Mąątɛ̨nɛ̨ 85 - Yálá laawoo hɛɓɛ (dc)Liilaa hvɛli woo 1 Nwələ ɲɛ̨itɔwɔmun, Kore lonnii di wɔ wələ woo. 2 Yai-Laa, bələi ə́ wɔ lɔi wɛli kaa la yɛ́, yáá yili lɛ; yáá pənə yaa pa a Ɉakɔbə lonnii kɛ luwɔlaa hui; 3 Yáá ə́ wɔ nu huwui nwɔ nɛ̨ŋɛ̨n kulɔ mą, yáá nwɔ túwɔ pələ ɲɔ̨n gəlee mɛ̨i kpulu. 4 Yáá ə́ wɔ liiholii kpɛla bələi, yáá ə́ wɔ liiholi kɛnɛ̨ɛ̨i yali bulu. 5 Ku ɓalo Yálá, pənə ə́ ku hee ku kpaɲą! 'Hvó ku hɔn ɉee ə́ kwəi. 6 Yɛ́ mɔ̨ɔ̨ ə́ lɛɛ a ə́ líiholiɛ ku pɔ a yələ kəlee mɛ̨nį? Yɛ́ ə́ wɔ líiholii hu kwɛa lɔ a kwɛlan gəlee? 7 Kɛlɛi yɛ́ lɔ ɓə pai pənəi yɛ́ ku too nwɔ̨nɔ̨ ku nwunu kɔ́lɔi-ee! Yɛ́ kɛ a ə́ wɔ nu huwui nwɔ kwəinɛ̨ɛ̨-ee! 8 Yai-Laa, ə́ wɔ wɛlikɛmąąlaa lɛ kuɔ wɛ! Ə́ ku ɓalo! 9 Mɛ̨nįi Yai-Laa nwɔ́ Yálá kaa moi, nwə́li tɔɔi mą, yɛ «liilaa ə pa» nwɔ lɔi mɛ̨i, da nwɔ tələnmo nuąi mɛ̨i, Kɛlaa, di hvo kɛa pənə di hvo di yee lɔ di wɔ ɓowo mɛ̨nįi ta hu. 10 Nuąi da ɲɔw mą, nwɔ ɓaloi a mąą lɛɠɛ diɛ, ɛlɛɛ, mąąwiɛ kaa pai heei nɔi hu. 11 Kulɔ nwooɓalaa da tɛ̨ą daa di kee kaa, diɛ liilaa da tələnmolaa di nɛ̨nɛ̨ɓo. 12 Tɛ̨ą a ɓɔn lɔi mɛ̨i, tələnmolaa yɛ lɛɛ yələi pələ yɛ nwun mąą laa. 13 Yai-Laa yaa kpinįi ɓə nwun nąnɛ̨ɛ̨ tɛɛi, ɛlɛɛ, ku wɔ lɔi yɛ ɉihɛnŋaa lɛlɛ. 14 Tələnmolaa kaa hiɛi dɔwɔ, gɔwɔ pɔɔ yɛ pələ laa. |