Mąątɛ̨nɛ̨ 91 - Yálá laawoo hɛɓɛ (dc)Nui a gilitɔɔ Yálá ɓa gwəi tɔ̨nɔ̨ mɛ̨i, gaa liilaa hu 1 Ɓɛi Hɛn Gəlee Mɛ̨imun Yálá a noo laa, nui a hee laa, mąą nu a yíi Huwalawala Kəlee Nąmu hvaŋą mu. 2 Ŋą́ kɛ Yai-Laa ɓa, «Yɛ́ ɓə a mą́ą́kilɛi, mą́ą́kpɛ taa ɓaa Yɛ́, Yɛ́ ɓə a nwɔ́ Yálái, gílitɔɔi mą!» 3 Ya ɓə a ə́ kulɔ huwɔ kpɛmun nwɔ ɓaaləi ŋą, yɛ ə́ kulɔ nu paa ɲɔ̨n ɉu. 4 Goon ɉu hvoloonŋąąi ə́ mɛ̨i, yɛ́ ə́ loo laa, vaŋąn mu ɓə yá ə́ mąąkilɛ laa. Nwɔ kulɔwooɓalaa kaa a kuláá-hə́ɠə́, da nu mąąkpɛ kwɛli hɛn. 5 A kɛ nu yəi, hvá ɲɔw hɛn nɔpee ta ɓa: yɛi kɛ a kpinį nwɔ mąąɲɔw hɛnŋaa, yɛi kɛ a mɛ̨ɛ̨kɔwii da bili hvóló ɲa ɉə ɉə, 6 yɛi kɛ a lɔi wolo ɲɔ̨n a pa a kpinį, ə mą kɛ, a mɛ̨nį ɲąąnwąnąąi a kɛɛ kala a hvóló haŋąą. 7 Nu waa ə mą too ə́ kwɛlɛ ɓɛ pələ, nwaa pow ə too ə́ ɓa-mįi-yee hu pələ, ə́ wɛi, hɛn da hva tunwɔ̨n yɛ́. 8 Ə́ ɲįnąąɓo lɔ, ə́ ə́ ɲɛ̨i hee, bələi di kaa nwąnąlɔ nuą hvɛla kulɔi la, ə́ nąą kaa. 9 Gaa kpɔ tii, a tɛ̨ą, Yai-Laa! Yɛ́ kpɔ ɓə a mą́ą́kilɛi! Yá Hɛn Gəlee Mɛ̨imun gɛ a ə́ mąąkɔ̨nwɔ̨mun, 10 Mɛ̨nį ɲɔ̨n və pai həlii yɛ́, mɛ̨nį ɲąąnwąnąą ta hva lɛɠɛ ə́ wɔ yíi-pɛ́lɛ́i ɓa; 11 Mąąhɔlɔɓo, gaa pai nwɔ malakaɠaa tíi, diɛ di ɲɛ̨i kɛ yɛ́, ə́ tɛɛ pələ kəlee hu. 12 Di kaa pai ə́ heei di yee kɔ́nwɔ̨n ɉu, əgɛ, hvo pa nəi ə́ kɔ́wɔ tuwɔ kwɛni ta ɓa. 13 Ə́ kaa pai hiɛi yala da tumo di mɛ̨i, yɛ́ ɓɔlɔn yala lon da yíleen di mɛ̨i. 14 Yii kpɔ aa kanąn mą́ą́, ŋą́ gulɔ ɲəi kɛ, ŋą́ mąąkɔ̨nwɔ̨, mąąhɔlɔɓo ə gɔ́lɔn. 15 A də́li, ŋą́ nwoo mu hon, gáá pai kɛi bɔ, mɔ̨nɔ̨ hu; ŋą́ nwun mąąɓo, ŋą́ naa tɛ. 16 Ŋą́ bilɛ yɛnɛ̨ɛ̨ hu, ŋą́ malo. |