Mąątɛ̨nɛ̨ 89 - Yálá laawoo hɛɓɛ (dc)Yálái a kulɔ nwoo ɓa vɛli woo 1 Ɛzra mun Etan nwɔ nu mąąkwɛli woo. 2 Gáá kɛi lɔ Yai-Laa nwɔ mɛ̨inɛ̨ɛ̨ɠaa tooi a wələ a yələ kəlee, gɛ ə́ wɔ tɛ̨ą mɛ̨nį hukulɔ a kwɛlan gəlee. 3 A tɛ̨ą, gáá kpɔ moi, gɛ́ diɛ: «Ə́ wɔ mɛ́ni lɛlɛ pələ hvilɛn ŋąąi kpɔ tin tin, yá ə́ wɔ tɛ̨ą mɛ̨nį hee yələkɔlɔn ɉu a yələ kəlee.» 4 Kwá nííɓamun kwaa mįnɛ̨ həɠə, gaa ku lɔwai, ŋą́ą́ gwɛ́la nwɔ́ tímun Davidə ɓa, gɛ́ mą: 5 Gáá ə́ huwula heei a yələ kəlee mɛ̨nį, ŋą́ dɔɔhvili kɛ a ə́ wɔɔ a kwɛlan gəlee mɛ̨nį. 6 Yai-Laa, yələkɔlɔn ə Ə́ hɛɠɛɛɓo, mɛ̨nį ɲɛ̨i kɛnɛ̨ɛ̨i tii mąą mɛ̨nį ɓa; nu mąąhəɠɛɛɠaa di wɔ ɲąąkpɔn ɉu, di ə́ wɔ tɛ̨ą mɛ̨nį hukulɔ. 7 Gbɛɛ ɓə yələkɔlɔn ɉu da Yai-Laa di pɛliɛ-o? Yáláɠaa lɔwai, nɛlɛ ɓə gaa yɛ Yai-Laa? 8 Nu mąąhəɠɛɛɠaa di wɔ ɲąąkpɔn hu, da ɲɔw Yálá ɓa diɛ nwumɛ̨ mą, ɲɛ̨i mąą ɲɔwuɔi dɛɛ hɛn kpɔ gwɛlɛ gəlee diɛ. 9 Yai-Laa Mɛ̨nį Kəlee ŋą Hééɓomun Yálá! Gbɛɛ ɓə nwalaa yɛ yɛ́-o, Yai-Laa! Tələnmo mɛ̨nį lɔ ɓə ə́ mąątínɛ̨n ŋąą la nąą kəlee. 10 Yɛ́ ɓə ya gboloyá nwɔ kpɔwɔ ɲąąkɛnɛ̨ kpəla bələi, ɲáɠilin a muhəɠə a tɔɔ, Yɛ́ ɓə ya gɔlɔ haa mą. 11 Yɛ́ ɓə Rahavə powa kiin, yɛ́ ə́ yowoɠaa hutaɠa a ə́ yee kɔ́nwɔ̨n ɉuwala-walaa. 12 Ə́ pɔɔ ɓaa a Yələkɔlɔn! Ə́ pɔɔ ɓaa a lɔi! Yɛnɛ̨ɛ̨ bili-pili gee mɛ̨i da ɉu hɛn gɔwɠaa, yɛ́ ɓə di pɛli. 13 Ɲələi pələ mąn, ɉɛɠɛɛ pələ mąn, yɛ́ ɓə gəlee pɛli, Tabɔrə yee da Hɛrmɔn yee, da ə́ laa mɛ̨n, da tóma a kwəinɛ̨ɛ̨. 14 Yee wala-walalaa, yee kɔ̨nwɔ̨n vąŋą kɛnɛ̨ɛ̨, ɓa-mįi-yee kɔ̨nwɔ̨n, Yɛ́ ɓə ə́ wɔɔ ɓaa diɛ. 15 Ə́ wɔ tɔɔkpəlin hvilɛn ŋąą tələnmolaa da tɛ̨ą di mɛ̨i; wɛlikɛmąąlaa da tɛ̨ą mɛ̨nį diɛ hiɛ ə́ ɲɛ̨i ɓa. 16 Nwun na nɛ̨ɛ̨mun maa, nu huwui a ə́ mąątɛ̨nɛ̨. Di kaa pai kɛi hiɛi ə́ ɲɛ̨ilai nwɔ kɛɛ pɔ̨nɔ̨ hu, Yai-Laa. 17 A tɛ̨ą, di kaa pai kɛi túwɔ́i mąną kaai ə́ laa hu, di ɲɛ̨i yɛ pɔ̨nɔ̨, ə́ haŋą pələ ɓa. 18 A tɛ̨ą, yɛ́ ɓə a di wɔ huwalawalalaai hɛn da hva tɔɔ na. Yɛ́ ku ɲɛ̨i pono a ə́ yəi mɛ̨inɛ̨ɛ̨ɠaa. 19 Ku mąąkpɛ gbala kaa ə́ yee, Yai-Laa! Ku wɔ tɔɔmun ə ɓo, Israɛlə nwɔ Mąąhəɠə mun yee kɔ́nma. 20 Ə́i kpɔwɔ lɛ a yələ ta, ə́ pələ ɓo ə́ liiɓa nuą diɛ, yɛ diɛ: Ŋą́ą́ kpɔnmąą tɛɛ kulaa ta pɔ, ŋą́ą́ nwɔ́ lɔi hu laŋąlon da hvaŋą tɛ. 21 Ŋą́ą́ Davidə kɛ a nwɔ́ tímun, ŋą́ą́ gɛ a nwɔ́ɔ́, ŋą́ą́ nwɔ́ tɔɔwulɔ mąąhəɠɛɛi lɔ mą. 22 Ɲéé kaa pai kɛi gwɛlɛ, ɲéé walawalaai tii, yɛ gɔ́ a hvaŋą. 23 Ɲowo hvo pai pɛlii woloi mą dɛɠii, Kwɛli tee mun hva pɛli nwumɛ̨ tɛi la. 24 Mąąhɔlɔɓo, gáá pai ɲowoɠaa hu taɠai dɔwɔ, nuąi da wɛlikpɛɛmąąlaa kulɔ la, gɛ́ di kɛlɛ. 25 Nwɔ́ tɛ̨ą mɛ̨nį da nwɔ́ kulɔ nwooɓalaa da kɛ gwɛlɛ, yɛ nwun muhəɠə náá hu. 26 Gáá pai gboloyá laai ɲee mu, nwɔ heeɓolaa yɛ hee yáleeɠaa mɛ̨i. 27 Yaa tii, gaa pai kɛi mą́ą́: «Ną́n! Nwɔ́ Yálá! Málo kwɛni!» 28 Ɲą́ą́n gáá pai gɛi a non nupɔlɔ laamun; a yɛnɛ̨ɛ̨ heeɓoɠaa kəlee di wɔ Heeɓomun Gɛnɛ̨ yɛnɛ̨ɛ̨ nąą kəlee. 29 Nwóói ŋį́ gwɛlɛ mą, ŋą́ bɔ mɛ̨nį kɛ a yələ kəlee, nwɔ́ mɛ̨inɛ̨ɛ̨ ə ɓo mɛ̨i a yələ kəlee. 30 Nwɔ heeɓolaai ɲɛ̨n və pai kɛi mą, nwɔ tɔɔkpəlin yɛ lamun yɛ yələkɔlɔn. 31 Nonnii da kulɔ nwɔ́ tɔ́n nwooi mu, da wala hvilɛn nwɔ́ tɛ̨ą pələi mɛ̨i; 32 da nwɔ́ tɔ́n nwooɠaai kala, da wala bɔ liɛwooɠaa hon, 33 ŋą di wɔ kulɔ nwoo mu laai hutɔɔ a hvaɠa, ŋį́ di wɔ mɛ̨nį ɲɔ̨n kulɔ di hu a kɛlɛɓo, 34 Kɛlaa, vá nwóó kala mą; vá nwɔ́ mįnɛ̨i mąą kala. 35 Və́ pai nwɔ́ mįnɛ̨i həɠəi mą, mɛ̨nįi kulɔ ná, vá yili mąąhvalin. 36 Ŋą́ą́ gwɛla mą a yələ kəlee mɛ̨nį, a nwɔ́ mąąhəɠəlaa; vá Davidə ɓowo kpɔ tanɔ̨n kpɛli. 37 Ɉuwu kaa pai lamui gbɛlai hva kɛ mą, nwɔ tɔɔkpəlin kaa pai kɛi nííla yɛ hvóló, 38 gɛ pələ kaa pai kɛi yɛ ɲąnin, ə ɓo a nwɔ́ tələnmo kɛla yələkwəi. 39 Kɛlaa, ə́ wɔ nui ə́ ɉəɠə ɉu, yɛ́ ɓə ə́ pulu tɔɔ mą, ə́ mɛlɛkpɛɛ mą, yɛ́ ə́ liiholi bɔ, 40 Mįnɛ̨i ká ə́ wɔ tímun ka ɉəɠə, yáá lənə mą; yáá nwɔ tɔɔ ɓɔlɔi too lɔi ɓa, yaa mɛlɛkpɛɛ mą. 41 Yáá nwɔ galai nwolo tee mą nąą kəlee, yáá mąąkɔ̨nwɔ̨ hį́iɠaa kəlee pu, 42 Tɛɛ pələi nuą kəlee diɛ too mɛ̨i, gwɛlɛ nuą diɛ di laa pu ɉu. 43 Yáá ɲowoɠaa hvaŋą tɛ, nuąi da kɛ kɔ́ pɛlɛi mą, yáá di kwəinɛ̨ɛ̨; 44 yáá nwɔ kɔ-kɔ ɓɔwai ɲąą haa, hvó kpɔnmąą tɛɛ li bɔ gɔ́ hu. 45 Yáá nwɔ mąąwiɛ ɲɛ̨i paa, yáá nwɔ tɔɔkpəlin naapɛlɛ. 46 Yáá nwɔ laŋąlaa kulɔ hvólóɠaai hukpuɔ, yáá nwumɛ̨ tɛ la kpɔ kɛnɛ̨. 47 Yai-Laa, ə́ kaa pai lɛɛi ə́ loo pələi ə lɛɛ ɉu mįnɛ̨ lɔwai? Ə́ lii kaa pai lɛɛi a ɉoliɛ ku pɔ, ə lɛɛ ɉu mįnɛ̨ lɔwai? 48 Bələi nwɔ́ yɛnɛ̨ɛ̨ hu kpuaa la, gbaɠala kaa yɛ́, ɲɛnɛ̨ɛ̨ hviikpɛɛ tii mąą mɛ̨nį kpɔlɔ ɓə ə nu kan bɛli la. 49 Gbɛɛ ɓə a pɛli yɛnɛ̨ɛ̨ kɛi, hva haa, gbɛɛ a pɛli gbɔwɔ kulɔi ɲąmuą taa yeei? 50 Nwɔ́ mɛ̨nį Nąmu, ə́ wɔ wɛlikɛmąąlaa pɔlɔɠaai kaa mį? Ə́ ə́ kwɛla Davidə ɓa, a ə́ tələnmolaa! 51 Nwɔ́ mɛ̨nį Nąmu, ə́ wɔ tí nuąi di wɔ laanɔ̨nwɔ̨ hu, ə́ kili lɛɛ di hu, ə pɛlɛ la nu kpului ŋɛ̨i kəlee di mąą mɛ̨nį hɛlɛn ŋąą mą́ą́i, diɛ. 52 Yai-Laa, ə́ yowoɠaa daa mɔ̨nɔ̨ lɔ bɔ, nui ə́ ɉəɠə ɉu, a kɛi tɛɛ, diɛ di laayá pili gɔwɔ pɔɔ hu. 53 Mąąwiɛ ə kɛ Yai-Laa ɓa a yələ kəlee da nwɔɔ! Kɛi a mo tii Yálá ə kɛ! A Mįįną! A Mįįną! |