Mąątɛ̨nɛ̨ 90 - Yálá laawoo hɛɓɛ (dc)Nwələ hɛɓɛ nąąn ną Lamun yɛnɛ̨ɛ̨ hvó nu kanŋaa yəi 1 Yálá nwɔ nu Moisə nwɔ hvɛli woo. 1 Yálá nwɔ nu Moisə nwɔ hvɛli woo. Nwɔ́ mɛ̨nį Nąmu Yálá, kwɛlan-nwoo kwɛlan, Yɛ́ lɔ ɓə a ku mąąkilɛi. 2 Gɛɛ hvó yeeɠaa tɔɔ, hvó lɔi kpalan naa, da yɛnɛ̨ɛ̨ bili-pili gee mɛ̨i, wɔ́lɔ́ wɔ́lɔ́ ɓa, wɔlɔ-wɔlɔ ɓa, Yɛ́ lɔ ɓə ɓaa a Yálá. 3 Yá nu kan mąąpənə a pɔlɔ, mąąhɔlɔɓo, Yá kɛ diɛ: «Adamə lonnii, ka yali ka pulu ka too pɔlɔ hu!» 4 Gaa tii, kwɛlan nwaa tɔ̨nɔ̨ kaa ə́ ɲɛ̨i mu, yɛ wɛi, yɛ hvóló tɔ̨nɔ̨i aa tɛɛ, lɔ yɛ yíi kpinįn dɔ̨nɔ̨ kulɔi. 5 Yá di kələ, di tɛɛ lɔ yɛ hįi kaai tɔ̨nɔ̨, yai a kpɛɛ yələɓɔi lɔwai, yɛ kala tiliin a ɓɔn; 6 a powa yələwala pɔ, mąą yɛ hvalin, yələwulii pɔ, ə yohva, ə kpala. 7 A tɛ̨ą, ə́ wɔ liiholii a ku kpɛɛ, yáá ku hu pu kuɔ a ə́ wɔ liiholi kɛnɛ̨ɛ̨i. 8 Yáá ku wɔ nɛ̨ŋɛ̨nŋaai laa ə́ ɲɛ̨i mu, yáá ku wɔ loo mɛ̨nįɠaai laa ə́ ɲɛ̨ilai nwɔ kɛɛ pɔ̨nɔ̨i ɓa. 9 Ə́ wɔ lííholii aa hee ku hu; ku wɔ hvólóɠaai kaa kpɛɛi kpɔ a neelee, nu níí tooi tanɔ̨n, ku wɔ yɛnɛ̨ɛ̨ aa mąn kpɛɛ. 10 Ku wɔ lamun yɛnɛ̨ɛ̨ kaa lɔ a kwɛlan bow mɛ̨ihveelɛ, ɉu a kwɛa, kwɛlan pow mɛ̨ihaaɓa, yili kəlee, ka gɛ lɔ laanɔ̨nwɔ̨ da mɔ̨nɔ̨ di hu; hvó gaai, da tɛɛ ɉa, kwaa mąn li. 11 Gbɛɛ ɓə ə́ wɔ liiholii hvaŋą kɛnɛ̨ pələ kɔ́lɔn? Bələi lɔ nu a ɲɔw la yɛ́, bələ lɔ ɓə a ə́ wɔ liiholii kɔ́lɔn na. 12 Ku yíi hvóló hu hvo kwɛa li, yili kpaɠala lɛ kuɔ, ku kili ə pu ɉu, əgɛ, kuɔ pɛli kili hɔlɔɓoi. 13 Yai-Laa! 'Yali ə́ pulu, ə́ pa ku pɔ! Mįnɛ̨ lɔwai ɓə ə́ wɔ liiholii kaa pai kpɛlai la mą? Ə́ wɔ tínuąi ɲɛ̨imąąwɛli kaa. 14 'Ku pilɛ ə́ wɔ wɛlikɛmąąlaa hu, yələwala piinɛ̨ɛ̨, a kɛ tii, kwa túwɔ́ kwəinɛ̨ɛ̨ hu, kuɔ wələ too. 15 Bələi lɔ ku hutɔɔ hvólóɠaa tamąą la, a gwɛlanŋaai ti ku mɔ̨nɔ̨ kɔ́lɔn nai, ku kwəinɛ̨ɛ̨ hvólóɠaa tamą lɔ ti. 16 'Ə́ kɛ kolóɠaa too pono ŋą ə́ wɔ tínuąi ɲɛ̨i ɓa, ɛlɛɛ, ə́ wɔ mąąwiɛ ə hvələ di lonnii mɛ̨i! 17 Nwɔ́ mɛ̨nį Nąmu ku wɔ Yálá, ku hon a liinɛ̨ɛ̨ gwəilaa! Ku kɛ kolóɠaa dɔlɔ kɛ mą ku yəi! Nɛ̨ɛ̨ yɛ́ ną́n! Ku kɛ kolóɠaa dɔlɔ kɛ mą, yɛ pɛli lamui ku yəi. |