Mąątɛ̨nɛ̨ 94 - Yálá laawoo hɛɓɛ (dc)Tələnmo Yálá 1 Yai-Laa! Nwąną kulɔ Yálá! 'Ə́ kpɔwɔ lɛ! Nwąną kulɔ Yálá! 2 'Ə́ muhəɠə ə́ tɔɔ! Lɔi kiti tee mun! Ɉɛn kpɔwɔ ɲąąkɛnɛ̨ nuą di gwɛlii, 'dɛɛ di pɔ! 3 Yai-Laa, nu ɲɔ̨nwɔ̨ɔ̨ɠaai ŋɛ̨i kaa kpɔ pai lɛɛi yɛnɛ̨ɛ̨, ə lɛɛ ɉu lə yələ ə ɉəli? Nu ɲɔ̨nwɔ̨ɔ̨ɠaai kaa pai lɛɛi di ɲąąnɛ̨ɛ̨ hu, ə lɛɛ ɉu lə yələ ə ɉəli? 4 Di kaa di nwun dɛi, diɛ hvaa a tɛɠɛɓoɉulaa, mɛ̨nį ɲɔ̨n gɛ nuąi tii, di kaa di pilimoi! 5 Yai-Laa, daa hee ə́ wɔ nu huwui mɛ̨i, diɛ ə́ kwɛlin ɲɛ̨i paa. 6 Di kaa kalanin da nwɛą di paai, diɛ təlilɛa nwun na pili. 7 Diɛ kɛ diɛ: «Yai-Laa hvo nąą kaai, Ɉakɔbə nwɔ Yálái kili hvo mɛ̨nį ta hu!» 8 Kaai ka hupuɔ kaa nu kəlee lɔwai! 'Ka gɛ a nɛlɛɛ, kiliŋą pɛlɛ nuą, lə yələ ɓə ka káá pai mɛ̨nį kpaɠala kaai la? 9 Yálái tii wəli kɛ nu ɓa, hva mɔ̨ɔ̨ pɛli mɛ̨nį mɛ̨n ɉii? Yai ɲɛ̨i kɔ́w pɛli, hva pɛli mɔ̨ɔ̨ kɛɛ mąą kpɛɛi? 10 Yai a lɔiɠaa hutɔɔ, hva pɛli mɔ̨ɔ̨ hutɔɔ kɛi? A Yai ti mɛ̨nį kɔ́lɔn gili tɛɛ nu pɔi! 11 Yai-Laa ə nu kwəi kiliɠaa kɔ́lɔn, gaa lɔ a hvaŋą. 12 Nwun nanɛ̨ɛ̨mun maa a, nui Yai-Laa a ɉutɔɔ, a nui Yá mąąkwɛli a ə́ wɔ tɔn ɉon bələ. 13 Yɛ́ hvįįtɔɔ tɛɛ bɔ a hvóló ɲɔ̨nwɔ̨ɔ̨ɠaa; a ɓɛlɔwai da kɛ lɔwa teei la nu ɲɔ̨nwɔ̨ɔ̨ɠaa tɔwɔi. 14 Mąąhɔlɔɓo, Yai-Laa hva gili kulɔ nwɔ nu huwui hu, hva lɛ̨ą gwɛlin ma tanɔ̨n gbɛli. 15 Di kaa nwɔ̨nɔ̨ pai kiti teei a tələnmolaa, nuąi kpɔ tələnmo kili kaa diɛ, diɛ di yíi pələ kɔ́ɔn mą. 16 Gbɛɛ ɓə pai mą́ą́ mɛ̨nį ɓoi nwea nuąi ŋɛ̨i lííla, gbɛɛ ɓə pai tɔɔi búlu, kuɔ kɔ́ pɛlɛ vulu nuąi ŋɛ̨i diɛ? 17 Yai-Laa a wala kɛ mą́ą́kpɔn mąąɓo, ɲąmuątaa ɓəli kɛ a ɉéé pɛlɛ́. 18 Ɓɛlɔwai ŋį́ kɛi kɛ la diɛ: «Dóó hiɛ ka!», nąąlɔwai ɓə ə́ wɔ wɛlikɛmąąlaa ə ɲee pu laa mú, yɛ́i a Yai-Laa. 19 Ɓɛlɔwai kpɔ liihɛlɛn a hee laa mą́ą́ kɛnɛ̨, nąąlɔwai ɓə ə́ wɔ liilaa wooɠaa da gwə́inɛ̨ɛ̨ la. 20 Yá pɛli mɔ̨ɔ̨ tɔɔi hvulu kiti tee nuą pulu, diɛi da hee mɛ̨i laa kɛ di wɔ tɔn naa hu? 21 Daa yili tələnmomun nwɔ yɛnɛ̨ɛ̨ ɓa, diɛ kiti kala kwəi kwələmun ma. 22 Kɛlaa, Yai-Laa kaa a mą́ą́kɔ̨nwɔ̨ taa; nwɔ́ Yálái kaa a gwɛnii ŋą́ nóó bulu. 23 Aa di wɔ túwɔ́ pələ ɲɔ̨nŋaa yɛɛ a di nwun, aa di hukala a di kpɔ kpɔɔ kili ɲɔ̨nwɔ̨ɔ̨i ti; Yai-Laa ku wɔ Yálái aa di hukala. |