Mąątɛ̨nɛ̨ 96 - Yálá laawoo hɛɓɛ (dc)Yálá kaa a Tɔɔmun da kiti teemun 1 'Ka wələ ninɛ̨ too Yai-Laa ɓa! Yɛnɛ̨ɛ̨ kəlee, 'ka wələ too Yai-Laa ɓa! 2 'Ka wələ too Yai-Laa ɓa, 'ka naa mąąwiɛ! 'Ka gu nwɔ ɓalo mɛ̨nįi ŋɛ̨i noloɓo a yələ kəlee. 3 'Ka mąąwiɛ pələ hukulɔ lɔiɠaa hu, da gɛ mɛ̨nį ɲɛ̨i kɛ̨nɛ̨ɠaa, nu huwu kəlee lɔwai. 4 Mąąhɔlɔɓo, Yai-Laa kɛ̨nɛ̨i, Mąąwiɛ kaa a nwɔɔ. Ɲɛ̨i mąąɲɔwuɔi, gɛnɛ̨ yáláɠaa kəlee diɛ. 5 Nu huwuɠaa di wɔ yáláɠaa kaa lɔ a hvąŋą kpɛli kpɛli! Kɛlaa, Yai-Laa ɓə yələ kɔ́lɔn bɛli. 6 Ɲɛ̨ipono, da lɛlɛ di kaa dɔwɔ, huwalawalalaa da mąąwiɛlaa di ɓo ɲəi bɛlɛ́n. 7 Yɛnɛ̨ɛ̨ nu huwu kəlee, 'ka Yai-Laa mąąwiɛ, 'ka Yai-Laa mąąwiɛ ka nwɔ walawalalaa tɛ. 8 'Ka Yai-Laa laa mąąwiɛ, 'ka pa a gɔ́ hɛn, 'ka lɔ la ɲəi gwəlii. 9 'Ka kwɛli hvilɛn Yai-Laa ɓa! Ɓɛlɔwai nwɔ mąąhəɠəlaa a kɛ lələn ɉii la, lɔi pilɛɛ gee mɛ̨i ə kpɛlin dɔwɔ! 10 'Ka mo lɔi kəlee hu kaa diɛ: «Yai-Laa ɓə a Heeɓomun. Ə lɔi hvilɛn gbɔ gbilin, tumun və mą. Yai-Laa a nu huwuɠaa kiti tee tɛ̨ą pələ mɛ̨i.» 11 Yələ kɔ́lɔn, 'kwəinɛ̨ɛ̨ kulɔ! Lɔi, 'pili yələi a kwəinɛ̨ɛ̨, gboloyá da ɉu hɛngɔwɠaa, di hvuluun! 12 'Yɛɛkɔwɔɠaa kəlee di mąąhɛli pu, wɛla hu wuluɠaa kpɛlimąn, diɛ di tómą a kwəinɛ̨ɛ̨, 13 'ka gɛ tii Yai-Laa tɔwɔ, mąąhɔlɔɓo, gaa pai, gaa pai lɔi ɲąąwooɓoi. Gaa pai yɛnɛ̨ɛ̨ ɲąąwooɓoi a tələnmolaa, da nu huwuɠaa, yɛ bələi ɉąŋąąi la. |