Mąątɛ̨nɛ̨ 92 - Yálá laawoo hɛɓɛ (dc)Yálá a ɲɛ̨i kɛ nu haŋąąɠaa diɛ 1 Mąątɛ̨nɛ̨ wələ. A wələi da doo a túwɔ́ yələ. 2 Mɛ̨nį ɲąąnɛ̨ɛ̨ ɓaa a Yai-Laa laa tɛ mɛ̨nį, ɛlɛɛ, guɔi Ə́ laa toɔ a wələ ɲąąnɛ̨ɛ̨ ɓə tai, Hɛn Gəlee Mɛ̨imun Yálá! 3 Ɛlɛɛ, nu yɛ humo, yɛ ə́ wɔ wɛlikɛmąąlaa loloɓo, yɛ yíi ə́ wɔ tɛ̨ą mɛ̨nį hukulɔi, 4 diɛ doo a wələ, bɛlɛgwəi, gwɛnįn, da kɛɛ di ɓo mu. 5 Mąąhɔlɔɓo, ə́ kɛ mɛ̨nįɠaa da gwə́inɛ̨ɛ̨, Yai-Laa! Ɛlɛɛ, ŋą kɛi ə́ yee ŋą kolóɠaa kaa, ŋą pili yələi, gɛ́ tomą a kwəinɛ̨ɛ̨. 6 Ə́ kɛ mɛ̨nįɠaa kpɛa kpɛai tai, Yai-Laa! Ɛlɛɛ, ə́ kwəi kili kpon ɉukwɛa pələ, nu hva pɛli gɔlɔn ɉi. 7 Kilikpɛɛɲəimun hva gbaɠala kaa, nui gili hva mɛ̨nį hukpɛ, hva pɛli ɲąą kaa. 8 Nwąnąlɔ nuą, di wɔ yɛnɛ̨ɛ̨ ɲąą ə mą nɛ̨ɛ̨ yɛ kala tiliin, mɛ̨nį ɲɔ̨n gɛ nuą kɛ mɛ̨nį hu ə mą kɛ nɛ̨ɛ̨i, gaa lɔ a di nwun na pili mɛ̨nį, ɲali bulu hvo mą. 9 Ə́ wɛi, ə́ kaa yələi, yɛ́ lɔ ɓə a Yai-Laa, a yələ kəlee da nwɔɔ! 10 Yai-Laa! Ə́ yowoɠaa kaa li! Ə́ yowoɠaa kaa li, di nwun na pili hiɛ li; mɛ̨nį ɲɔ̨n gɛ nuą kəlee taɠa hiɛ li. 11 Yáá nwún muhəɠə yɛ láŋ mįnɛ̨ mąą, yɛ́ mą́ą́tí a wulɔ nįnɛ̨ mąą kun nɛ̨ɛ̨. 12 Nuąi kɛi mą́ą́hɛn, ŋą́ą́ di looii kaa; nwąnąlɔ nuąi diɛ di kɔ́ pɛlɛ mą́ą́, nwə́li aa di woo mɛ̨n. 13 Tələnmomun a ɓɔn yɛ tow, a kɛnɛ̨ ɲeekɔ̨nwɔ̨n ɉu yɛ ɓɛlɛ yɛ Liban kpitili. 14 Ɉinŋąąi mɔ̨ɔ̨ Yai-Laa yəi bɛlɛ́n, yɛ kɛnɛ̨ gu wɔ Yálái yəi gwəlii. 15 Ə mą kɛ bɔlɔ kɔ́lɔi ɓə, gwəi nwun ŋąąi lɔ. Ə ɓo lɔ yɛ nu nwųnų, ɉu wala walaa, 16 yɛ Yai-Laa nwɔ tələnmolaa hukulɔ, yɛ kɛ diɛ: «Mą́ą́kɔ̨nwɔ̨ kwɛni li, gbąną gbąną mɛ̨nį hvo gwəi!» |