Markə 10 - Yálá laawoo hɛɓɛ (dc)Jesus nwɔ kalan yii vilɛn ŋąąi hvúlú taɠa mɛ̨nį ɓa ( Matie 19.1-12 ; Lukə 16.18 ) 1 Jesus ə həɠə kɛa laa ə li Ɉude lɔi hu. Ə pənə nwɔ̨nɔ̨ ə Ɉurdɛn yá teen ə li bulu pələ. Nu kpulu kɛnɛ̨ ə pənə ə ŋąąkpɔn gwɛlɛ, yɛ di kalan yɛ pələi ə kɛi gɛ la a bɔlɔ. 2 Farisiɛ̨ taɠaa di lɛɠɛ mą, əgɛ, di ɉon vaa woo hu. Di mąąni kɛ, diɛ mą: «Akɛti, gu wɔ tɔ́n a pɛli hvaai mą, nu ə nɛ̨ą kpɛ?» 3 Jesus ə di woo pulu pənə a kɛɛ mąąlən, yɛ diɛ: «Tɔ́n nə kɛɛ ɓə Moisə ə dɛɛ ka pɔ?» 4 Di mo mą, diɛ mą: «Moisə ə hvaa mą yɛ diɛ: ‹Nu aa kɛ nɛ̨ą kpɛ, ə hɛɓɛ́ kɛ ə dɛɛ nɛ̨ą pɔ yɛ mą: Li.›» 5 Jesus ə mo diɛ, yɛ diɛ: «Moisə ə yili ɓo tii ka wɔ kili walawala laa mąą mɛ̨nį ɓa. 6 Kɛlaa, yɛnɛ̨ɛ̨ pɛlii lɔwai, Yálá ə hulɔnu da nɛ̨ɛ̨nu di pɛli. 7 Yili ɓə gaa mą, hulɔnu a nąn da nee di lɛɛ, da nɛ̨ą di pɛlɛ di kee ɓa, 8 di nu hveelɛi di kɛ kɛa tɔ̨nɔ̨, di hvo kɛa a nu nweelɛ; kɛlaa da kɛ a nu tɔ̨nɔ̨. 9 Yili mąą mɛ̨nį ɓa, mąą hvo nɛ̨ɛ̨li yii Yálá a ɲili gee ɓa, nu hvo daɠa.» 10 Nɔɔ kɛa bɛlɛ́n, nwɔ kalan nɛai di mąąni kɛ mɛ̨nį tii hu. 11 Ə mo diɛ, yɛ diɛ: «Akɛ hulɔnu a nɛ̨ą lɛɛ, ə da kpɛli həɠə, a kɛ tii, aa kɛ nɛ̨ą tɔlɔɔ tii ɲɛ̨i ɓa a wɛli hon mun. 12 Pələ lɔ ɓə gaa la; akɛ nɛ̨ɛ̨nu yaa kpɛli a ɉilɛ lɛɛ, ə hee hulɔnu takpɛli pɔ, a kɛ tii, aa kɛ a wɛli hon mun.» Jesus ə lúwɔ́ too lɛapɛlɛɛɠaa diɛ ( Matie 19.13-15 ; Lukə 18.15-17 ) 13 Nuą di pa a lɛapɛlɛɛ Jesus pɔ, əgɛ, ə ɲee pɛlɛ diɛ. Kɛlaa, nwɔ kalan nɛ̨ąi di kɛi haŋą nuą tii diɛ. 14 Yii kɛa Jesus ə ɓɛ li kaa tii, yili ə nwąną kpɔ mą kɛnɛ̨, ə mo nwɔ kalan nɛ̨ąi diɛ, yɛ diɛ: «Ka lɛapɛlɛɛ lɛɛ laa di pa bɔ́. Ka hvo kpɛ̨ąn di tɔwɔ. Mąąhɔlɔɓo, nuąi di kɛ pələ kaa yɛ nɛapɛlɛɛ ŋɛ̨i, diɛ ɓə Yálá-taa tɔɔlaa kaa a di wɔɔ. 15 Gáá tɛ̨ą ɓoi kaa, nui a wala ɲee hee Yálá-taa tɔɔlaa mu yɛ lokolo, mąą nu hva pɛli lɔi Yálá-taa tɔɔlaa hu.» 16 Yili pulu, Jesus ə nɛapɛlɛɛ tii taɠaa hee ɲee kɔ̨nwɔ̨n ɉu, ə ɲee pɛlɛ daɠaa diɛ, ə lúwɔ́ too diɛ. Hɛn gɔw nąmu ta mąą mɛ̨nį ( Matie 19.16-30 ; Lukə 18.18-30 ) 17 Jesus kɛɛ kɛa bələ pɔ, hulɔnu ta a pa ə too gɔwɔ mu, yɛ mą: «Mąąkwəli kɛmun nɛlɛɛ, lə ɓə mąąnɛ̨ɛ̨ ŋį́ gɛ, ə gɛ, yɛnɛ̨ɛ̨i kpɛɛ hvo mą ŋį́ Ɉɔlɔɓo?» 18 Jesus yɛ mą: «Lə mɛ̨nį ɓa ə́ kaa nɛ́lɛ mɛ̨nį ɓói? Nui lɔpee ta hvo lɛlɛ li, hvo kɛ li Yálá yaa tɔ̨nɔ̨. 19 Ə́ Yálá nwɔ tɔ́n kɔ́lɔn. Yaai a kɛ mą: ‹Ho nu paa; hvo wɛli hon; hvo nwuɔ̨ kɛ; hvo kɛla hvaa ɲɔ̨nwɔ̨ɔ̨ ɓo a nu ta laa; hvo hɛn ɉəɠə nui lɔpee ta yəi a hvulu; ə́ nąn da ə́ lee di mąąwiɛ.›» 20 Ɉulɔnu tii ə nwoo pulu pənə, yɛ mą: «Mąąkwəli kɛmun, ə həɠə nókolo yələ ɓa, ə həli la yiihu ɓa, ɲéé kaa dɔ́nŋąą tii ɓa.» 21 Jesus ə ɲɛ̨i hee ɉulɔnu tii ɓa, mąąwɛli ə ɉon, yɛ mą: «Mɛ̨nį tɔ̨nɔ̨ lɔ ɓə aa lɛɛ yɛ́, yaa ɓaa: ə́ li ə́í yəi hɛnŋąą kəlee lɔwɔ́tɔɔ, ə́ nwali tɛɛ yeehvowolo nuą pɔ; ə́ pa ə́ hvilɛn gea búlú, akɛti, ya kɛ a hɛn gɔw nąmu Yálá-taa tɔɔlaa hu.» 22 Yii kɛa ɉulɔnu tii ə nwoo tii mɛ̨n, ə ɲənąą yili, ə tɛɛ yɛ li. Mąąhɔlɔɓo, hɛn gɔw kɛnɛ̨ ə kɛ ɲəi. 23 Jesus ə tinɛ̨n ə nwɔ kalan nɛai kaa gwɛlɛ, yɛ diɛ: «Hɛn gɔw nąmu lɔ laa walaai Yálá-taa tɔɔlaa hu.» 24 Nwoo tii ə galan nɛai kwəi pili diɛ. Kɛlaa, Jesus ə pənə ə mo diɛ, yɛ diɛ: «Nónni, gɛ laa walai nu ə lɔ Yálá-taa tɔɔlaa hu. 25 Ɲɔɔmɛ̨i lɔ laa nɛ̨ɛ̨i haliɛn nwolo hu, ə tɛɛ hɛn gɔw nąmu lɔi Yálá-taa tɔɔlaa hu ɓa.» 26 Yili ə galan nɛa di wɔ kwəi pili mąą ta pɛlɛ mą. Di di kee ni mąąni kɛ, diɛ kɛ diɛ: «Akɛti, gbɛɛ ɓə a pɛli ɓaloi?» 27 Jesus ə ŋɛ̨i hee diɛ, yɛ diɛ: «Mɛ̨nį nu yee hva pɛli mą, Yálá a pɛli gɛi. Yálá a pɛli mɛ̨nį kəlee kɛi.» 28 Piɛrə yɛ Jesus ɓa: «Akɛti, kuɔi ŋɛ̨i kwaa hɛn gəlee lɛɛ laa kwaa hvilɛn ə́ pului, ku wɛi kaa pai kɛi ləi?» 29 Jesus ə nwoo pulu pənə, yɛ mą: «Gáá tɛ̨ą ɓoi kaa: Nui lɔpee a nwɔ pɛlɛ́i lɛɛ laa, ə nąn nonnii lɛɛ, ə nąn da nee di lɛɛ, ə nonnii da nwɔ hihɛnŋąąi kəlee lɛɛ laa, náá, da nwəlɛɛ lɛlɛɛ mąą mɛ̨nį ɓa; 30 mąą nui tii a yili ɲɔ̨nwɔ̨mą nwun dɔ̨nɔ̨ hɔlɔɓo, ɓɛlɔwai gu kaa la ɲɛnɛ̨ɛ̨ ŋɛ̨i hu. A pɛlɛ́ɠaa hɔlɔɓo, ə nąn nonnii hɔlɔɓo, a neeni, ə mą kɛ nonnii, da nwɔ tii kɛ lɔiɠaa hɔlɔɓo bɛlɛɛ ɓɛlɛkpɛɛ mąą ɓa. Yili pulu, a yɛnɛ̨ɛ̨ kpɛɛ hvo mą hɔlɔɓo Yálá-taa tɔɔlaa hu. 31 Kɛlaa, yiiɠaai pai kɛi a dɔɔ dɔwɔɠaa, di kaa pai kɛi a pulu pələ nuą. Nɛɛ pulu nuą di kɛ a dɔɔ dɔwɔɠaa.» Jesus haa mɛ̨nį da muhəɠə mɛ̨nį ɓoɔ ɉaaɓanąą ( Matie 20.17-19 ; Lukə 18.31-34 ) 32 Jesus da nwɔ kalan nɛai di kɛɛ kɛa bələ pɔ, diɛ tɛ Ɉerusalɛmə daai, ə kɛ hvilɛn ni di tɔwɔ. Di kɛi ɲɔ̨w kpɔ kɛnɛ̨, ə mą kɛ nuą tii kɛ di pulu diɛ kpɛli di kɛi ɲɔ̨w. Jesus ə pənə nwɔ̨nɔ̨ ə nwɔ kalan nɛa puow kɔ́w hveelɛ təli, mɛ̨nįɠaai kɛi pa həli mą, ə yiliɠaai hukulɔ diɛ. 33 Ə mo diɛ, yɛ diɛ: «Ka ka wəli too, ka gu kaa tɛi Ɉerusalɛmə daai, di kaa pai Nu Lon tɛɛi ɉaláá laa həli nuą nwun nąmįną da dɔ́n galamɔ̨ɔ̨ɠaa diɛ. Di mąą ɲąba lɔ, ə gɛ di baa. Nuąi di hvo Yálá kɔ́lɔn, di kaa pai dɛɛi di pɔ. 34 Yiliɠaai di yɛlɛ kulɔ ɉu, diɛ di laayá pili mą, diɛ gɛlɛ a hvaɠa. Da baa kɛa, hvóló haaɓa tɛɛ pulu a pənə ə kulɔ haaɓɛlaa lɔwai, ə kɛ a vúlu.» Ɉakə da Ɉaan di mɛ̨nį ta huhvɛli ( Matie 20.20-28 ) 35 Yili pulu, Zebede lon hinąą hveelɛi: Ɉakə da Ɉaan, də li Jesus pɔ di mo mą, diɛ mą: «Mąąkwɛli kɛmun, mɛ̨nį ta kaa ku kwəi, kuɔ ə́ gɛ kuɔ.» 36 Jesus yɛ diɛ: «Lə ɓə ka káá bɔ ŋį́ gɛ kaa?» 37 Di nwoo pulu pənə, diɛ mą: «Ku kaa bɔ, ɓɛlɔwai ə́ kaa pai kɛi la ə́ wɔ tɔɔlaa mąąwiɛ hui, ə́ hvaa mą ku hee ə́ kwɛlɛ. Nu tɔ̨nɔ̨ ə hee ə́ ɓa-mįi-yee hu, dɔ̨nɔ̨ ə hee ə́ kɛɓɛyee hu.» 38 Jesus ə mo diɛ, yɛ diɛ: «Yii mąąnɛ̨ɛ̨ ka vɛli, ka hvo gɔlɔn. Ka pɛli ka kpələi a gbələ kɔ́wɔi gáá pai gbə́ləi la? A wala kɛ tii nąąnɔ̨nwɔ̨ mąąwaa yii pai həli mą́ą́, ka pɛli ka yee heei mu?» 39 Di nwoo pulu pənə, diɛ mą: «Kwa pɛli mą.» Jesus yɛ diɛ: «Gbələ kɔ́wɔ hu ya nwąnąą nwɛi, ka káá pai gbələi, ka káá yee hee nąąnɔ̨nwɔ̨ baptisə mu. 40 Kɛlaa, yii ɓaa a nu tɔ̨nɔ̨ hee mɛ̨nį mamįiyee hu, da gɔɓɛyee hu, ɲą́ą́ hvəə yili kaa ná. Nuąi Ną́n ə́ gɛɛnąąɠaa tii pɛli di di laa ɓa, diɛ ɓə nąą kaa a di wɔ.» 41 Galan nɛa powi tii lɛɛ, yii kɛa di yili mɛ̨n di ɓɛlaa hveelɛi tii la, di líí ə holi Ɉakə da Ɉaan di pɔ. 42 Jesus ə di kəlee di təli, ə mo diɛ, yɛ diɛ: «Ka ɲɛ̨i kaa mą, lɔi nwun nąmįną da di wɔ ɲɛ̨itɔwɔ laa nwɔ huwalawala lɛ di yee mu nuą diɛ. 43 Ka wɛi, yili mąą hvo nɛ̨ɛ̨li ka lɔwai. Yaamun, akɛ nu ta a kɛ ka lɔwai, yii gaa bɔ ə kɛ a nu kɛnɛ̨, mąąnɛ̨ɛ̨ mąą nu ə kɛ a ka kəlee ka wɔ tímun 44 Akɛ nwɔ̨nɔ̨, ka ta kaa bɔ ə kɛ a dɔɔ dɔwɔ, mąąnɛ̨ɛ̨ ə kɛ a ka kəlee ka wɔ luwɔ. 45 Mąąhɔlɔɓo, Nu Lon hvo kɛ pa li, əgɛ, nuą di tí mą. Kɛlaa, ə pa ə kɛ nuą di wɔ luwɔ, əlɛɛ, ə haa nu tamąą mąą mɛ̨nį ɓa.» Jesus ə Bartime ɲɛ̨i hvólóon ( Matie 20.29-34 ; Lukə 18.34-43 ) 46 Jesus da nwɔ kalan nɛai di həlie Ɉeriko daai, di kɛɛ kɛa kulɔi taai, nu kpulu kɛnɛ̨ ə hvilɛn di pulu. Ɲɛ̨ipumun da, yii da kɛ naa ɓa: Bartime Time lon ɉulɔnu, ə kɛ heeni bələ kwɛlɛ yɛ nuą hvɛli. 47 Ɓɛlɔwai ə mɛ̨n na, diɛ kɛ mą: Jesus Nazarɛtə mun ka tii tɛɛi, ə kɛi tómą kpɔ kɛnɛ̨, yɛ kɛ mą: «Davidə lon Jesus, gɛ́ ə́ ɲɛ̨́i mąąwɛli kaa!» 48 Nu tamąą di kɛi haŋą mą diɛ kɛ mą: «'Ə laa pilɛ!» Kɛlaa yaamun, ə pənə ə tómą kpɔ kɛnɛ̨ yɛ mą: «Davidə lon, ɲɛ̨́imąąwɛli kaa!» 49 Jesus ə tɔɔ, yɛ diɛ: «'Ka dəli ə pa.» Di mo ɲɛ̨ipumun tii ɓa diɛ mą: «Yáámun, ə́ huwalawala ə́ ə́ muhəɠə, gaa ə́ təli.» 50 Ɲɛ̨ipumun tii ə nwɔ biliɉu kulɔ mą, ə bu, ə pili yələi ə hvilɛn, ə pa Jesus pɔ. 51 Jesus yɛ, mą: «Lə ɓə ə́ kaa bɔ ŋį́ gɛ yɛ́?» Ɲɛ̨ipumun tii, yɛ mą: «Ną́mu, gáá bɔ ɲɛ̨́i ə hvólóon.» 52 Jesus yɛ mą: «'Li, ə́ wɔ laa na laa aa ə́ kɔ́lɔi pono.» Ɲąąɓa, ɲɛ̨i aa mą holóon yɛ kɛɛ kaa. Yili pulu aa mą hvilɛn Jesus pulu. |