Mąątɛ̨nɛ̨ 86 - Yálá laawoo hɛɓɛ (dc)

Mąąwɛli hvɛli woo
1 Davidə nwɔ hvɛli woo.

¹ Davidə nwɔ hvɛli woo. Yai-Laa! 'Ə́ wəli tɔɔ nwóó ɓa, nwóó mu hon, mąąhɔlɔɓo mą́ą́wɛliɛi; hɛn da hvo ɲə́i.

² Nwɔ́ yɛnɛ̨ɛ̨ laa hɔnmo ɲə́i, mąąhɔlɔɓo, ŋą́ kulɔ nwóó ɓa. Yɛ́i a nwɔ́ Yálá, 'ə́ wɔ tímun ɓalo, gilitɔɔ ɓə yɛ́.

³ Nwɔ́ mɛ̨nį Nąmu, mą́ą́wɛli kaa, yɛ́ ɓə ŋą́ túwɔ́ ə́ təlii.

⁴ 'Ə́ wɔ tímun kwəinɛ̨ɛ̨, mąąhɔlɔɓo, yɛ́i a nwɔ́ mɛ̨nį Nąmu, yɛ́ lɔ ɓə ɲɛ̨́i kaa ə́ pɔ pələ.

⁵ Nwɔ́ mɛ̨nį Nąmu, yɛ́i ə́ wɔ mɛ̨nį lɛlɛɛ, yɛ́ nu mąąhvaalɛɛ; Ə́ wɔ ɲɛ̨imąąwɛlikaa hu kɛnɛ̨i, nuąi da ə́ hvɛli di mąą mɛ̨nį ɓa.

⁶ 'Ə́ wəli tɔɔ nwɔ́ hvɛli woo ɓa Yai-Laa! Nɛ̨ɛ̨mąąi gáá vəi yɛ́, 'ə́ wəli tɔɔ kpɔ mą a nɛlɛɛ.

⁷ Ɲələi mɔ̨nɔ̨ a hee la ɉú, ŋą ə́ təli, yá nwóó mu hon.

⁸ Nwɔ́ mɛ̨nį Nąmu, yáláɠaa lɔwai, nɛlɛ kpɔ kpɔɔ ɓə gulaa yɛ́, Yálá! Ə́ kɛ mɛ̨nįɠaa, gɔɔn mąą hvo laa.

⁹ Nu huwuɠaai kpɔ ə́ di pɛli, di kəlee di kaa pai pai, diɛ kwɛli hvilɛn yɛ́, nwɔ́ mɛ̨nį Nąmu, diɛ ə́ laa mąąwiɛ.

¹⁰ Mąąhɔlɔɓo ə́ kɛnɛ̨i, yɛ́ kpalo mɛ̨nįɠaa kɛ, yɛ́ kɔw tanɔ̨n gbən lɔ ɓə Ə́ kaa a Yálá.

¹¹ Yai-Laa, ə́ wɔ pələi lɛ mą́ą́, akɛtii ŋą pɛli hiɛi yɛ bələi ə́ wɔ tɛ̨ąi kaa la. Gíliŋąhiɛ pələ kɛ lɔ tanɔ̨n, əgɛ, gɛ́ pɛli ɲɔwii ə́ laa ɓa.

¹² Nwɔ́ mɛ̨nį Nąmu, nwɔ́ Yálá, gáá bɔ ŋį́ ə́ laa tɛ gwə́i tɔ̨nɔ̨ mɛ̨i, gɛ́ ə́ laa mąąwiɛ wələ too a yələ kəlee.

¹³ Mąąhɔlɔɓo yáá nwɛ́lilakɛ kɛnɛ̨, ɛlɛɛ, yáá gúlɔ ɲąmuątaa yəi.

¹⁴ Yálá! Kpɔwɔ ɲąąkɛ̨nɛ̨ nuą di wolo mą́ą́, wɛa nuą daa di yee lɔ gee hu, diɛ hvilɛn na nwɔ́ yɛnɛ̨ɛ̨ pulu, Yálá! Hvó kpɛli di ɲɛ̨i mu a hɛn da.

¹⁵ Kɛlaa Ə́ wɛi, nwɔ mɛ̨nį Nąmu, liinɛ̨ɛ̨ gwəi Yálá ɓaa a yɛ́, mɛ̨inɛ̨ɛ̨ kɛ Yálá ɓaa a yɛ́, Ə́ lii hva holi ɉa, Ə́ ɓo lɔ a wɛlikɛmąą, da tɛ̨ą.

¹⁶ 'Ə́ ɲɛ̨i tinɛ̨n bɔ́ pələ, 'mą́ą́wɛli kaa, Ə́ wɔ hvąŋąi 'tɛɛ Yɛ́ tímun pɔ, Yɛ́ luwɔnɛ̨ąi lon malo!

¹⁷ 'Ə́ ɲɛ̨i lɛlɛɛ hee mą́ą́, ə ɲɛ̨́i pono, ə ɲówóɠaa ɲɛ̨i paa a nwumɛ̨, a gaai da mo diɛ kɛ, Yɛ́i a Yai-Laa, Yɛ́ ɓə kpɔnmąą tɛɛi bɔ́, Yɛ́ níilɔ.

Lean sinn:

Ceanglaichean taic

Sanasan