Markə 11 - Yálá laawoo hɛɓɛ (dc)

Jesus ə tɛ Ɉerusalɛmə daai

¹ Ɓɛlɔwai di kɛi lɛɠɛ la Ɉerusalɛmə daai, di kɛ Bɛtfaze taa, da Bɛtani taa di kwɛlɛ Olivə yee ɓa. Jesus ə nwɔ kalan nɛa veelɛ tɔɔ yɛ diɛ:

² «Daa ŋɛ̨i ka ɲɛ̨i tɔwɔ, ka li ɉu. Gɛɛ ka tɛ taai, ka káá li hoohvaalən non gaai gbulon ŋąą, yii nu ta hvo ni hee li mɛ̨i, ka volóon, ka paa la.

³ Akɛ nu ta a ka mąąni kɛ, yɛ kɛ kaa: ‹Lə mɛ̨nį ɓa ka káá volóon ɉi?›, ka kɛ mą, ‹Námu mąąkpaan gaa mą.› Gaa pai ka lɛɛi laa, ka paa la ɓɛ kpɔlɔɔ ŋɛ̨i.»

⁴ Di liɛ kɛa, di ɉoohvaalən non tii kaa, gbulon ŋąą ɲɛnɛ̨ɛ̨, pɛlɛ ta laaləi; di volóon.

⁵ Nuą tii kɛ laa, daɠaa di di mąąni kɛ, diɛ diɛ: «Ka káá ɉoohvaalən non tii hvólóon ɉu lə mɛ̨nį ɓa?»

⁶ Di di woo pulu pənə lɔ yɛ pələi Jesus ə mo la diɛ. Nuą tii di di lɛɛ laa, də li la.

⁷ Di paa kɛa a Ɉoohvaalən tii Jesus pɔ, di di wɔ həɠəɠaai kulɔ di kwaną, di bɛlɛ ɉoohvaalən non tii pulu. Jesus ə tɛ ə hee mɛ̨i.

⁸ Nu taɠaa di di mąą həɠəɠaa pɛlɛ bələi. Daɠaa di gwalalaa tee di bɛlɛ bələi.

⁹ Nuąi kɛ Jesus tɔwɔ pələ, ə mą kɛ, yiiɠaai kɛ bulu pələ, di kɛi tómą diɛ kɛ mą: «Mąąwiɛ kaa Yálá ɓa! Nui ŋɛ̨i gaa pai Ną́mu laa hu, Yálá ə lúwɔ́ too mą!

¹⁰ Tɔɔlaa yii gaa pai, lúwɔ́ kaa mą. Lúwɔ́ kaa ku nąn Davidə nwɔ tɔɔlaai ɓa. Mąąwiɛ kaa Yálá ɓa yələkɔlɔn ɉu.»

¹¹ Jesus lɔɔ kɛa Ɉerusalɛmə daai, ə li Yálá hee pɛlɛ́ mu. Yii kɛa ə nąą mąą kpɛɛ, da nwɔ kalan nɛai di tɛɛ diɛ li, Bɛtani daai. Mąąhɔlɔɓo, kpinį pɛlɛɛ kɛa kɛ.

Jesus ə ɓolaa wulu ta nɛ̨ŋɛ̨naa

¹² Mąą yələ laa ɓoɔ, di kulaa kɛa Bɛtani daai, pulu ə Jesus hon.

¹³ Ə ɓolaa wulu ta kaa kwɛa la, naa tɛlin ŋąą mą. Ə li ə ɉu kaa, akɛ a pɛli kɛ mą kaai ɉu. Kɛlaa, ɉəliɛ kɛa nwului tii ɓa, hvo mą kaa li ɉu, naa lɔ ɓə kɛ ŋą. Mąąhɔlɔɓo, mai lɔwai hvoli kɛ.

¹⁴ Jesus ə mo molaa wului tii ɓa, yɛ mą: «Nui lɔpee ta hva kɛa ə ɓa ta mį́i kpɔ tɔ̨nɔ̨ kpɛli.» Nwɔ kalan nɛai di nwoo tii mɛ̨n.

Jesus ə lɔwɔ́tɔɔ nuą kpɛ Yálá hee pɛlɛ́ mu

¹⁵ Di pənə di pa nwɔ̨nɔ̨ Ɉerusalɛmə daai, Jesus ə lɔ Yálá hee pɛlɛ́ mu; yɛ lɔwɔ́tɔɔ nuą da hɛnŋąą ya nuą kpɛ laa. Yɛ wali mąąhvalin nuą di wɔ taɓaliɠaa laa pɛlɛ, yɛ tonwələn nɔwɔtɔɔ nuą hee kpɛlinŋąą too.

¹⁶ Hvo kpɛli hvaa mą nui lɔpee ta hvo hɛn da həɠə hvo kulɔ la Yálá hee pɛlɛ́ mu.

¹⁷ Yili pulu ə di kalan yɛ diɛ: «Yálá ə mo nawoo hu, yɛ diɛ: ‹Nwɔ́ pɛlɛ́ kaa pai kɛi a yɛnɛ̨ɛ̨ nąą kəlee nuą di wɔ Yálá hvɛli pɛlɛ́.› Kɛlaa ka wɛi, kaa gɛ a nwuɔ̨ nuą hee pɛlɛ́.»

¹⁸ Yii kɛa ɉaláá laa həli nuą nwun nąmįną da dɔ́n galamɔ̨ɔ̨ɠaa di nwoo tii mɛ̨n, di kɛi gɛ pələ kwɛli mą, əgɛ, di Jesus hon di baa. Kɛlaa, di kɛi ɲɔ̨w mą. Mąąhɔlɔɓo, nwɔ kalan gɛ pələ ə nu kəlee lii hon.

¹⁹ Yələ wulii həliɛ kɛa, Jesus da nwɔ kalan nɛai di kulɔ daai.

Molaa wulu ŋɛ̨i di nɛ̨ŋɛ̨naa ə kpala

²⁰ Mąą yələ laa ɓoɔ yələwala pɔ, Jesus da nwɔ kalan nɛai di kɛɛ kɛa tɛɛi bələi, di molaa wului tii kaa aa kpala aa həli ɉamə ɓa.

²¹ Mɛ̨nįi kɛ a molaa wului tii, Piɛrə ə gili lɛɛ ɉu. Ya ɓə ə mo Jesus ɓa, yɛ mą: «Mąąkwɛli kɛmun, molaa wului wɛi ə́ nɛ̨ŋɛ̨naa gaa tai aa kpalai.»

²² Jesus ə mo nwɔ kalan nɛai diɛ, yɛ diɛ: «Gáá moi kaa, ka laa Yálá la.

²³ A tɛ̨ą kpɔ-kpɔ gáá moi kaa, akɛ ka ta a kɛ ɲee ɲɛ̨i ɓa: ‹Həɠə ɓɛ ə pili gboloyá hu›, a wala ɲinɛn-ɲinɛn, kɛlaa, naa na yɛ diɛ, mɛ̨nį tii gaa moi gaa pai kɛi tii; a kɛ kpɔlɔɔ tii ɲəi.

²⁴ Yili ɓə gaa mą, gáá moi kaa, ɓɛlɔwai ka káá hɛn da hvɛli la Yálá ɓa, ka laa na kaa diɛ, kaa ɉɔlɔɓo; mąą hɛn tii a tɛɛ ka pɔ.

²⁵ Ɓɛlɔwai ka káá Yálá hvɛli la mɛ̨nį ta hu, akɛ mɛ̨nį ta kaa ka nu ta ka lɔwai, gbɛa mąą nu mąąhvaalɛɛ. Ya ɓə a gɛ ka Nąn yii gaa yələi ə kaa kpɛli ka mąąhvaalɛɛ ka kɛ nɛ̨ŋɛ̨nŋąą diɛ.

²⁶ Kɛlaa, akɛ ka wala nu takpɛliɠaa mąąhvaalɛɛ, ka Nąn yii gaa yələkɔlɔn ɉu hva ka kɛ nɛ̨ŋɛ̨nŋąą mąąhvaalɛɛ.»

Mį ɓə Jesus nwɔ huwalawala ə həɠə laa?

²⁷ Di di pulu pənə nwɔ̨nɔ̨ də li Ɉerusalɛmə daai, Jesus kɛɛ kɛa hiɛi Yálá hee pɛlɛ́ mu, ɉaláá laa həli nuą nwun nąmįną, dɔ́n galamɔ̨ɔ̨ɠaa, da galanɉonŋąą di lɛɠɛ mą.

²⁸ Di mąąni kɛ, diɛ mą: «Mɛ̨nįɠaa ŋɛ̨i ə́ kaa gɛ́i, gbɛɛ ɓə nwɔ huwalawala tɛɛ ə́ pɔ?»

²⁹ Jesus ə di woo pulu pənə, yɛ diɛ: «Ɲą́ą́ gbɛli, gáá ka woo pulu pənəi a kɛɛ mąąlən, akɛ ka nwóó pulu pənəi, ɓɛi ŋą mɛ̨nįɠaa ŋɛ̨i nwɔ huwalawala hɔlɔɓo laa, ŋą nąą kɛ kaa.

³⁰ Akɛtii, mąąwaai ŋɛ̨i Ɉaan ə kɛi gɛi, gbɛɛ ɓə dɔɔ la? Nuą ɓə? Ɓaa Yálá ɓə? Ka nwóó pulu pənə.»

³¹ Di mo di kee lɔwai, diɛ kɛ mą: «Akɛ gwa kɛ diɛ: ‹Yálá ɓə›, gaa pai kɛi diɛ: ‹Lə mɛ̨nį ɓa ka hvo laa li Ɉaan la?›

³² Kɛlaa yaan, gwa kɛ mą: ‹Nuą ɓə›, hvo kɛli gu ɲɔ̨w nuą diɛ.» Mąąhɔlɔɓo, nu kəlee laai na diɛ Ɉaan ə kɛ a Yálá kwəi mɛ̨nį hukulɔ mun.

³³ Yili pulu, di mo kɛa Jesus ɓa, diɛ mą: «Ku hvo gɔlɔn.» Jesus yaa kpɛli, yɛ diɛ: «A kɛ tii, nui mɛ̨nįɠaa ŋɛ̨i kɛ huwalawala tɛɛ bɔ́, vá naa ɓo kaa.»