́hɔɓo.» (Nui gaa Jesus wooi tii kalan ɉu, hvo kɛli ə gbaɠala kaa.) Jesus ə pənə, ə mo yɛ diɛ: «Nąąlɔwai, nuąi da kɛ Ɉude lɔi hu, hvo kɛli di pu di tɛ yeeɠaa ɓa.

¹⁵ Nui a kɛ yələi pɛlɛ́ ɲiimɛ̨n mu, hvo kɛ gaa hvilɛn ɉi yɛ lɔ ɲəi bɛlɛ́n hɛn da həɠə mɛ̨nį ɓa.

¹⁶ Nui a kɛ ɲəi ɲɛa, hvo kɛ yɛ gaa pənəi ə pa ɲəi bɛlɛ́n nwɔ gbaawii həɠə mɛ̨nį ɓa.

¹⁷ Mąąwɛli mɛ̨nį kɛnɛ̨ a laa koonɛ̨ąɠaa da kɔ̨nwɔ̨leeɠaa diɛ a volói tii.

¹⁸ Ka Yálá hvɛli, ə gə, hvo pa kɛ a tulɔya lɔwai.

¹⁹ Ə həɠə yɛnɛ̨ɛ̨ pɛli hvóló ɓa ə həli la volói tii ɓa, nuą da mɔ̨nɔ̨ mį́i a nɔwai tii, yii ɲɔ̨nwɔ̨mą hvo ta kɛ li, əlɛɛ, ɲɔ̨nwɔ̨mą hvo pai kɛa kɛi.

²⁰ Akɛ Ną́mu Yálá hvo kɛ volóɠaai tii hu kpuwɔ li, nui lɔpee ta nwun mąą hvo li ɓo. Kɛlaa, Ną́mu Yálá ə volóɠaa tii hukpuwɔ nuą yiiɠaai ə di həɠə ɉu di mąą mɛ̨nį ɓa.

²¹ Akɛ nu ta a kɛ kaa: ‹Nwun mąąɓomun Yálá ə naakwɛlanmo, gaa ɓɛ yii›, a wala kɛ tii, nu takpɛli yɛ kaa: ‹Gaa ɓɛ pələ›, ka hvo laa na.

²² Mąąhɔlɔɓo, lɛɛ Kristə tamąą, da lɛɛ kɛla tamąąɠaa di kaa pai kɛi kpalo mɛ̨nįɠaa, da kwəi pili mąą mɛ̨nįɠaa kɛi, akɛ di yee a lɔ, nuąi Yálá aa di həɠɛɛ ɉu, di kili ɲąąpɛlɛ.

²³ Ka wɛi, ka ka kpɔɔ mɛ̨i kaa. Mąąhɔlɔɓo, ŋą́ą́ mɛ̨nįɠaa ŋɛ̨i lɛɛ tɔwɔ, ŋą́ą́ mo kaa.»

Nu Lon pai lɔwai

²⁴ «Kɛlaa, nąąlɔwai mɔ̨nɔ̨ kɛnɛ̨i tii tɛɛ pulu, hvóló a tɛɠi, ɲąnįn hva kɛa hvóló.

²⁵ Pɛmɛlɛn gɔwɠaa diɛ kulɔ yələi diɛ too; huwalawala yii ɲee ka yələi hɛnŋąą diɛ, mąą a kpɛlin, ɲee kɔ́nwɔ̨n ɉu ə haa.

²⁶ Nąąlɔwai, nuą da Nu Lon kaa kɛa ɉiɛ tulɔ kpiliɠilin mɛ̨i huwalawala kɛnɛ̨ da mąąwiɛ kɛnɛ̨ hu.

²⁷ Nąąlɔwai kɛa, a nwɔ malakaɠaai tɔɔ yɛnɛ̨ɛ̨ ɉonwo-ɉonwon ɉu nąąn kəlee hu, di nwɔ nu həɠɛɛ ɉuɠaa ɲąąkpɔn.»

Jesus ə bai lɔwai veelɛnąą kɔ́ɔn ɓolaa wulu ɓa

²⁸ «Ka ka kili lɛɛ ɓolaa wulu mąą mɛ̨nį hu, ɓɛlɔwai naa a kpuwun na ma yɛ kɛa tɛlin, ka gɔlɔn kaa diɛ hąmą lɔ hiɛ ka.

²⁹ Pələ lɔ ɓə gaa pai kɛi la. Ɓɛlɔwai mɛ̨nįɠaa ŋɛ̨i ŋą́ą́ mo kaa ka gaa kɛa yɛ kɛ, ka gɔlɔn kaa diɛ: Nu Lon pai lɔwai aa həli.

³⁰ Gáá tɛ̨ą ɓoi kaa, háákələi nuą ŋɛ̨i di hvo pai haai di hvo kpɛɛ, akɛ mɛ̨nįɠaa tii di hvo ni kɛ li.

³¹ Yələkɔlɔn da lɔi di kaa pai tɛɛi, kɛlaa, náá woo nwɛi hva tɛɛ.»

Yálá yaa tɔ̨nɔ̨ lɔ ɓə nąąlɔwai kɔ́lɔn

³² «Nui lɔpee ta hvo ɲələ kɔ́lɔn, ə mą kɛ nąąlɔwai; malakaɠaai di kaa yələi, ə mą kpɛli kɛ Nu Lon, hvo kɛli Ną́n Yálá yaa tɔ̨nɔ̨ gbən.

³³ Ka ka kpɔɔ mɛ̨i kaa, ka hvo yii. Mąąhɔlɔɓo, ka hvo nąąlɔwai kɔ́lɔn.

³⁴ Nąąlɔwai kɛ pələ kaa pai kɛi yɛ: Hulɔnu ta yii kɛi li hiɛ ɓa, gɛɛ kulɔi ɲəi bɛlɛ́n ə bɛlɛ́n diɓoɠaa kalihvaɓo nwɔ tínuą diɛ. Ə nu kəlee kɛ kólo tɛɛ bɔ, yɛ bɛlɛ́ laaləi mɛ̨i kaa mun mą: ‹Ə ɲɛ̨i kɛ bɛlɛ́ laaləi.›

³⁵ Yili ɓa tii, ka hvo yii. Mąąhɔlɔɓo, ka hvo bɛlɛ nąmu pai lɔwai kɔ́lɔn; kɛ a pa a yələ wulii, kɛ a pa a kwihąą, a wala kɛ tii, tɛ́ɛ́ tɔlɔɔ hvaai lɔwai, a wala kɛ tii, yələ wala pɔ.

³⁶ Ka gɛ a nɛlɛɛ, əgɛ, bɛlɛ nąmu a pənə a pa, hvo ka káá kaa yii.

³⁷ Mɛ̨nįi ŋɛ̨i gáá moi kaa, gáá moi nu kəlee ɓa, gɛ́ nu kəlee ə gbɔwɔ mɛ̨i kaa, ka hvo yii.»