Mąątɛ̨nɛ̨ 9 - Yálá laawoo hɛɓɛ (dc)Yai-Laa kaa a mąąwɛlinuą da təlilɛa tɔɔbulu 1 Nwələ ɲɛ̨itɔwɔmun, Davidə nwɔ wələ woo, ə doo a bɛlɛgwəi. 2 Yai-Laa, gáá ə́ hɛɠɛɛɓoi, gwə́i tɔ̨nɔ̨ mɛ̨i, gaa pai ə́ kɛ mɛ̨nį ɲɛ̨i kɛnɛ̨ɛ̨ɠaa kəlee hu kulɔ. 3 Yáá mąną lɔ gɔ́wɔi, a kwəinɛ̨ɛ̨, gɛ́ ə́ laa tɛ wələ too, yɛ́i a yələ kɔlɔn ɉu Yálá. 4 Ɲówóɠaa daa yáli di pulu, diɛ too, di nwun na yɛ pili, ə́ ɲɛ̨i mu. 5 Mąąhɔlɔɓo, ə́ mą́ą́ mɛ̨nį ɓo, ə́ nwɔ́ tɛ̨ą ɓo, ə́ ɓo heeni, yɛ́ tɔɔkpəlin hu, Yɛ́i a giti teemun ɉaŋąŋąą. 6 Yáá hį́i lɔiɠaa hutɔɔ, yɛ́ ə́ yowo nwun na pili, yáá di laa hu pu a yələ kəlee mɛ̨nį. 7 Yowolaa kulɔmun ɉu aa kala, aa too a yələ kəlee mɛ̨nį. Ə́ taaɠaa wolo, di laa kili aa kpɛ nuą ɲą. 8 Yai-Laa nwɛi, gaa laa a yələ kəlee, aa nwɔ tɔɔ kpəlin hee kpɔ tin-tin, kiti mɛ̨nį ɓa. 9 Ya ɓə a yɛnɛ̨ɛ̨ ɲąąwooɓo a tələnmolaa, yɛ lɔiɠaa lɔwai mɛ̨nį ɓo a ɉąŋąnŋąą. 10 Nuąi di kaa di mɔ̨nɔ̨ɓoi, Yai-Laa, kɛ a di mąą kɔ̨nwɔ̨ taa, a di mąą kɔ̨nwɔ̨ taa, a mąąwɛli yələɠaa. 11 Nuąi ə́ laa kɔ́lɔn, da di kilitɔɔ yɛ́, hvó gaai, nuąi da ə́ kwɛli, Yai-Laa, hvá ə́ yee kulɔ di mu. 12 'Ka gu wələ too, Yai-Laa ɓa, yai heeni Siɔn daai, 'ka gɛ mɛ̨nį kpɛa-kpɛaa hu kulɔ, lɔiɠaa diɛ. 13 Ɲąmą kwələ kulɔmun ni, giliɲąlaa, hva lɛ̨ą mąąwɛlimun domą woo ɓa. 14 'Mą́ą́wɛli kaa, Yai-Laa! Nwɔ́ mɔ̨nɔ̨i kaa! Yai ɲówóɠaa daa naa mą́ą́! Yɛ́i ya gúlɔ haa wolo la. 15 Gɛ́ pɛli kɛi lɔ ə́ mąątɛ̨nɛ̨ wələ tooi, Siɔn, gwəli-hɛ̨ąiɠaa, gɛ́ pili yələi máloi yá mo, mąą mɛ̨nį ɓa. 16 Hį́i takpɛliɠaa di wɔ lɔwai di dee, diɛ kpinįi, daa too ɉu, maaləi di dɛ, di kɔ́wɔ ɓə kɔ́ la. 17 Yai-Laa aa gbɔwɔ lɛ, aa gití hu woo ɓo, nui hva kulɔ nwoo ɓa, gbɔwɔ kpįnįi hɛlɛn lɔ ɓə, yá ɉon na. 18 Nuąi da di woo kala, di pənə tai, di li ɲąmuątaa, a nu huwuɠaai kpɔ tii da lɛ̨ą Yálá ɓai. 19 Yeehvolomun nwɛi, di hvo pai lɛ̨ąi mą, a yələ kəlee mɛ̨nį, mąąwɛlimun va gilitɔɔ lɔ mą kpɛli kpɛli. 20 Yai-Laa, 'ə́ muhəɠə, 'ə́ tɔɔ! Nu kan 'və nwun dɛ! Lɔiɠaa kiti tee tai, ə́ líila! 21 Yai-Laa, ɲɔw pili di hu, nuąi da kwɛli hvilɛn hali ɓa, di kili ə pu ɉu diɛ kɛ haa hɛnŋaa ɓaa a diɛ. |