Mąątɛ̨nɛ̨ 97 - Yálá laawoo hɛɓɛ (dc)'Ka gu kwɛli hvilɛn Yálá ɓa 'gu Naa tɛ 1 Yai-Laa kaa a tɔɔmun. Lɔi, 'pili yələi a kwəinɛ̨ɛ̨, Gboloyá hɛ̨ąi kahinŋaa kəlee, 'di kwəinɛ̨ɛ̨ kulɔ! 2 Mąątinɛ̨ŋąąi a kpinį da tulɔ kpinįn, tələnmolaa da tɛ̨ą ɓə a nwɔ tɔɔ kpəlin kɔ́wɔ hvilɛn ɉɛn. 3 Nwɔ̨n gaa hiɛi dɔwɔ, yɛ ɲowoɠaa kələn gwɛlɛ nąą kəlee. 4 Nwɔ mąnąmąnąɠaai daa yɛnɛ̨ɛ̨ mɛ̨i pɔ̨nɔ̨, lɔi ə nąą kaa, ɉu ə kpɛlin. 5 Yeeɠaa di kɛi həɠeen Yai-Laa tɔwɔ, yɛ kwɛ̨ingban, yɛnɛ̨ɛ̨ nąą kəlee ɲąąwooɓo Yálá tɔwɔ. 6 Yələ kɔ́lɔn a nwɔ tələnmolaa loloɓo, nu huwuɠaa kəlee diɛ mąąwiɛ pələ kaa. 7 «Nwumɛ̨ ə tɛ a hali kɔ́ nuą, diɛi da di nwun dɛ a kpɛli kpɛli hɛnŋaa. 'Yáláɠaa kəlee, ka kwɛli hvilɛn Yai-Laa ɓa!» 8 Yai-Laa! Ə́ wɔ kiti wooɠaai mąą mɛ̨nį ɓa, Siɔn a bələ mąn, yɛ mąą kwəinɛ̨ɛ̨ kulɔ, Ɉuda taaɠaa diɛ mąą mąną kaa. 9 Mąąhɔlɔɓo, Yai-Laa, Yɛ́ ɓə a Hɛn Gəlee mɛ̨imun, yɛnɛ̨ɛ̨ kələ nwun mɛ̨i, Ə́ yee tɛɛ kpɔ yáláɠaa kəlee diɛ. 10 Kaai Yai-Laa wɛli kaa kaa! 'Ka mɛ̨nį ɲɔ̨n nwɛli kpɛɛ kaa, a nwɔ tələnmo nuą di wɔ yɛnɛ̨ɛ̨ laa hɔn mo, yɛ di kulɔ nwąnąlɔ nuąi yəi. 11 Kɛɛ pono aa lən, a Tələnmolon nwɔɔ, ɛlɛɛ, kwəinɛ̨ɛ̨ li, kwəi kwələ nuą diɛ. 12 Tələnmo nuą, 'ka kwəinɛ̨ɛ̨ kulɔ, Yai-Laa mąą mɛ̨nį ɓa, 'ka Naa tɛ, 'kaa nwɔ mąąhəɠəlaa kili too ka ŋą. |