Mąątɛ̨nɛ̨ 88 - Yálá laawoo hɛɓɛ (dc)Mąąwɛlimun nwɔ wələ 1 Wələ, mąątɛ̨nɛ̨ wələ, hvɛ́li woo; Kore lonnii. Nwələ ɲɛ̨itɔwɔmun. Ɓɛlɔwai Ɛzra mun Heman ə kɛ la ɲɔ̨n ɉaɠa ɓa, nwɔ nu mąąkwɛli woo. 2 Yai-Laa! Yɛ́i a malo Yálá! Hvóló da kpinį, ŋą tómą ə́ pɔ pələ. 3 Ə́ hvɛlii gáá moi, nwóó ə həli Yɛ́, 'ə́ wəli tɔɔ kpɔ a nɛlɛɛ, ə́ nwóólaa woo mɛ̨n. 4 Mąąhɔlɔɓo, mɔ̨nɔ̨ aa hee ɉú ɲɛnɛ̨ɛ̨ ŋɛ̨i hu, gɛ́ tiliin haa wolo la. 5 Daa dóó nu lɛɠɛɠaa pɔ, gáá yɛ nui nwɔ yɛnɛ̨ɛ̨ aa kpɛɛ, ɉuluun ŋąą ɲąmuątaa mɛ̨i. 6 Kwa haa nuą ku tɔɔi kaa tanɔ̨n, nuąi daa haa, di ɓo laanin kámą hu, kwa diɛni ɓə, a diɛi tii, di kili hvo mą kɛa ə́ ɲái, hvó gaai, di mąą aa kwɛa Yɛ́. 7 Yáá náá ɲąmuątaa kpon ɉeei, gáá kpinį hu, ŋį́ ɓo ɓoloonŋąą hu. 8 Ə́ wɔ líiholii aa wiɛ mɛ̨́i, Ə́ wɔ yáhvuluun kaa kɛlɛi ɉú a vaŋą kɛnɛ̨ɛ̨. 9 Yáá nwɛ́likɛmąą nuą mąą kwɛa mą́ą́, Yáá gɛ́ a mąąɲɔw hɛn di ɲɛ̨i ɓa, pələ hvo ɲə́i, gúlɔ wolo hvo mą. 10 Ɲɛ̨́i lon ɉu aa haa a mɔ̨nɔ̨, Yai-Laa! Yələ kəlee, ŋą́ kɛi ə́ təli, ŋą́ą́ ɲə́ə́ laa kwələ hee ə́ pɔ pələ. 11 Akɛtii, Yá pɛli kwɛlɛɛn mɛ̨nį ta kɛi haa nuą mąą mɛ̨nį hu? Haa nuą da mɔ̨ɔ̨ pɛli nwun ɉii, diɛ ə́ Laa mąąwiyɛ? 12 Nu a kɛ gámą hu, a mɔ̨ɔ̨ pɛli ə́ wɔ wɛlikɛmąąlaa hu kulɔi? Nu a kɛ ɲąmuątaa, a mɔ̨ɔ̨ ə́ wɔ tɛ̨ą mąą mɛ̨nį ta ɓo? 13 Ə́ wɔ kpalu mɛ̨nį a pɛli mɔ̨ɔ̨ kɔ́lɔn ɉi kpinį hu? Ə́ wɔ tələnmolaa a pɛli mɔ̨ɔ̨ kɔ́lɔn ɉi lɛ̨ąmąą taa? 14 Kɛlaa nwɛ́i, Yai-Laa! Ə́ pɔ pələ ɓə ŋą́ ɲéé laakwələ hee la, ŋą́ gbɛa lamun ə́ hvɛlii, yələ yɛ teɠa ɓɔ. 15 Yai-Laa, yá lənə mą́ą́ lə mɛ̨nį ɓa? Yɛ́ ə́ ɲɛ̨i lɛlɛɛ loo mą́ą́ lə mɛ̨nį ɓa? 16 Ə həɠə nókolo yələ ɓa, mą́ą́wɛliɛi, gɛ́ ɓo a mɔ̨nɔ̨ laalowó, Yáá ɉú kpɛlin, gáá lɔ tii tupɛɛ. 17 Ə́ wɔ liiholiɠaai daa kɛlɛ ɉú, mą́ą́ ɲɔw pələ ə́ yəi, ŋą́ą́ lɛɛ kpɔ kpɛli kpɛli. 18 Yələ kəlee, mą́ą́ tinɛ̨n ŋąąi lɔ a mąąɲɔw hɛnŋaa, di kaa yɛ yáhvɛɛ, daa mą́ą́ tinɛ̨n, daa doo gee hu. 19 Yáá ɉíɛ-gee-puluɠaa, da nwɛ́likɛmąą nuą di mąą kwɛa mą́ą́, nɛ̨́ɛ̨́yɔwɔi lɔ gaa mą́ą́, ya ɓaa a kpinį. |