Markə 12 - Yálá laawoo hɛɓɛ (dc)

Kólo kɛ nuą hɔn ɲɔ̨nwɔ̨ɔ̨

¹ Yili pulu, Jesus ə hanwon ɉɔɔ diɛ yɛ diɛ: «Hulɔnu ta ə kɛ laa, ə ɉihɛn ŋɛ̨i da kɛ mą viɲə; ə ɲɛa laa; ə mąą tinɛ̨n a hį́i, ə viɲə ya kulɔi pɛli, ə pɛlɛ́ tɔɔ ɉíí ŋą. Ə tínuą həɠə, ə di tɛɛ ɲəi viɲə yɛa, yili pulu ə li hiɛ ɓa.

² Viɲə ɓai lɔwai, ɉulɔnui tii ə nwɔ tímun dɔ̨nɔ̨ tɛɛ góló kɛ́ nuą pɔɔli, ə gɛ, yii aa hɔlɔɓo di nwɛi tɛɛ.

³ Kɛlaa, di nui tii hon, di gɛlɛ, di gbe ə pənə a ɲee hvowolo.

⁴ Ɉulɔnu tii ə pənə nwɔ̨nɔ̨ ə nwɔ tímun dɔ̨nɔ̨ tɛɛ. Góló kɛ́ nuą di yili kɛlɛ nwun ma di nalan.

⁵ Ɉulɔnu tii ə pənə nwɔ̨nɔ̨ ə dakpɛli tɛɛ. Yili nwɛi, di baa. Pələ lɔ ɓə di gɛ la a ɉulɔnui tii nwɔ tínuą tamąą; di daɠaa kɛlɛ, di daɠaa paa.

⁶ Nu tɔ̨nɔ̨ gbən lɔ ɓə kɛa lɛɛ ɉulɔnui tii yəi; ya ɓaa a non ɉulɔnu tɔ̨nɔ̨ gbən yii nwɛli ə kɛ mą. Yili ɓə kɛa ə dɛɛ a gbəli. Ə kɛi giliŋąhiɛ yɛ kɛ diɛ: ‹Gbɛli hu, di kaa lii ɲɔ̨wi mą, di mąąwiɛ, mąąhɔlɔɓo, nón ni.›

⁷ Kɛlaa, yii lɔ góló kɛ nuąi tii di gaa yɛ pa, di mo di kee lɔwai, diɛ kɛ mą: ‹Nui pai ɉulɔnui ŋɛ̨i kwɛlin ɉəɠəi, ya ka. Ka gu baa, ya ɓə a gɛ, ɉihɛn ɲɛa ə lɛɛ ka gu yəi.›

⁸ Di ɉulɔnui tii lon ɉon, di baa, di bowa pili ɉihɛn ɲɛa pulu.»

⁹ Jesus ə di mąąni kɛ, yɛ diɛ: «Akɛti, ɉihɛn ɲeai tii nąmu a pa, lə ɓə a gɛ a góló kɛ nuąi tii? A pɛli ə di paa ə ɉihɛn ɲɛa tɛɛ nu kpɛliɠaa pɔ, di kólo kɛ laa.»

¹⁰ Yili pulu, Jesus ə mo diɛ, yɛ diɛ: «Akɛti, mɛ̨nį Yálá laawoo hɛɓɛ́ ə mo, ka hvo ta mɔ̨ɔ̨ yili kalan ni? Yaai ə kɛ mą: «‹Gwɛnii bɛlɛ́ tɔɔ nuą di lənə mą ya gaa a bɛlɛ nwun ɉon gwɛni leelee.

¹¹ Ną́mu gɛ mɛ̨nį li! Gaa gu ɲɛ̨i ɓa a kwəi pili mɛ̨nį!›»

¹² Ɉaláá laa həli nwun nąmįną, da Farisiɛ̨ɠaa di kɛi Jesus hon gbaɠala kwɛli mą, mąąhɔlɔɓo, di gɔlɔn diɛ diɛ: Jesus ə ɉanwon tii hɔɔ di mąą mɛ̨nį ɓa. Kɛlaa, di kɛi ɲɔ̨w nu kpulu ɓa. Ya ɓə gɛ di nɛɛ laa, diɛ li.

Nįįhɔ̨nwɔ̨ kulɔ mɛ̨nį Sesarə ɓa

¹³ Di Farisiɛ̨ɠaa da Herodə nwɔ nuą taɠaa tɔɔ, əgɛ, di Jesus hon vaa woo hu.

¹⁴ Di pa diɛ mą: «Mąąkwɛli kɛmun, ku gɔlɔn kuɔ: ya tɛ̨ą ɓo. Hva ɲɔ̨w nuą di wɔ kiliŋąhiɛ ɓa, hva ə́ kiliŋąhiɛ nu nwɔ kɛnɛ̨ laa ɓa, yɛ́ nuą kalan a Yálá liiɓa, tɛ̨ą pələ mɛ̨i. Akɛti, gu wɔ tɔ́n a hvaa mą gu nįįhɔ̨nwɔ̨ kulɔ Sesarə ɓą, yaai gaa gu wɔ lɔi nwun na? Ku kaa bɔ, ə́ ku kilaa pono.»

¹⁵ Kɛlaa, Jesus ə gɔlɔn gɛ yɛ, tɛ̨ą kaa di kwəi, diɛ now mą. Ə mo diɛ, yɛ diɛ: «Lə mɛ̨nį ɓa ka káá bɔ ka ŋą́ą́hɛŋi? Ni kɔ́wi tii ka kɛ nįįhɔ̨nwɔ̨ kulɔi la, ka pa a da bɔ́ ŋį́ gaa.»

¹⁶ Di nwali kɔ́w tɔ̨nɔ̨ həɠə di dɛɛ bɔ. Jesus ə di mąąni kɛ, yɛ diɛ: «Gbɛɛ mąąnįnįn da gbɛɛ yee pɔɔ ɓə ŋɛ̨i nwalii kɔ́w ŋɛ̨i ɓai?» Nuą diɛ, mą: «Sesarə ɓə!»

¹⁷ Jesus yɛ diɛ: «Akɛ yili kaa tii, ka Sesarə nwɛi tɛɛ Sesarə pɔ, ka Yálá nwɛi tɛɛ Yálá pɔ.» Nwoo pulu pənə tii Jesus ə gɛ, di kwəi ə pili kɛa diɛ mąą mɛ̨nį hu.

Mąąni kɛ yii Sadusiɛ̨ɠaa di gɛ yɛ hvilɛn haaɓɛlaa muhəɠə mɛ̨nį ɓa

¹⁸ Sadusiɛ̨ taɠaa di pa Jesus pɔ. (Sadusiɛ̨ɠaa di hvo kɛ laa li haaɓɛlaa muhəɠə mɛ̨nį la.) Di Jesus mąąni kɛ, diɛ mą:

¹⁹ «Mąąkwəli kɛmun, dɔ́n Moisə ə bɛ̨ɛ̨ ə dɛɛ ku pɔ, ya ka, yɛ: ‹Akɛ nu ta a nɛ̨ą həɠə, ə nɛ̨ą lɛɛ ə haa, di hvo lon gaa li di yaa; mąąnɛ̨ɛ̨ nąn non da ə nɛ̨ɛ̨nui tii həɠə, ə lon gaa mą a nui ŋɛ̨i haa ɉuwu.›

²⁰ Yaan, nąn nonnii hinąą mɛ̨ihveelɛ di kɛ laa, dɔlɔɔ ə nɛ̨ą həɠə, hvo lon gaa mą, ə haa.

²¹ Yili nwɔ ləɠəi ə nɛ̨ɛ̨nui tii həɠə, yaa kpɛli hvo lon gaa mą, ə haa. Ɉaaɓanąą ə gə lɔ tii.

²² Nɛ̨ɛ̨nui tii ə hee nąn gaa hinąą mɛ̨ihveelɛ, kɛlaa, nwuɔ̨ da hvo lon gaa mą; gəlee di haa. Nɛ̨ɛ̨nui tii yaa kpɛli ə haa.

²³ Akɛti, haaɓɛlaa muhəɠəi lɔwai, nɛ̨ɛ̨nui tii a kɛ a ɉinąą mɛ̨ihveelɛi tii nɛlɛ nɛ̨ą? Mąąhɔlɔɓo, nu mɛ̨ihveelɛi tii gəlee daa kɛ ɉəɠə a di nɛ̨ą!»

²⁴ Jesus ə di woo pulu pənə, yɛ diɛ: «Ka káá ka kpɔɔ ɓowoi lə mɛ̨nį ɓa? Ka hvo Yálá laawoo hɛɓɛ́ kɔ́lɔn, ka hvo Yálá nwɔ huwalawala kɔ́lɔn.

²⁵ Gáá moi kaa, haaɓɛlaa muhəɠəi lɔwai, hulɔnu hva nɛ̨ɛ̨nu mɛ̨nį ɓo, nɛ̨ɛ̨nu kpɛli mąn hva hulɔnu mɛ̨nį ɓo. Kɛlaa, nu kəlee da kɛ yɛ yələkɔlɔn ɉu malakaɠaa.

²⁶ Yili ɓa, haaɓɛlaa muhəɠə mɛ̨nį, ka hvo ta galan ni li Moisə nwɔ hɛɓɛ́i hu, ɓɛlɔwai nwɔ̨n nən ə kɛ la gala nwun ɉu? Bɛ̨ɛ̨ yɛ mą, Yálá ə kɛ Moisə ɓa: ‹Gáá a Abrahamə nwɔ Yálá Isaakə nwɔ Yálá da Ɉakɔbə nwɔ Yálá.›»

²⁷ Jesus ə mo nwɔnɔ̨, yɛ diɛ: «Yálá ka a nu hvulúmąąɠaa di wɔ Yálá, hvo a haaɓɛlaa di wɔ Yálá. Yili mąą mɛ̨nį ɓa, ka káá ka kpɔɔ ɓowoi kpɔ kɛnɛ̨.»

Tɔ́n yii gɛnɛ̨ tɔ́n gəlee ɓa

²⁸ Dɔ́n galamɔ̨ɔ̨ ta ə di woo mɛ̨n diɛ ɉeai tii too, ə gaa yɛ Jesus aa Sadusiɛ̨ɠaa tii woo pulu pənə a nɛlɛɛ, ə lɛɠɛ kɛa Jesus ɓa, ə mąąni kɛ, yɛ mą: «Tɔ́n nə kee ɓə gɛnɛ̨ tɔ́n gəlee ɓa?»

²⁹ Jesus ə nwoo pulu pənə, yɛ mą: «Dɔ́n yii gɛnɛ̨ ɓa ya ka: ‹Israɛlə ə́ wɛli tɔɔ, gu Ną́mu Yálá ɓə gaa a Yálá tɔ̨nɔ̨ gbən.

³⁰ Ə nąmu Yálá wɛli la kɛ a ə́ lii kəlee, da ə́ kpinį, ə mą kɛ, ə́ wɔ kiliŋąhiɛ kəlee, da ə́ wɔ huwalawala kəlee.›

³¹ Dɔ́n tii veelɛ kee naa ɓaa: ‹Ə́ ɓɛlan nu kan nwɛli la kɛ yɛ ə́ kpinį.› Tɔ́n dakpɛli hvo laa yii gɛnɛ̨ dɛɛ dɔ́n veelɛi tii ɓa.»

³² Dɔ́n galamɔ̨ɔ̨ tii ə mo Jesus ɓa, yɛ mą: «Gaa tii mąąkwɛli kɛmun! Mɛ̨nįi tii yáá mo ga a tɛ̨ą. Ną́mu Yálá lɔ ɓə gaa a Yálá tɔ̨nɔ̨ gbən, yálá takpɛli hvo laa ə kulɔ yaa bulu.

³³ Yálá wɛli la kɛɛ a nu lii kəlee, da nu nwɔ kiliŋąhiɛ kəlee, ə mą kɛ nu nwɔ huwalawala kəlee; əlɛɛ, nu ə́ ə́ ɓɛlan gaa lon nwɛli la kɛ yɛ ə́ kpinį, yili hviɛlaɓoɔ ə tɛɛ haláá yii da gələn da haláá takpɛliɠaa kulaa ɓa.»

³⁴ Jesus ə gaa yɛ ɉulɔnu tii aa nwoo pulu pənə a kili mɛ̨nį; ə mo mą yɛ mą: «Ə mąą hvo kwɛa li Yálá-taa tɔɔlaa ɓa.» Yili pulu, nu ta hvo kɛa pɛli mąąni kɛi.

Kristə kaa a gbɛɛ lon?

³⁵ Ɓɛlɔwai Jesus ə kɛi kalan gɛ la Yálá hee pɛlɛ́ mu, ə mąąni kɛi ŋɛ̨i kɛ, yɛ diɛ: «Lə mɛ̨nį ɓa dɔ́n galamɔ̨ɔ̨ɠaa da pɛli moi diɛ kɛ diɛ: ‹Nwun mąąɓomun Yálá ə naakwɛlanmo gaa a Davidə lon?›

³⁶ Hvo gaai, Davidə kili ŋą ponoi Yálá ə mo, yɛ mą: «‹Yai-Laa ə mo nwɔ́ mɛ̨nį Ną́mu ɓa, yɛ mą: «Pa ə hee mamįiyee hu, ə lɛɛ la ɉu, ŋą ə́ yowoɠaa kəlee too ə́ kɔ́wɔ mu.»›

³⁷ «Akɛ Davidə ə kɛ non mą: ‹Nwɔ́ mɛ̨nį Námu›, Nwun mąąɓo mun Yálá ə naakwɛlanmo, a pɛli kɛi ləi a Davidə lon?» Nuą tii di kɛi Jesus woo mɛ̨i di kwəi yɛ nɛ̨ɛ̨.

Jesus ə nuą liɛwoo kɛ ɉɛɓɛ́ kɛ nuą mąą mɛ̨nį ɓa

³⁸ Nuą ŋɛ̨i Jesus ə kɛi di mąąkwɛli, ə mo diɛ, yɛ diɛ: «Ka gɛ a nɛlɛɛ tɔ́n galamɔ̨ɔ̨ɠaa mąą mɛ̨nį ɓa. Di kaa ɓo di həɠə kpɛa-kpɛaɠaa kɛ diɛ, diɛ hiɛ la; nuą daa kɛi di tuwɔɓo, diɛ di mąą yɛɛ di kɔ́wɔ mu.

³⁹ Da lɔ di wɔ Yálá hvɛli pɛlɛ́ mu, da kɛ bɔ di hee tɔwɔ pələ. Da di təli kwəinɛ̨ɛ̨ kɛɛnąą laa mį́i mɛ̨nį ɓa, da kɛ bɔ di hee tɔwɔ pələ nu kpɛa-kpɛaɠaa heei.

⁴⁰ Da kalanin nɛ̨ąą kwɛlin gulɔ di yəi, diɛ lamu Yálá hvɛliɛ hu, əgɛ, nuą di di kaa a nu haŋąąɠaa. Di kaa pai ɲɛ̨i hvala hɔlɔɓoi yii a kɛ a nwala-walaa.»

Galanin nɛ̨ɛ̨nu nwɔ kɔ́ɓo hɛn ə doo Yálá kɔ́ hɛɲąŋa hu

⁴¹ Ɓɛlɔwai Jesus ə kɛ la Yálá hee pɛlɛ́ mu, ə hee Yálá kɔ́ hɛɲąŋa kwɛlɛ, pələi nuą di kɛi Yálá kɔ́i la, yɛ nąą kaa. Hɛn gɔw nąmįną tamąą di kɛi wali kpɛa-kpɛaɠaa too laa.

⁴² Galanin nɛ̨ɛ̨nu ta ə kɛ laa, hɛn və kɛ ɲəi; ə pa ə wali hveelɛ too laa.

⁴³ Jesus ə nwɔ kalan nɛai təli ə mo diɛ, yɛ diɛ: «Gáá tɛ̨ą ɓoi kaa, galanini ŋɛ̨i aa wali kɛnɛ̨ too gbɔlɔ hu aa tɛɛ nu kəlee ɓa.

⁴⁴ Mąąhɔlɔɓo, nuąɠaa ŋɛ̨i, wali yii di mąą kpaan və mą, ya ɓə di kaa dooi gbɔlɔ hu. Kɛlaa, galanini ŋɛ̨i nwɛi, nwɔ yeehvowolo laa hu, yii gaa ɲəi aa gəlee tɛɛ. Yii kpɔ kɛ ɲəi a gɔ̨nɔ̨n ɉɔ̨nwɔ̨ gəlee ka tii aa dɛɛ.»